ଟିଟିଲାଗଡ଼, ୦୨/୧୧: କିଛି ମାସର ବ୍ୟବଧାନରେ ପୁଣିଥରେ ଜଣେ ଗର୍ଭବତୀ ମହିଳାଙ୍କ ମୃତ୍ୟୁ । ମୃତ ମହିଳା ଜଣକ ଟିଟିଲାଗଡ଼ ସହର ହାଟପଦା ପଡାର ସରୋଜିନୀ ବେହେରା (୨୮) ବୋଲି ଜଣାପଡିଛି । ବଲାଙ୍ଗୀର ଜିଲ୍ଲା ଟିଟିଲାଗଡ଼ ସହରରେ ଥିବା ମହିଳା ଓ ଶିଶୁ ଡାକ୍ତରଖାନାରେ ଏଭଳି ଘଟଣା ଘଟିଛି । ମହିଳାଙ୍କ ମୃତ୍ୟୁକୁ ନେଇ କିଛି ସମୟ ଧରି ଡାକ୍ତରଖାନା ପରିସରରେ ଚାପା ଉତ୍ତେଜନା ମଧ୍ୟ ଦେଖା ଦେଇଛି ।
ସୂଚନା ମୁତାବକ, ମୃତ ଗର୍ଭବତୀ ମହିଳା ସରୋଜିନୀ ବେହେରା ନିଜ ତୃତୀୟ ସନ୍ତାନର ପ୍ରସବ ପାଇଁ ଟିଟିଲାଗଡ଼ ପିପଲ ପଦର ଠାରେ ଥିବା ଏମସିଏଚରେ ଭର୍ତ୍ତି ହୋଇଥିଲେ । ହେଲେ ଅପରେସନ ଚ୍ୟାମ୍ବରକୁ ନେଇଥିବା ବେଳେ ତାଙ୍କର ମୃତ୍ୟୁ ଘଟିଥିଲା । ମୃତ୍ୟୁ ସମୟରେ ତାଙ୍କ ସ୍ୱାମୀ ରାଜେଶ ବେହେରା, ଆଶା କର୍ମୀ ସହ ଡାକ୍ତର ଏବଂ ନର୍ସ ଉପସ୍ଥିତ ଥିଲେ । ତେବେ ହାଇ ବ୍ଲଡ ପ୍ରେସର ହେବାରୁ ହୃଦଘାତ ହୋଇ ଗର୍ଭବତୀ ମହିଳାଙ୍କ ମୃତ୍ୟୁ ଘଟିଥିବା ଡାକ୍ତର ଅନୁମାନ କରୁଛନ୍ତି।
ଏନେଇ ମହିଳାଙ୍କ ପରିବାର ଲୋକେ ଟିଟିଲାଗଡ଼ ଥାନାରେ ଅଭିଯୋଗ କରିଛନ୍ତି । ଅଭିଯୋଗରେ ସରୋଜିନୀଙ୍କୁ ଚିକିତ୍ସା କରୁଥିବା ଡାକ୍ତର ଜଣକ ଭୁଲ୍ ଚିକିତ୍ସା କରିଥିବାରୁ ମହିଳାଙ୍କ ମୃତ୍ୟୁ ଘଟିଛି ବୋଲି କହିଛନ୍ତି । ମାମଲା ରୁଜୁ ହେବା ପରେ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ କରି ପରିବାର ବର୍ଗଙ୍କୁ ହସ୍ତାନ୍ତର କରିଛି । ତେବେ ଏହି ଘଟଣାକୁ ନେଇ ଟିଟିଲାଗଡ଼ ଏମସିଏଚ ଡାକ୍ତରଖାନା କର୍ତ୍ତୃପକ୍ଷଙ୍କ କୌଣସି ତ୍ରୁଟି ନ ଥିବା କୁହାଯାଇଛି । ଚିକିତ୍ସା ପୂର୍ବରୁ ହୃଦଘାତ ତଥା ଉଚ୍ଚ ରକ୍ତଚାପ ଯୋଗୁଁ ମହିଳାଙ୍କ ମୃତ୍ୟୁ ଘଟିଥିବା ଅନୁମାନ କରାଯାଉଛି l ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି କହିଛନ୍ତି । ତେବେ ଦିନକୁ ଦିନ ଟିଟିଲାଗଡ଼ ଡାକ୍ତରଖାନାରେ ପ୍ରସବ କାଳୀନ ମୃତ୍ୟୁ ବଢିବାରେ ଲାଗିଥିବା ବେଳେ ବିଭାଗୀୟ ଅଧିକାରୀ ଏଥିପ୍ରତି ତତ୍ପରତା ପ୍ରକାଶ କରି ଏହାର ଉପଚାର ଦିଗରେ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହୋଇଛି ।
