ଛତ୍ରପୁର, ୧୧/୦୩ : ଛତ୍ରପୁର ୧୬ ନମ୍ଵର ଜାତୀୟ ରାଜପଥ କଡରେ ଥିବା ହୋଟେଲ ଆଶା ପ୍ରାଇଡ୍ର ରୁମ୍ ନମ୍ୱର-୨୦୨ରୁ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି। ମୃତକ ଜଣଙ୍କ ରାଉରକେଲା ସେକ୍ଟର ୨୨ ଅଞ୍ଚଳର ଯୁବକ ପ୍ରମୋଦ ମହାକୁଡ଼ (୩୦ବର୍ଷ) ବୋଲି ଜଣାପଡ଼ିଛି। ପ୍ରମୋଦଙ୍କ ମୃତଦେହ ନିକଟରେ ୩ରୁ ଅଧିକ ମଦ ବୋତଲ ପଡିରହିଛି। ଘଟଣାସ୍ଥଳରେ ପୋଲିସ ପହଞ୍ଚି ଶବ ଜବତ କରିଛି।
ସୂଚନାନୁଯାୟୀ, ରାଉରକେଲାର ପ୍ରମୋଦ ମହାକୁଡ଼ ବହୁ ଦିନ ହେଲା ଛତ୍ରପୁର ହୋଟେଲ ଆଶା ପ୍ରାଇଡ୍ରେ ରହି ଆସୁଥିଲେ। ସୋମବାର ରାତିରେ କିଛି ଯୁବକଙ୍କ ସହ ମିଶି ସେ ମଦ୍ୟପାନ କରିଥିଲେ। ଆଜି ସକାଳୁ ରୁମ୍ ନମ୍ଵର ୨୦୨ ଭିତରେ ତାଙ୍କର ମୃତଦେହ ପଡିଥିବା ଦେଖିବାକୁ ମିଳିଥିଲା। ହୋଟେଲ ମାଲିକ ଏନେଇ ପୋଲିସକୁ ଖବର ଦେଇଥିଲେ। ଛତ୍ରପୁର ଉପଖଣ୍ଡ ପୋଲିସ ଅଧିକାରୀ ଚନ୍ଦନ ଘଢେଇ, ଥାନାଧିକାରୀ ଦେବାଶିଷ ମହାନ୍ତି, ଏସଆଇ ବିଶ୍ୱଜିତ୍ ନାୟକ ଓ ଟିମ୍ ପହଞ୍ଚି ଶବ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛନ୍ତି। ସାଇଣ୍ଟିଫିକ୍ ଟିମ୍ ପହଞ୍ଚି ଛାନଭିନ୍ କରୁଛି। ଯୁବକଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଯୁବକଙ୍କ ମୃତ୍ୟୁର କାରଣ ଜଣାପଡ଼ିବ ବୋଲି କୁହାଯାଉଛି। ଏହି ଲଜ୍ ମଦୁଆଙ୍କ ପାଇଁ ଏକ ପ୍ରକାର ଆଡ୍ଡାସ୍ଥଳୀ ପାଲିଟିଥିବା ଅଭିଯୋଗ ହେଉଛି।
