ବଣାଇଁ,୨୯/୦୭: ସୁନ୍ଦରଗଡ଼ ଜିଲ୍ଲା ବଣାଇଁ ଥାନା ଅଞ୍ଚଳର କନ୍ତସରା ଗ୍ରାମରେ ଅଭାବନୀୟ ଘଟଣା । ସନ୍ଦେହଜନକ ଅବସ୍ଥାରେ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତକ ଜଣକ ହେଲେ ରଞ୍ଜିତ କିଷାନ । ସେପଟେ ପରିବାର ଲୋକ ପୁଅକୁ ହତ୍ୟା କରାଯାଇଥିବା ନେଇ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, କିଛିଦିନ ପୂର୍ବରୁ ରଞ୍ଜିତଙ୍କ ଦେହ ଅସୁସ୍ଥ ହୋଇଥିଲା। ଶରୀର ଦୁର୍ବଳତା ଯୋଗୁଁ ସେ ଶ୍ରମ କରିବାକୁ ନଯାଇ ଘରେ ବିଶ୍ରାମ ନେଉଥିଲେ। ଗତକାଲି ସକାଳେ ପିଲାମାନେ ଟିଉସନକୁ ଯାଇଥିବା ବେଳେ ପତ୍ନୀ ଚାଷ କାର୍ଯ୍ୟ କରିବାକୁ ବିଲକୁ ଯାଇଥିଲେ। ଅପରାହ୍ନରେ ସମ୍ପର୍କୀୟ ପୁତୁରା, ରଞ୍ଜିତ ଅଚେତ ଅବସ୍ଥାରେ ବାରଣ୍ଡାରେ ପଡିଥିବାର ଦେଖିବାକୁ ପାଇଥିଲେ। ଯାହାପରେ ତାଙ୍କ ପୁତୁରା ରଞ୍ଜିତଙ୍କ ପତ୍ନୀଙ୍କୁ ଯାଇ ଡାକିଥିଲେ । ସେ ଖବର ପାଇ ସ୍ବାମୀଙ୍କ ନିକଟରେ ପହଞ୍ଚି ଆମ୍ବୁଲାନ୍ସ ଡାକି ବଣାଇ ଡାକ୍ତରଖାନାକୁ ନେଇଥିଲେ। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।
ସ୍ବାମୀଙ୍କ ବେକରେ କଳା ଦାଗ,ନଖ ଚିହ୍ନ ଏବଂ ମୁହଁ ତଳକୁ ଥିବା ବେଳେ ରକ୍ତଦାଗ ଥିବାରୁ ସ୍ବାମୀଙ୍କ ମୃତ୍ୟୁକୁ ସହଜରେ ଗ୍ରହଣ କରିନଥିଲେ ପତ୍ନୀ। ଏ ନେଇ ସେ ବଣାଇ ଥାନାରେ ସ୍ବାମୀଙ୍କୁ କେହି ହତ୍ୟା କରିଥିବା ନେଇ ଅଭିଯୋଗ କରିଛନ୍ତି।
