ପାଟନା: ବିହାରର ଭାଗଲପୁରରେ ଜବରଦଖଲ ଉଚ୍ଛେଦ ସମୟରେ ବଡ଼ ଅଘଟଣ । ରାସ୍ତାକଡ଼ରେ ଫଳ ଦୋକାନ କରିଥିବା ଦୋକାନୀଙ୍କୁ ସେଠାକର ଟ୍ରାଫିକ୍ ଡିଏସପି ଗାଳିଗୁଲଜ କରିଥିଲେ । ସେଥିମଧ୍ୟରୁ ଜଣେ ଫଳ ଦୋକାନୀଙ୍କ ହୃଦଘାତରେ ମୃତ୍ୟୁ ହୋଇଯାଇଛି । ଘଟଣା ପରେ ସହରର ଫଳ ବିକ୍ରେତାମାନେ ରାସ୍ତା ଅବରୋଧ କରିବା ସହ ଜଳାପୋଡ଼ା କରିଛନ୍ତି । ସୂଚନା ପାଇବା ପରେ ପୋଲିସ ଏବଂ ପ୍ରଶାସନର ଉଚ୍ଚ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଇବାକୁ ଚେଷ୍ଟା କରିଛନ୍ତି । ଭାଗଲପୁରର ଜୋଗସର ଥାନା ଅଞ୍ଚଳର ଘଣ୍ଟାଘର ଚୌକରେ ଏହି ଘଟଣା ଘଟିଛି ।
ସେଠାରେ ପ୍ରତିଦିନ ଟ୍ରାଫିକ୍ ଜାମକୁ ଦୃଷ୍ଟିରେ ରଖି ଟ୍ରାଫିକ୍ ପୋଲିସ ଜବରଦଖଲ ହଟାଇବା ପାଇଁ ଏକ ଅଭିଯାନ ଆରମ୍ଭ କରିଥିଲା। ଏହି ସମୟରେ, ଫଳ ବିକ୍ରେତା ମହେନ୍ଦ୍ର ସାଓଙ୍କୁ ରାସ୍ତାରେ ଦୋକାନ କରିଥିବା ଦେଖି, ଟ୍ରାଫିକ୍ ଡିଏସପି ତାଙ୍କୁ ଗାଳିଗୁଲଜ କରିଥିଲେ । ସେ ଅପମାନଜନକ ଭାଷା ମଧ୍ୟ ବ୍ୟବହାର କରିଥିବା ଅଭିଯୋଗ ହୋଇଛି । ଏହା ସହ ଟ୍ରଫିକ୍ ଡିଏସପି ବାଡ଼ ଧରି ତାଙ୍କୁ ଗୋଡ଼ାଇଥିଲେ ।
ଟ୍ରାଫିକ ଡିଏସପିଙ୍କ ବ୍ୟବହାରରେ ଭୟଭୀତ ହୋଇପଡ଼ିବାରୁ ମହେନ୍ଦ୍ର ସାଓଙ୍କ ହୃଦଘାତ ହୋଇଥିଲା । ମୃତ ମହେନ୍ଦ୍ର ସାହୁଙ୍କ ପୁଅ ଦିନେଶ କହିଛନ୍ତି ଯେ, ତାଙ୍କ ବାପାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଘଟଣା ସମ୍ପର୍କରେ ସୂଚନା ପାଇବା ପରେ, ସ୍ଥାନୀୟ ଦୋକାନୀମାନେ ଉତ୍ତ୍ୟକ୍ତ ହୋଇ ଘଣ୍ଟାଘର ଛକରୁ ଷ୍ଟେସନ ପର୍ଯ୍ୟନ୍ତ ମୁଖ୍ୟ ରାସ୍ତାକୁ ଅବରୋଧ କରି ତିନି ଘଣ୍ଟା ଧରି ପ୍ରତିବାଦ କରିଥିଲେ । ଏହି ସମୟରେ ଦୋକାନୀମାନେ ରାସ୍ତାରେ ଟାୟାର, ପ୍ଲାଷ୍ଟିକ ଏବଂ ବାଉଁଶ ଜାଳି ବହୁତ ହଙ୍ଗାମା କରିଥିଲେ ।
ଏହି ସମୟରେ ଦୋକାନୀମାନେ ମୃତ ମହେନ୍ଦ୍ରଙ୍କ ମୃତଦେହକୁ ରାସ୍ତା ମଝିରେ ଏକ ଗାଡ଼ିରେ ମଧ୍ୟ ରଖିଥିଲେ । ସୂଚନା ପାଇ ଭାଗଲପୁର ବିଧାୟକ ଅଜିତ ଶର୍ମା ଅନ୍ୟ ଅଧିକାରୀମାନଙ୍କ ସହିତ ଘଟଣାସ୍ଥଳରେ ପହଞ୍ଚି ପୀଡିତାଙ୍କ ପରିବାରକୁ ନ୍ୟାୟ ପ୍ରଦାନ କରିବାର ପ୍ରତିଶ୍ରୁତି ଦେଇଥିଲେ । ଘଟଣାସ୍ଥଳରେ ଏସଡିଓ ଧନଞ୍ଜୟ କୁମାର ଏବଂ ଡିଏସପି ଅଜୟ ଚୌଧୁରୀ ମଧ୍ୟ ଲୋକଙ୍କୁ ବୁଝାଇବାକୁ ଯଥାସମ୍ଭବ ଚେଷ୍ଟା କରିଥିଲେ । ଶେଷରେ ଏସଡିଓ ଷ୍ଟାମ୍ପ ପେପରରେ ଉପଯୁକ୍ତ କ୍ଷତିପୂରଣ ଦିଆଯିବ ବୋଲି ଲେଖିବାରୁ ଆନ୍ଦୋଳନ ଥମିଥିଲା । ପରେ ମୃତଦେହକୁ ପୋଷ୍ଟମର୍ଟମ ପାଇଁ ପଠାଯାଇଥିଲା ।
