ଭୁବନେଶ୍ୱର,୨୪/୦୫: ବିଗିଡ଼ିଯିବ ମୌସୁମୀ ପ୍ରବାହ । ଅନିୟମିତ ହେବ ବର୍ଷା । ସବୁଠାରୁ ଗମ୍ଭୀର ପ୍ରଭାବ ପଡ଼ିବ ଜୁଲାଇ, ଅଗଷ୍ଟ ମାସରେ । ଏହି ସମୟରେ ବର୍ଷା ପରିମାଣ କମିଯାଇପାରେ ।
ଏମିତି ସ୍ଥିତି ଆସିଲେ ଚାଷ ଉପରେ ସାଧିବ ଦାଉ । ରୁଆ, ବେଉଷଣବେଳକୁ ମୌସୁମୀ ବର୍ଷା ନିଅଣ୍ଟିଆ ରହିପାରେ । ମୌସୁମୀ ଋତୁରେ ବି ଅସ୍ୱାଭାବିକ ଭାବେ ତାପମାତ୍ରା ବୃଦ୍ଧି ଘଟିବ ।
ଶୀତ ହଜିଯିବ । ଶୀତ ଋତୁ ବି ତତଲା ରହିପାରେ । ସମ୍ଭାବ୍ୟ ସୁପର ଏଲ୍-ନିନୋ ସ୍ଥିତିର ଏଭଳି ସାଂଘାତିକ ପ୍ରଭାବ ପଡ଼ିପାରେ ଓଡ଼ିଶାରେ । ଏଭଳି ଆଶଙ୍କା କରିଛନ୍ତି କୃଷି ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ । ସେ କହିଛନ୍ତି, ଏବେଠାରୁ କିଛି ସ୍ପଷ୍ଟ କୁହାଯାଇପାରିବ ନାହିଁ । ଜୁନ୍ ବେଳକୁ ଚିତ୍ର ଅଧିକ ସ୍ପଷ୍ଟ ହୋଇପାରେ ।
ବିଭିନ୍ନ ତଥ୍ୟକୁ ଆଧାର କରି ପ୍ରଫେସର ପଶୁପାଳକ ଦର୍ଶାଇଛନ୍ତି, ସୁପର ଏଲ୍-ନିନୋ ପ୍ରଭାବରେ ମୌସୁମୀ ପବନ ଦୁର୍ବଳ ହେବା ସହ ଭାରତୀୟ ମହାସାଗରରେ ପ୍ରତିକୂଳ ବାୟୁର ଗତି ରହିବ । ପଶ୍ଚିମ ଓ ଆଭ୍ୟନ୍ତରୀଣ ଓଡ଼ିଶାର ବଲାଙ୍ଗୀର, କଳାହାଣ୍ଡି, ନୂଆପଡ଼ା ଖରା ପ୍ରକୋପ ଦୀର୍ଘ ଦିନ ଧରି ରହିପାରେ । ଭୂତଳ ଜଳସ୍ତର ହ୍ରାସ ଓ ପାଣି ସଙ୍କଟ ଦେଖା ଦେଇପାରେ । ଉପକୂଳ ଓଡ଼ିଶାର ଗଞ୍ଜାମ, ପୁରୀ, କଟକ, ବାଲେଶ୍ୱରରେ ଲଘୁଚାପ ପ୍ରଭାବରେ ଆଂଶିକ ବର୍ଷା ରହିବ । ହେଲେ ବାୟୁମଣ୍ଡଳରେ ପ୍ରବଳ ଗୁଳୁଗୁଳି ଅନୁଭୂତ ହୋଇପାରେ । ବର୍ଷାଭାବରୁ ଚାଷ କାମରେ ବଡ଼ ବ୍ୟାଘାତ ଦେଖା ଦେଇପାରେ ।
ପ୍ରଫେସର ପଶୁପାଳକ କହିଛନ୍ତି, ଏଲ୍-ନିନୋ ବର୍ଷଗୁଡ଼ିକରେ ସାରା ଭାରତରେ ଯେଉଁଭଳି ପରିସ୍ଥିତି ହୁଏ, ଓଡ଼ିଶାରେ ସବୁବେଳେ ସେମିତି ହୁଏ ନାହିଁ । କେତେକ ଏଲ୍ନିନୋ ବର୍ଷରେ ବିଶେଷ କରି ପଶ୍ଚିମ ଓଡ଼ିଶା ଜିଲ୍ଲାଗୁଡ଼ିକରେ ଭୟଙ୍କର ମରୁଡ଼ି ଓ ଜଳାଭାବ ଦେଖାଦେଇଛି । ଆଉ କେତେକ ବର୍ଷରେ ମୌସୁମୀ ଦୁର୍ବଳ ଥିଲେ ମଧ୍ୟ ଲଘୁଚାପ ଯୋଗୁ ଓଡ଼ିଶା ବଡ଼ ମରୁଡ଼ି ଦାଉରୁ ରକ୍ଷା ପାଇଯାଇଛି । ଭାରତର ଅନ୍ୟ ଅଞ୍ଚଳ ତୁଳନାରେ ଓଡ଼ିଶାର ସ୍ଥିତି ସ୍ୱତନ୍ତ୍ର । ମଧ୍ୟ ଓ ପଶ୍ଚିମ ଭାରତର ରାଜ୍ୟଗୁଡ଼ିକ କେବଳ ଆରବ ସାଗରରୁ ଆସୁଥିବା ମୌସୁମୀ ପବନ ଉପରେ ସମ୍ପୂର୍ଣ୍ଣ ନିର୍ଭର କରନ୍ତି । କିନ୍ତୁ ଓଡ଼ିଶା ମୌସୁମୀ ସହ ବଙ୍ଗୋପସାଗରୀୟ ଲଘୁଚାପ, ମୌସୁମୀ ଅକ୍ଷରେଖାର ଗତି ଏବଂ ସ୍ଥାନୀୟ କାଳବୈଶାଖୀ ବର୍ଷାରେ ଉପକୃତ ହୋଇଥାଏ । ଏହି କାରଣରୁ ଏଲ୍ନିନୋ ସମୟରେ ଓଡ଼ିଶାର ସବୁ ଜିଲ୍ଲାରେ ସମାନ ପରିସ୍ଥିତି ଦେଖାଯାଏ ନାହିଁ ।
ତେବେ ୧୯୮୨, ୧୯୮୭, ୨୦୦୨ ଏବଂ ୨୦୦୯ ଏଲ୍-ନିନୋ ବର୍ଷରେ ଓଡ଼ିଶା ଭୟଙ୍କର ମରୁଡ଼ି ଭୋଗିଥିଲା । ପ୍ରାୟ ସବୁ ଜିଲ୍ଲାରେ ବର୍ଷା ଅଭାବ ସହ ପଶ୍ଚିମ ଓଡ଼ିଶାର ଗ୍ରାମୀଣ ଅର୍ଥନୀତି ଭାଙ୍ଗି ପଡ଼ିଥିଲା । ୨୦୦୨ ମସିହା ଆଧୁନିକ ଓଡ଼ିଶା ପାଇଁ ସବୁଠାରୁ ଭୟାନକ ମରୁଡ଼ି ବର୍ଷ ଥିଲା । ଜୁଲାଇ ଏବଂ ଅଗଷ୍ଟ ଭଳି ମୁଖ୍ୟ ବର୍ଷା ମାସରେ ସପ୍ତାହ ସପ୍ତାହ ଧରି ଆଦୌ ବର୍ଷା ହୋଇନଥିଲା । ନଦୀ-ନାଳ, ଡ୍ୟାମ୍ ଶୁଖିଗଲା । ଧାନ ରୁଆ ଏବଂ ବେଉଷଣ ସମୟରେ ବର୍ଷା ନହେବାରୁ ଚାଷୀ ବଡ଼ କ୍ଷତି ସହିଥିଲେ । ୨୦୦୯ରେ ଶକ୍ତିଶାଳୀ ଏଲ୍ନିନୋ ବର୍ଷରେ ଓଡ଼ିଶାରେ ଜଳାଶୟଗୁଡ଼ିକର ଜଳସ୍ତର ବହୁତ କମିଯାଇଥିଲା । ପଶ୍ଚିମ ଓଡ଼ିଶାରେ ପିଇବା ପାଣି ପାଇଁ ହାହାକାର ସ୍ଥିତି ଦେଖା ଦେଇଥିଲା । ପ୍ରବଳ ତାତି, ମରୁଡ଼ି ଦେଖା ଦେଇଥିଲା ।
ତେବେ ୨୦୦୪, ୨୦୧୪ ଓ ୨୦୧୫ ଭଳି ଏଲ୍ନିନୋ ବର୍ଷରେ ରାଜ୍ୟରେ ଆଂଶିକ ପ୍ରଭାବ ପଡ଼ିଥିଲା । ଦୀର୍ଘ ଦିନ ଧରି ବର୍ଷା ନହେବାରୁ କେତେକୂ ଜିଲ୍ଲାରେ ଗଜା ମରୁଡ଼ି ସ୍ଥିତି ଉପୁଜିଥିଲା । ଏହି ବର୍ଷଗୁଡ଼ିକରେ ବିଶେଷ କରି ଉପକୂଳ ଓଡ଼ିଶାରେ ପ୍ରବଳ ଗୁଳୁଗୁଳି ଓ ଗରମ ଅନୁଭୂତ ହାଇଥିଲା । ହେଲେ ୧୯୯୭-୯୮ ସୁପର ଏଲ୍ନିନୋ ବର୍ଷରେ ଲଘୁଚାପଜନିତ ବର୍ଷା ଯୋଗୁ ଓଡ଼ିଶାରେ ଭଲ ବର୍ଷା ହୋଇଥିଲା । ଏଲ୍-ନିନୋ ବର୍ଷରେ ବଙ୍ଗୋପସାଗରରେ ବାତ୍ୟା ସଂଖ୍ୟା ସାଧାରଣ ଅପେକ୍ଷା କିଛି ମାତ୍ରାରେ କମିପାରେ । କିନ୍ତୁ ବାତ୍ୟାର ଭୟ ସମ୍ପୂର୍ଣ୍ଣ ଦୂର ହୁଏନାହିଁ । ବଙ୍ଗୋପସାଗର ପାଣି ସବୁବେଳେ ଗରମ ରହୁଥିବାରୁ, ଯଦି କୌଣସି ସମୟରେ ଆକାଶର ପବନ ଅନୁକୂଳ ହୋଇଯାଏ, ତେବେ ହଠାତ୍ ସାଧାରଣ ଲଘୁଚାପ ମଧ୍ୟ ଭୟଙ୍କର ବାତ୍ୟାର ରୂପ ନେଇ ଓଡ଼ିଶା ଉପକୂଳ ମୁହାଁଇପାରେ । ଏଲ୍-ନିନୋ ଶୀତ ଦିନକୁ ମଧ୍ୟ ପ୍ରଭାବିତ କରେ । ଓଡ଼ିଶାର ଆଭ୍ୟନ୍ତରୀଣ ଜିଲ୍ଲାଗୁଡ଼ିକରେ ଶୀତ କମିପାରେ । କିନ୍ତୁ ବଢ଼ିପାରେ କୁହୁଡ଼ି । ଏଲ-ନିନୋ ପ୍ରଭାବ ୨୦୨୭ର ପ୍ରଥମ ୬ ମାସ ପର୍ଯ୍ୟନ୍ତ ରହିପାରେ । ତେଣୁ ଆଗାମୀ ବର୍ଷର ଜଳ ପରିଚାଳନା ଆହୁରି ଚିନ୍ତାଜନକ ହୋଇପାରେ ।
ଅଧିକ ପଢ଼ନ୍ତୁ :- Super el nino: ‘ସୁପର ଏଲ୍ ନିନୋ’କୁ ନେଇ ସତର୍କବାଣୀ, ମାଡ଼ି ଆସିବ ବିନାଶ, ବିଗିଡିବ ଜଳବାୟୁ, ଭାରତରେ ଦୁର୍ବଳ ପାଲଟିବ ମୌସୁମୀ
ପାଣିପାଗ ବୈଜ୍ଞାନିକ ବିଶ୍ୱଜିତ ସାହୁ କହିଛନ୍ତି, ଚଳିତବର୍ଷ ଏଲ୍ନିନୋ ପ୍ରଭାବ ଆରମ୍ଭ ହୋଇସାରିଲାଣି । ଏଥର ସୁପର ଏଲ୍ନିନୋ ପ୍ରଭାବ ପଡ଼ିବା ନିଶ୍ଚିତ । ଓଡ଼ିଶାରେ ଏହାର ପ୍ରଭାବରେ ମୌସୁମୀ ବର୍ଷା ଅନିୟମିତ ରହିପାରେ । ଅନୁମାନ କରାଯାଉଛି, ଉତ୍ତର ଓଡ଼ିଶାରେ ବର୍ଷା ସ୍ୱାଭାବିକ ରହିପାରେ । କିନ୍ତୁ, ଦକ୍ଷିଣ ଏବଂ ପଶ୍ଚିମ ଓଡ଼ିଶାରେ ବର୍ଷା କମିପାରେ । କେତେକ ଜିଲ୍ଲାରେ ମରୁଡ଼ି ପ୍ରଭାବ ଦେଖିବାକୁ ମିଳିପାରେ । ବର୍ଷା କେଉଁଠି କମ୍ ସମୟରେ ଅତ୍ୟଧିକ ତ ଆଉ କେଉଁଠି ଶୁଖିଲା ରହିପାରେ । ମଝିରେ ମଝିରେ ମୌସୁମୀ ବର୍ଷା ହଜିଯାଇପାରେ । ଶୀତରେ ବି ଗରମ ଅନୁଭୂତ ହୋଇପାରେ । ୨୦୨୭ରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ରହିପାରେ ।
