ନୂଆଦିଲ୍ଲୀ,୦୧/୧୨: ବଙ୍ଗୋପସାଗରରେ ଆସିଥିବା ସାମୁଦ୍ରିକ ଝଡ ‘ଫେଙ୍ଗଲ’ ଶନିବାର ରାତି ୭ଟା ୩୦ରେ ପୁଡୁଚେରୀର କରେଇକାଲ ଓ ତାମିଲନାଡୁର ମହାବଳିପୁରମ ମଧ୍ୟବର୍ତ୍ତୀ ଉପକୂଳ ଅଞ୍ଚଳରେ ସ୍ଥଳଭାଗ ଛୁଇଁବା ପରେ ଅତିକ୍ରମ କରିଛି । ଲ୍ୟାଣ୍ଡଫଲ ପ୍ରକ୍ରିୟା ପ୍ରାୟ ୪ ଘଣ୍ଟା ଧରି ଚାଲିଥିଲା । ଏହି ସମୟରେ ପବନର ବେଗ ଘଣ୍ଟାପ୍ରତି ୯୦ କି.ମି ରହିଥିଲା । ଏଥିସହ ପ୍ରବଳ ବର୍ଷା ହୋଇଥିଲା ।
ପ୍ରବଳ ବର୍ଷା ଯୋଗୁ ଚେନ୍ନାଇ ସମେତ ତାମିଲନାଡୁର ବିଭିନ୍ନ ସ୍ଥାନରେ ରାସ୍ତାଘାଟ ଜଳମଗ୍ନ ହୋଇପଡିଥିଲା । ଏଥିସହ କେତେକ ସ୍ଥାନରେ ବଡବଡ ଗଛ ଉପୁଡି ପଡିଥିଲା ବେଳେ ବିଦ୍ୟୁତ ଖୁଣ୍ଟ, ମୋବାଇଲ ଟାୱାର ଓ ହୋର୍ଡିଂଗୁଡିକ ମଧ୍ୟ କ୍ଷତିଗ୍ରସ୍ତ ହୋଇଛି । ବାତ୍ୟାର ପ୍ରଭାବ ପଡୋଶୀ ରାଜ୍ୟ କର୍ଣ୍ଣାଟକ ଓ ଆନ୍ଧ୍ରପ୍ରଦେଶରେ ମଧ୍ୟ ଦେଖିବାକୁ ମିଳିଛି । ପ୍ରବଳ ବର୍ଷା ଓ ପବନକୁ ଦୃଷ୍ଟିରେ ରଖି ଚେନ୍ନାଇ ବିମାନବନ୍ଦରକୁ ୧୬ଘଣ୍ଟା ବନ୍ଦ ରହିଥିଲା। କେତେକ ଟ୍ରେନ ଚଳାଚଳକୁ ବାତିଲ କରାଯାଇଥିଲା ବେଳେ ଅନ୍ୟ କେତେକ ବିଳମ୍ବରେ ଚାଲୁଛି। ବିଶେଷକରି ଚେନ୍ନାଇ ସମେତ କାଞ୍ଚିପୁରମ, ଚେଙ୍ଗଲପଟ୍ଟୁ, ତିରୁଭଲୁର, କୁଡାଲୋର, ବିଲୁପୁରମ, କଲାକୁରୁଚି ଓ ମୟିଲାଦୁଥୁରାଇ ଜିଲ୍ଲା ପ୍ରଭାବିତ ହୋଇଛି । ଏସବୁ ଜିଲ୍ଲାରେ ସମସ୍ତ ସ୍କୁଲ ଓ କଲେଜକୁ ବନ୍ଦ ରଖାଯାଇଛି । ଆଇଟି କମ୍ପାନିର କର୍ମଚାରୀଙ୍କୁ ଘରେ ରହି କାମ କରିବାକୁ ପରାମର୍ଶ ଦିଆଯାଇଛି । ଉପକୂଳବର୍ତ୍ତୀ ଅଞ୍ଚଳର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଛି । ବିଭିନ୍ନ ସ୍ଥାନରେ ୨ ହଜାର ରିଲିଫ ସେଣ୍ଟର ପ୍ରତିଷ୍ଠା କରାଯାଇଛି ।
ପୁଡୁଚେରୀରେ ମଧ୍ୟ ବାତ୍ୟାର ପ୍ରଭାବ ଦେଖିବାକୁ ମିଳିଛି । ସେଠାରେ ପ୍ରବଳ ବର୍ଷା ସହ ପବନ ଲାଗି ରହିଛି । ପରିସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି ସରକାରଙ୍କ ପକ୍ଷରୁ ସମସ୍ତ ଶିକ୍ଷାନୁଷ୍ଠାନକୁ ଛୁଟି ଘୋଷଣା କରାଯାଇଥିଲା । ବିଭିନ୍ନ ପର୍ଯ୍ୟଟନସ୍ଥଳୀକୁ ବନ୍ଦ ରଖାଯାଇଛି। ଏସବୁ ଜିଲ୍ଲାର ଲୋକମାନଙ୍କୁ ଘର ଭିତରେ ରହିବା ସହ ବାହାରକୁ ନ ବାହାରିବା ଲାଗି ପରାମର୍ଶ ଦିଆଯାଇଛି । ଉଦ୍ଧାର ଓ ରିଲିଫ କାର୍ଯ୍ୟ ଲାଗି ତାମିଲନାଡୁରେ ଏନ୍ଡିଆରଏଫର ୭ଟି ଟିମ୍କୁ ମୁତୟନ କରାଯାଇଛି । ପ୍ରତ୍ୟେକ ଟିମ୍ରେ ୩୦ ଜଣ ଯବାନ ସାମିଲ ଅଛନ୍ତି।
