ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୂର୍ବତନ ରାଷ୍ଟ୍ରପତି ଜୋ ବାଇଡେନଙ୍କ ପକ୍ଷରୁ କ୍ଷମା ଏବଂ ଅନ୍ୟାନ୍ୟ ଦଲିଲରେ ସ୍ୱାକ୍ଷର କରିବା ପାଇଁ କରାଯାଇଥିବା 'ଅଟୋପେନ' ବ୍ୟବହାରର ତଦନ୍ତ ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ, ଆମେରିକୀୟ ସଂସଦର ନିମ୍ନ ସଦନ ପ୍ରତିନିଧି ସଭାରେ ରିପବ୍ଲିକାନ ପାର୍ଟିର ନେତା ମାନେ ମଧ୍ୟ ବାଇଡେନଙ୍କ ନିକଟତର ସଦସ୍ୟ ମାନଙ୍କୁ ପଚରାଉଚରା କରିବାକୁ ଅନୁରୋଧ କରିଛନ୍ତି।
'ଅଟୋପେନ' ହେଉଛି ଏକ ଯାନ୍ତ୍ରିକ ଉପକରଣ ଯାହା ଜଣେ ବ୍ୟକ୍ତିଙ୍କ ପ୍ରାମାଣିକ ଦସ୍ତଖତକୁ ନକଲ କରିବା ପାଇଁ ବ୍ୟବହୃତ ହୁଏ ଏବଂ ଆମେରିକୀୟ ରାଷ୍ଟ୍ରପତି ମାନେ ଦଶନ୍ଧି ଧରି ଏହାକୁ ବ୍ୟବହାର କରିଆସୁଛନ୍ତି। ଟ୍ରମ୍ପ ଅଭିଯୋଗ କରିଛନ୍ତି ଯେ, ବାଇଡେନଙ୍କ କିଛି କାର୍ଯ୍ୟ ବେଆଇନ୍ ଥିଲା ଏବଂ ତାଙ୍କ ସହଯୋଗୀ ମାନେ ବାଇଡେନଙ୍କ "ଦୁର୍ବଳ ଚିନ୍ତା ଶକ୍ତି"କୁ ଲୁଚାଇବା ପାଇଁ ରାଷ୍ଟ୍ରପତିଙ୍କ କ୍ଷମତାର ଅପବ୍ୟବହାର କରିଥିଲେ।
ଟ୍ରମ୍ପ ଏକ ସ୍ମାରକପତ୍ରରେ ଲେଖିଛନ୍ତି କି, "ଏହି ଷଡ଼ଯନ୍ତ୍ର ଆମେରିକୀୟ ଇତିହାସର ସବୁଠାରୁ ବିପଜ୍ଜନକ ଏବଂ ଚିନ୍ତାଜନକ ଘୋଟାଲା ମଧ୍ୟରୁ ଗୋଟିଏ।" ସେ କହିଛନ୍ତି, "ଏହାକୁ କାର୍ଯ୍ୟନିର୍ବାହୀ କ୍ଷମତା ଧାରଣ କରିଥିବା ଆମେରିକୀୟ ଜନସାଧାରଣଙ୍କ ଠାରୁ ଜାଣିଶୁଣି ଲୁଚାଇ ରଖାଯାଇଥିଲା ଏବଂ ପ୍ରମୁଖ ନୀତି ପରିବର୍ତ୍ତନ କରିବା ପାଇଁ ହଜାର ହଜାର ଦସ୍ତାବିଜରେ ବାଇଡେନଙ୍କ ଦସ୍ତଖତ ବ୍ୟବହାର କରାଯାଇଥିଲା।" ଟ୍ରମ୍ପ ଏହି ତଦନ୍ତ ପାଇଁ ଆଟର୍ଣ୍ଣି ଜେନେରାଲ ପାମ୍ ବଣ୍ଡି ଏବଂ ଆମେରିକା ରାଷ୍ଟ୍ରପତିଙ୍କ ସରକାରୀ ବାସଭବନ ଏବଂ କାର୍ଯ୍ୟାଳୟ ହ୍ୱାଇଟ୍ ହାଉସ୍ ଓକିଲ ଡେଭିଡ୍ ୱାରିଙ୍ଗଟନ୍ ଙ୍କୁ ଦାୟିତ୍ୱ ଦେଇଛନ୍ତି।
ଏହି ସମୟରେ, ଆମେରିକାର ପ୍ରତିନିଧି ସଭାର ମୁଖ୍ୟ ତଦନ୍ତ କମିଟି, ହାଉସ୍ ତଦାରଖ କମିଟିର ଅଧ୍ୟକ୍ଷ ଏବଂ ରିପବ୍ଲିକାନ୍ ନେତା ଜେମ୍ସ କମର୍ ଅଭିଯୋଗ କରିଛନ୍ତି ଯେ ସହଯୋଗୀମାନେ ବାଇଡେନଙ୍କ ସ୍ୱାସ୍ଥ୍ୟ ଅବସ୍ଥାକୁ ଲୁଚାଇବାରେ ସାମିଲ ଥିଲେ, ଯାହା "ଆମ ଦେଶର ଇତିହାସର ସବୁଠାରୁ ବଡ଼ ଦୁର୍ନୀତି ମଧ୍ୟରୁ ଗୋଟିଏ"।
