ଭୁବନେଶ୍ୱର,୧୭/୦୫: ପେସା ଟ୍ରଲି ଚଳାଇବା । ଦିନ ତମାମ ବୁଲିଲେ ଘରକୁ ଡାଲି, ଚାଉଳ ନିଏ । ହେଲେ ଖରା ଆମ ପେଟକୁ ଲାତ ମାରିଛି । ଆମ ବେପାର ଖାଇଛି । ଏହି ନିଆଁ ଲଗା ଖରା ସହ ଲଢିବୁ ବା କେମିତି ? ଜାଗମରା ଛକରେ ଝାଳ ପୋଛୁପୋଛୁ ମନର ବେଦନା ବଖାଣିଥିଲେ ବୃଦ୍ଧ ଭାସିଆ ଭୋଇ ।
ଜାଗମରା ଗାଁରେ ଭାସିଆଙ୍କ ଘର । ସଂସାର କହିଲେ ସେ ଏବଂ ତାଙ୍କ ପତ୍ନୀ । ବୟସ ୬୫ ଟପିସାରିଥିଲେ ହେଁ ଭାସିଆ ଟ୍ରଲି ଚଲାଇ ପରିବାର ପୋଷୁଛନ୍ତି । ହେଲେ ଆଜିକୁ ୧୫ଦିନ ହେବ ବେପାର ଠପ୍ । ଖରା ଯୋଗୁଁ ତାଙ୍କୁ କେହି ଡାକୁନାହାନ୍ତି । ପ୍ରଚଣ୍ଡ ଖରା ହେଉଛି । ତଥାପି ଏହାକୁ ଖାତିର ନକରି ସକାଳ ୭ଟାରୁ ଉଠି ଟ୍ରଲି ପେଲିପେଲି ଜାଗମରା ଛକକୁ ଆଣୁଛନ୍ତି । ସେହି ଟ୍ରଲିରେ ଝୁଲୁଥିବା ପାଣି ବୋତଲ ତାଙ୍କର ଅଧା ଦିନର ଆହାର । ଖରାବେଳେ ଅଧଘଣ୍ଟା ଖାଇବାକୁ ଯାଇ ପୁଣି ବଜାରକୁ ଫେରିଆସନ୍ତି ଭାସିଆ । ଆଶା କାଳେ କିଏ ଡାକିଦେବ । ହେଲେ ଖରା ସବୁ ବରବାଦ କରିଦେଇଛି । ପୂର୍ବରୁ ଦିନକୁ ୫ଶହରୁ ୬ଶହ ଟଙ୍କାର ବେପାର ହେଉଥିବା ବେଳେ ଏବେ ଶହେ ଟଙ୍କା ବି ହେବା ଅସମ୍ଭବ । ଦିନରେ ବେପାର ନାହିଁ, ରାତି ହେଲେ ହତାଶ ହୋଇ ସେ ଘରକୁ ଫେରୁଥିବା ଭାସିଆ କହନ୍ତି।
