ନୂଆଦିଲ୍ଲୀ : ଦିଲ୍ଲୀରେ ଦିନକୁ ଦିନ ବିଷାକ୍ତ ହେବାରେ ଲାଗିଛି ବାୟୁର ମାନ। କ୍ରମାଗତ ଭାବରେ ବାୟୁ ଗୁଣବତ୍ତା ହ୍ରାସ ପାଉଥିବାରୁ, ରେଖା ଗୁପ୍ତାଙ୍କ ସରକାର କିଛି ଗୁରୁତ୍ୱପୂର୍ଣ୍ଣ ପଦକ୍ଷେପ ନେବା ଆରମ୍ଭ କରିଛନ୍ତି। ବାୟୁ ଗୁଣବତ୍ତା ପରିଚାଳନା କମିଶନ (CAQM)ର ମାର୍ଗଦର୍ଶିକା ଅନୁଯାୟୀ, ଏକ ପରାମର୍ଶ ଜାରି କରାଯାଇଛି । ଏଥିରେ ଘରୋଇ କାର୍ଯ୍ୟାଳୟ ଗୁଡ଼ିକୁ କେବଳ ୫୦ % କର୍ମଚାରୀଙ୍କ ସହିତ କାର୍ଯ୍ୟ କରିବାକୁ କୁହାଯାଇଛି । ଅନ୍ୟ ମାନଙ୍କୁ ଘରୁ କାମ କରିବାକୁ ଅନୁମତି ଦିଆଯାଇଛି। ବାୟୁ ଗୁଣବତ୍ତାର ଅବନତିକୁ ରୋକିବା ପାଇଁ ସରକାର ବିଭିନ୍ନ ଦିଗରେ କାର୍ଯ୍ୟ ଜାରି ରଖିଛନ୍ତି।
ଦିଲ୍ଲୀ ସରକାରଙ୍କ ନୂତନ ପରାମର୍ଶ ଅନୁଯାୟୀ, ରାଜଧାନୀରେ ଘରୋଇ କାର୍ଯ୍ୟାଳୟ ଗୁଡ଼ିକ ଏବେ ସେମାନଙ୍କ କର୍ମଚାରୀଙ୍କ ମାତ୍ର ଅଧା ଶାରୀରିକ ଉପସ୍ଥିତି ସହିତ କାର୍ଯ୍ୟ କରିବେ। ପ୍ରଦୂଷଣ ଚାପ ହ୍ରାସ କରିବା ଏବଂ ସହରର ବାୟୁ ଗୁଣବତ୍ତା ସ୍ଥିର କରିବାରେ ସାହାଯ୍ୟ କରିବା ପାଇଁ ଏକ ସତର୍କତାମୂଳକ ପଦକ୍ଷେପ ଭାବରେ ଏହି ପଦକ୍ଷେପ ନିଆଯାଇଛି। ସରକାର କହିଛନ୍ତି ଯେ ଏହି ବ୍ୟବସ୍ଥା ବର୍ତ୍ତମାନ ପରିସ୍ଥିତିରେ ଅତ୍ୟାବଶ୍ୟକ ରହିଛି ।
ସୂଚନାଥାଉକି, ରାଜଧାନୀ ଦିଲ୍ଲୀ ଏବେ GRAP-III ପର୍ଯ୍ୟାୟରେ ଅଛି, ଯାହା ଯୋଗୁଁ ଅନେକ କଟକଣା ପୂର୍ବରୁ ଲାଗୁ ହୋଇଛି। ପରିବେଶ ମନ୍ତ୍ରୀ ମଞ୍ଜିନ୍ଦର ସିଂହ ସିରସା କହିଛନ୍ତି କି, "GRAP-III ସମୟରେ, ଦିଲ୍ଲୀ ସରକାର ସମସ୍ତ ଆବଶ୍ୟକୀୟ ପଦକ୍ଷେପ ତୁରନ୍ତ ନେଉଛନ୍ତି । ଆମର ଧ୍ୟାନ ସ୍ୱଚ୍ଛ ବାୟୁ, ଜନସ୍ୱାସ୍ଥ୍ୟ ଉପରେ ରହିଛି ।
ମୁଖ୍ୟମନ୍ତ୍ରୀ ରେଖା ଗୁପ୍ତା ବ୍ୟକ୍ତିଗତ ଭାବରେ ପ୍ରଦୂଷଣ ସ୍ତର ସମୀକ୍ଷା କରୁଛନ୍ତି। ସରକାର ବିଶେଷ ଭାବରେ ଦୁର୍ବଳ ଗୋଷ୍ଠୀ, ଯେପରିକି ବୃଦ୍ଧ, ଶିଶୁ ଏବଂ ଅସୁସ୍ଥଙ୍କ ସୁରକ୍ଷା ପ୍ରତି ସତର୍କ ଅଛନ୍ତି। ଯେକୌଣସି ପରିସ୍ଥିତିର ପ୍ରତିକ୍ରିୟାରେ ତୁରନ୍ତ ପଦକ୍ଷେପ ନେବାକୁ ଅଧିକାରୀ ମାନଙ୍କୁ ନିର୍ଦ୍ଦେଶ ଦିଆଯାଇଛି।"
ଭିଡ଼ ଏବଂ ଟ୍ରାଫିକ୍ ଭିଡ଼ ହ୍ରାସ କରିବା ପାଇଁ, ସରକାର ପୂର୍ବରୁ ସରକାରୀ କାର୍ଯ୍ୟାଳୟର ସମୟରେ ପରିବର୍ତ୍ତନ କରିଛନ୍ତି । MCD କାର୍ଯ୍ୟାଳୟ ଗୁଡ଼ିକ ସକାଳ ୮.୩୦ ରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଏବଂ ଦିଲ୍ଲୀ ସରକାରୀ କାର୍ଯ୍ୟାଳୟ ଗୁଡ଼ିକ ସକାଳ ୧୦ ଟାରୁ ସନ୍ଧ୍ୟା ସାଢେ ୬ ପର୍ଯ୍ୟନ୍ତ କାର୍ଯ୍ୟ କରିବ। ଏହି ବ୍ୟବସ୍ଥା ଫେବୃଆରୀ ୨୦୨୬ ପର୍ଯ୍ୟନ୍ତ କାର୍ଯ୍ୟକାରୀ ହେବ । ଏହା ପିକ୍ ଆୱାରରେ ଟ୍ରାଫିକ୍ ହ୍ରାସ କରିବ ଏବଂ ପ୍ରଦୂଷଣ ହ୍ରାସ କରିବ।
ମନ୍ତ୍ରୀ ସିରସା କହିଛନ୍ତି, "ଦିଲ୍ଲୀ ସରକାରୀ ଦଳ 24×7 ନିରନ୍ତର ଭାବରେ କାର୍ଯ୍ୟ କରୁଛନ୍ତି। ଏପର୍ଯ୍ୟନ୍ତ ୧୨୦୦ ରୁ ଅଧିକ ନିର୍ମାଣ ସ୍ଥାନ ଏବଂ ଶିଳ୍ପ ଯାଞ୍ଚ କରାଯାଇଛି, ଏବଂ ୨ଶହରୁ ଅଧିକ ଲୋକଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି।
