ନୂଆଦିଲ୍ଲୀ,୧୪।୧: ଦିଲ୍ଲୀବାସୀଙ୍କ ଫୁସଫୁସରେ ନାନୋ କଣିକା ପ୍ରବେଶ କରୁଛି, ଯାହା ବହୁତ ଭୟଙ୍କର। ଏକ ଅଧ୍ୟୟନରୁ ଜଣାପଡିଛି ଯେ ବାୟୁ ଗୁଣବତ୍ତା ସୂଚକାଙ୍କ (AQI)ରେ ଉପସ୍ଥିତ ପ୍ରଦୂଷକ ନାନୋ ପାର୍ଟିକିଲ୍ସ ଫୁସଫୁସ ଦେଇ ରକ୍ତପ୍ରବାହରେ ପହଞ୍ଚି ପ୍ରତ୍ୟେକ ଅଙ୍ଗକୁ ପ୍ରଭାବିତ କରୁଛି। ବିଶେଷଜ୍ଞମାନେ କହିଛନ୍ତି ଯେ ନଭେମ୍ବରରୁ ଜାନୁଆରୀ ପର୍ଯ୍ୟନ୍ତ ଦିଲ୍ଲୀ-ଏନସିଆରରେ ପିଏମ୍ ୨.୫ ର ଲେବଲ ମାନକଠାରୁ ବହୁ ଗୁଣ ଅଧିକ ପହଞ୍ଚିଛି। ଏଥିରେ ପ୍ରଦୂଷିତ ନାନୋ କଣିକାର ସ୍ତର ବହୁତ ବୃଦ୍ଧି ପାଇଛି। N95 ମାସ୍କ ମଧ୍ୟ ସେମାନଙ୍କୁ ଅଟକାଇ ପାରିବ ନାହିଁ। ଏଗୁଡ଼ିକ ଏତେ ବିପଦଜନକ ଯେ ପିଲା ଏବଂ ବୟସ୍କଙ୍କ ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପକାଇପାରେ। ଆସନ୍ତୁ ଜାଣିବା ଫୁସଫୁସରେ ନାନୋ ପାର୍ଟିକିଲ୍ସ ପହଞ୍ଚିବା କେତେ ବିପଦପୂର୍ଣ୍ଣ ?
ନାନୋ ପାର୍ଟିକିଲ୍ସ ଆମର କେଶଠାରୁ ବି ୫୦୦ ଗୁଣା ଛୋଟ, ଯାହାକି ଫୁସଫୁସ୍ ଓ ଶରୀରର ଅନ୍ୟ ଅଙ୍ଗ ପର୍ଯ୍ୟନ୍ତ ପହଁଞ୍ଚିବା ପରେ ବିପଦ ସୃଷ୍ଟି କରିଥାଏ। ଏହା ଏତେ ଛୋଟ ଯେ, ରକ୍ତ ଜରିଆରେ ମସ୍ତିସ୍କ ପର୍ଯ୍ୟନ୍ତ ପହଁଞ୍ଚିବା ପରେ ପ୍ରଭାବିତ କରିଥାଏ। ଦିଲ୍ଲୀର ବାୟୁରେ ଏହା ମିଶିଯାଇଛି ଓ ଏହା ମାଧ୍ୟମରେ ଶରୀର ଭିତରେ ପହଁଞ୍ଚି ଯାଇଥାଏ। ଏହାଦ୍ବାରା ସବୁଠୁ ଅଧିକ ବିପଦ ସଡକ କଡରେ ରହିଥିବା ଲୋକ ଓ ଟ୍ରାଫିକ୍ ପୋଲିସଙ୍କୁ ରହିଛି। ଅହମ୍ମଦାବାଦର ଭୌତିକ ଅନୁସନ୍ଧାନ ପ୍ରୟୋଗଶାଳା ଓ ଦିଲ୍ଲୀ ଟେକ୍ନୋଲୋଜିକାଲ ୟୁନିଭର୍ସିଟି ମିଳିତ ଭାବରେ ଏହି ଷ୍ଟଡି କରିଛନ୍ତି। ଏଥିରେ ଜଣାପଡିଛି ଯେ, ଦିଲ୍ଲୀରେ ଚାଲୁଥିବା ଲୋକଙ୍କ ଶ୍ବାସକ୍ରିୟା ଉପରେ ବାୟୁରେ ଥିବା ନାନୋ ପାର୍ଟିକିଲ କିମ୍ବା ଏହାଠାରୁ ଛୋଟ କଣିବାର ଉପସ୍ଥିତି ଓ ପ୍ରଭାବର ଯାଞ୍ଚ କରାଯାଇଛି। ଏହାର ପ୍ରଭାବ ରାସ୍ତା କଡରେ ସବୁଠାରୁ ଅଧିକ ୩୦% ରହିଛି। ଦିଲ୍ଲୀବାସୀ ସଡକରେ ଚାଲିବା ସମୟରେ ପ୍ରତିଦିନ ୧୦-୧୮ ମିଲିୟନ ନାନୋପାର୍ଟିକିଲ୍ସର ସମ୍ପର୍କରେ ଆସିଥାନ୍ତି, ଯାହାକି ତାଙ୍କ ସ୍ବାସ୍ଥ୍ୟ ପାଇଁ ବିପଦଜନକ।
ଏହାଦ୍ବାରା ପିଲାଙ୍କ ସ୍ବାସ୍ଥ୍ୟ ଉପରେ ଗମ୍ଭୀର ପ୍ରଭାବ ପଡୁଛି। ସିଧାସଳଖ ଫୁସଫୁସ୍ ବାଟ ଦେଇ ରକ୍ତର ଧମନୀରେ ଜମି ଯାଇଥାଏ। ପିଲାଙ୍କ ଭିତରେ ହାଇବ୍ଲଡ ପ୍ରେସର ଓ ଡାଇବେଟିସ୍ର ବିପଦ ବଢିଯାଇଥାଏ। କେବଳ ସେତିକି ନୁହେଁ ହାର୍ଟ ଏବଂ ବ୍ରେନ୍ ପାଇଁ ଖୁବ୍ ବିପଦଜନକ। ଏହା କାରଣରୁ ହାର୍ଟ ଆଟାକ, ବ୍ରେନ୍ ଷ୍ଟେ୍ରାକ୍, ଲଙ୍ଗସ୍ କ୍ୟାନସର, ଆଲର୍ଜି, ଆସ୍ଥମା, ସିଓପିଡି, ଟିବି, ନିମୋନିଆ ଏବଂ ପିଲାଙ୍କ ଭିତରେ କ୍ୟାନସର ଭଳି ବିପଦଜନକ ରୋଗ ଦେଖିବାକୁ ମିଳେ।
