ଫିରିଙ୍ଗିଆ, ୨୭/୫: ସରକାରଙ୍କ ତରଫରୁ ଜନସାଧାରଣଙ୍କ ସୁବିଧା ପାଇଁ ରାସ୍ତାଘାଟ ହେଉ କି ଅନ୍ୟାନ୍ୟ ବ୍ୟବସ୍ଥା ହେଉ କୋଟି କୋଟି ଟଙ୍କା ଖର୍ଚ୍ଚ କରାଯାଉଛି। ହେଲେ ଏସବୁ ଟଙ୍କା ଠିକ ଜାଗାରେ ଆଉ ଠିକ ପରିମାଣରେ ବିନିଯୋଗ ହୋଇ ପାରୁନଥିବା ବେଳେ ଠିକାଦାର ହେଉ କି ବିଭାଗୀୟ ଅଧିକାରୀଙ୍କ ଅବହେଳାରୁ ରାସ୍ତା ନିର୍ମାଣ କମ ଦିନରେ ଖରାପ ହେଉଯାଉଛି। 

କେଉଁଠି ପିଚୁ ଉଠିଯାଉଛି ତ କେଉଁଠି ନିମ୍ନ ମାନର କାର୍ଯ୍ୟ ଯୋଗୁଁ ରାସ୍ତା କାର୍ଯ୍ୟ ନ ସରୁଣୁ ରାସ୍ତା ନଷ୍ଟ ହୋଇ ଯାଉଛି। ଆଉ କେଉଁଠି ରାସ୍ତାର ଅବସ୍ଥା ଶୋଚନୀୟ ହୋଇ ମରଣ ଯନ୍ତା ପାଲଟି ଧନ ଜୀବନ ହାନି ହେଉଥିଲେ ମଧ୍ୟ ପ୍ରଶାସନ ମରାମତି ପାଇଁ ଗୁରୁତ୍ୱ ଦେଉନଥିବା ଏବଂ ଏଥିପ୍ରତି ଦୃଷ୍ଟି ପଡୁନାହିଁ। ରାସ୍ତା ଅବସ୍ଥା ଶୋଚନୀୟ ହୋଇ ଜନସାଧାରଣ ବହୁ ଅସୁବିଧା ର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି l 

ଏମିତି ଏକ ମରଣ ଯନ୍ତା ପାଲଟି ଥିବା ରାସ୍ତା ଦେଖିବାକୁ ମିଳିଛି ଫିରିଙ୍ଗିଆ ବ୍ଲକ ଲୁଇସିଂ ପଞ୍ଚାୟତର ବୃଡ଼ିପଡ଼ା ଠାରୁ ବାଘପଦର ଦେଇ ରାଇଗୁଡ଼ାକୁ ସଂଯୋଗ କରୁଥିବା ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ l ଏହି ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ସାମିଲ କରିବା ସହ ଗତ ୨୦୧୭ ମସିହାରେ ନିର୍ମାଣ କରାଯାଇଥିଲା। ବର୍ତମାନ ତାହା ପିଚୁ ଉଠି ଖାଲ ଖମାରେ ଭର୍ତି ହେବା ସହ ରାସ୍ତାର ଅଧିକାଂଶ ସ୍ଥାନରେ ଗୋଡ଼ି ବାହାରି ପଡ଼ି ରହିଥିବାରୁ ଜନସାଧାରଣ ହେଉ କି ରାସ୍ତାରେ ଯାଉଥିବା ବାଇକ ଚାଳକ ଯିବା ଆସିବା ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଯାହା ଫଳରେ ଅଧିକାଂଶ ସମୟରେ ବାଇକ ଆରୋହୀ ହେଉ କି ସାଇକେଲ ଆରୋହୀ ଦୁର୍ଘଟଣାର ଶିକାର ହୋଇ ମୃତ୍ୟୁ ବରଣ କରିଥିବା ଭଳି ଅଭାବନୀୟ ଘଟଣାମାନ ଘଟିଛି l 

ଏହି ରାସ୍ତାରେ ପ୍ରତିଦିନ ବିଭିନ୍ନ ବିଦ୍ୟାଳୟ ଓ କଲେଜର ଛାତ୍ରଛାତ୍ରୀଙ୍କ ସମେତ ଶତାଧିକ ଜନସାଧାରଣ ଦୈନିକ ଯିବା ଆସିବା କରୁଛନ୍ତି ଓ ଅସୁବିଧା ର ସମ୍ମୁଖୀନ ହେଉଛନ୍ତି। ତେଣୁ ଏହାକୁ ଦୃଷ୍ଟିରେ ରଖି ତୁରନ୍ତ ପ୍ରଶାସନ ଗୁରୁତ୍ୱ ଦେଇ ରାସ୍ତା ମରାମତି କରିବାକୁ ୮ ରୁ ୯ ଖଣ୍ଡ ଗ୍ରାମବାସୀଙ୍କ ସହ ସ୍ଥାନୀୟ ଅଞ୍ଚଳବାସୀ ଦାବୀ କରିଛନ୍ତି l