ନୂଆଦିଲ୍ଲୀ, ୧୩/୦୩: ସାଇବର କ୍ରାଇମ କୋଅର୍ଡିନେସନ ସେଣ୍ଟର(ଆଇ୪ସି) ଡିଜିଟାଲ ଆରେଷ୍ଟ ମାମଲାରେ ସମ୍ପୃକ୍ତ ଥିବା ୩,୯୬୨ରୁ ଅଧିକ ସ୍କାଇପ୍ ଆଇଡି ଏବଂ ୮୩,୬୬୮ ହ୍ୱାଟ୍ସ ଆପ୍ ଆକାଉଣ୍ଟକୁ ଚିହ୍ନଟ କରି ସେଗୁଡ଼ିକୁ ବ୍ଲକ୍ କରିଛି । ଏ ନେଇ ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ବୁଧବାର ରାଜ୍ୟସଭାରେ ସୂଚନା ଦିଆଯାଇଛି ।
ସ୍ୱରାଷ୍ଟ୍ର ରାଷ୍ଟ୍ର ମନ୍ତ୍ରୀ ବନ୍ଦୀ ସଞ୍ଜୟ କୁମାର ଡିଏମ୍କେ ସାଂସଦ ତିରୁଚି ଶିବାଙ୍କ ପ୍ରଶ୍ନର ଲିଖିତ ଉତ୍ତର ରଖି କହିଥିଲେ, ସାଇବର ଅପରାଧୀମାନେ ଇଡି, ସିବିଆଇ ଭଳି ଏଜେନ୍ସିର ନକଲି ଅଧିକାରୀ ହୋଇ ଏହି ଆକାଉଣ୍ଟର ବ୍ୟବହାର କରୁଥିଲେ । ଏହାଦ୍ୱାରା ସେମାନେ ଲୋକଙ୍କୁ ଠକୁଥିଲେ । ଏହା ବ୍ୟତୀତ ୨୦୨୫ ଫେବ୍ରୁଆରୀ ୨୮ ସୁଦ୍ଧା ୭ ଲକ୍ଷ ୮୧ ହଜାରରୁ ଅଧିକ ସିମ୍ କାର୍ଡ ଏବଂ ୨ ଲକ୍ଷ ୮ ହଜାରରୁ ଊଦ୍ଧ୍ୱର୍ ଆଇଏମ୍ଇଆଇ ନମ୍ବର ମଧ୍ୟ ବ୍ଲକ୍ କରାଯାଇଛି । ୧୩ ଲକ୍ଷ ୩୬ ହଜାରରୁ ଊଦ୍ଧ୍ୱର୍ ଅଭିଯୋଗ ଆଧାରରେ ୪,୩୮୬ କୋଟି ଟଙ୍କାରୁ ଅଧିକ କ୍ଷତିକୁ ରୋକା ଯାଇପାରିଛି ।
ସ୍ୱରାଷ୍ଟ୍ର ରାଷ୍ଟ୍ର ମନ୍ତ୍ରୀ ଆହୁରି କହିଥିଲେ ଯେ, କେନ୍ଦ୍ର ସରକାର ଏବଂ ଟେଲିକମ୍ ସର୍ଭିସ୍ ପ୍ରୋଭାଇଡର (ଟିଏସ୍ପି) ଇଣ୍ଟରନ୍ୟାସନାଲ ସ୍କୁଫ୍ କଲ୍ ବା ଠକେଇ ପାଇଁ ବାହାରୁ ଆସୁଥିବା ଫୋନ୍ କଲ୍କୁ ଚିହ୍ନଟ କରିବା ଓ ସେଗୁଡ଼ିକୁ ବ୍ଲକ୍ କରିବା ଲାଗି ଏକ ସିଷ୍ଟମ ପ୍ରସ୍ତୁତ କରିଛନ୍ତି । ଏପରି ଫୋନ୍ କଲ୍ ଆସିଲେ ତାହା ମୋବାଇଲ ଡିସ୍ପ୍ଲେରେ ତାହା ଭାରତର ନମ୍ବର ବୋଲି ଦେଖାଇଥାଏ । କିନ୍ତୁ ତାହା ବାସ୍ତବରେ ବିଦେଶରୁ ଆସିଥାଏ । ଏପରି କଲ୍କୁ ବ୍ଲକ୍ କରିବା ଲାଗି ଟିଏସ୍ପିକୁ ନିର୍ଦ୍ଦେଶ ଦିଆଯାଇଛି । ଏହାବାଦ୍ ସାଇବର ଅପରାଧର ଅଭିଯୋଗ ପାଇଁ ଏକ ଟୋଲ୍ ଫ୍ରି ନମ୍ବର ୧୯୩୦ ଚାଲୁ କରାଯାଇଛି । ଲୋକଙ୍କ ମଧ୍ୟରେ ସଚେତନତା ବଢ଼ାଇବା ଲାଗି ଆଞ୍ଚଳିକ ଭାଷାରେ ସଚେତନ ବାର୍ତ୍ତା ଥିବା କଲର ଟ୍ୟୁନ୍ ପ୍ରସାରିତ କରାଯାଉଛି ବୋଲି ମନ୍ତ୍ରୀ ସଞ୍ଜୟ କହିଛନ୍ତି ।
