କଟକ/ବାରଙ୍ଗ/ନରାଜ,୦୧/୧୧: ସତୁରୀ ବର୍ଷର ଜଣେ ବୃଦ୍ଧ, ନିଜ ପୁଅ-ବୋହୂଙ୍କ ଦେହରେ ପେଟ୍ରୋଲ୍ ଢାଳି ନିଆଁ ଲଗାଇ ଦେଇଛି । କାଳେ ଦୁହେଁ ନିଆଁରୁ ବର୍ତ୍ତିଯିବେ, ସେଥିପାଇଁ ଘର କବାଟକୁ ବାହାରପଟୁ ବନ୍ଦ ବି କରିଦେଇଛି । ପତି-ପତ୍ନୀ ଦୁହିଙ୍କ ଚିତ୍କାର ଶୁଣି ପଡ଼ୋଶୀମାନେ ଆସି ଗୁରୁତର ଅବସ୍ଥାରେ ସେମାନଙ୍କୁ ଉଦ୍ଧାର କରି ଏସ୍ସିବି ମେଡିକାଲ୍ ପଠାଇଛନ୍ତି । ଅଭିଯୁକ୍ତ ବାପାକୁ ପୁଲିସ ଘର ଛାତ ଉପରୁ ଧରି ଅଟକ ରଖିଛି । ଏଭଳି ଏକ ଅମାନୁଷିକ, ହୃଦୟଥରା ଅପରାଧ ଘଟିଛି କଟକ ଜିଲ୍ଲା ବାରଙ୍ଗ ଥାନା ଗୋଡ଼ିସାହି ଅନ୍ତର୍ଗତ ବାରସିଂଗା ଗ୍ରାମରେ ।
ଏହି ଗ୍ରାମର ଗୋବର୍ଦ୍ଧନ ରାଉତ(୭୦)ଙ୍କ ପତ୍ନୀଙ୍କର ଦେହାନ୍ତ ହୋଇଯାଇଛି । ଗୋବର୍ଦ୍ଧନ ନିକଟସ୍ଥ ବଜାରରେ ଏକ ଛୋଟ ଦୋକାନ କରିଛନ୍ତି । ଘରେ ତାଙ୍କ ବୁଢ଼ୀ ମା’, ପୁଅ ଦୀନବନ୍ଧୁ ରାଉତ(୪୪), ବୋହୂ ପୂଜା ଓରଫ ସସ୍ମିତା ରାଉତ(୨୭) ଓ ୫ ବର୍ଷର ନାତି ରହନ୍ତି । ତେବେ ଗତ କିଛି ଦିନ ହେବ ପୁଅ ଦୀନବନ୍ଧୁ ଓ ବୋହୂ ପୂଜାଙ୍କ ସହିତ ଗୋବର୍ଦ୍ଧନଙ୍କର ମନାନ୍ତର ଓ ବିବାଦ ଚାଲିଥିଲା । ଗ୍ରାମବାସୀଙ୍କ କହିବାନୁସାରେ ଗୋବର୍ଦ୍ଧନ ଅନେକ ସମୟରେ ମଦ, ଗଞ୍ଜେଇ ସେବନ କରନ୍ତି । ପତ୍ନୀଙ୍କ ମୃତ୍ୟୁ ପରେ ଗୋବର୍ଦ୍ଧନ ଦ୍ୱିତୀୟ ବିବାହ କରିବାକୁ ଚାହୁଁଥିଲେ । ହେଲେ ଏହାକୁ ପୁଅ- ବୋହୂ ଓ ବାହା ହୋଇଯାଇଥିବା ଝିଅ ବିରୋଧ କରିଥିଲେ । ଯାହାକୁ ନେଇ ଘରେ ବିବାଦୀୟ ପରିସ୍ଥିତି, ଉଚ୍ଚବାଚ, କଳିଗୋଳ ଲାଗି ରହିଥିଲା ।
ଶନିବାର ରାତି ପ୍ରାୟ ସାଢ଼େ ୯ଟା ହେବ । ପୁଅ ଦୀନବନ୍ଧୁ ଓ ବୋହୂ ପୂଜା ଘରେ ବସି ଖାଉଥିଲେ । ଅନ୍ୟ ଏକ ଘରେ ଗୋବର୍ଦ୍ଧନର ମା’ ତାର ଅଣନାତି ଅର୍ଥାତ ଦୀନବନ୍ଧୁଙ୍କ ୫ ବର୍ଷର ପୁଅକୁ ନେଇ ଶୋଇଥିଲେ । ହଠାତ୍ ଗୋବର୍ଦ୍ଧନ ଏକ ଜରିରେ କିଛି ପେଟ୍ରୋଲ୍ ଭର୍ତ୍ତି କରି ଆଣି ଦୀନବନ୍ଧୁ ଓ ପୂଜାଙ୍କ ଉପରକୁ ପକାଇ ହାତରେ ଧରିଥିବା ନିଆଁ ହୁଳାରେ ନିଆଁ ଲଗାଇ ତୁରନ୍ତ କବାଟ ବନ୍ଦ କରି ଦେଇଥିଲା । ଦୁହେଁ ଭିତରେ ଜଳିବାକୁ ଲାଗିବାରୁ ପୁଣି ହାତରେ ଧରିଥିବା କିଛି ପେଟ୍ରୋଲ୍କୁ ଦୁହିଙ୍କ ଉପରକୁ ଝରକା ବାଟେ ଛାଟିଦେଇଥିଲା । ଘରେ ପତି-ପତ୍ନୀ ଦୁହେଁ ହୁତୁହୁତୁ ହୋଇ ଜଳୁଥିବା ବେଳେ ଗୋବର୍ଦ୍ଧନ ସେଠାରୁ ପଳାଇ ଯାଇଥିଲା । ଏହା ଭିତରେ ଦୀନବନ୍ଧୁ ଓ ପୂଜାଙ୍କ ଚିତ୍କାର ଶୁଣି ପଡ଼ୋଶୀମାନେ ଆସି କବାଟ ଖୋଲି ଦୁହିଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଆମ୍ବୁଲାନ୍ସ ଯୋଗେ ଏସ୍ସିବି ସ୍ଥାନାନ୍ତର କରିଥିଲେ ।
ଅନ୍ୟପଟେ ସୂଚନା ପାଇ ବାରଙ୍ଗ ପୁଲିସ ଓ ବାରଙ୍ଗ ଫାଣ୍ଡି ଅଧିକାରୀ ବିଚିତ୍ରାନନ୍ଦ ପ୍ରଧାନ ପହଞ୍ଚି ଘରେ ଖୋଜାଖୋଜି କରିଥିଲେ । ଛାତ ଉପରେ ଖୋଜିବା ପରେ ସେଠାରୁ ଗୋବର୍ଦ୍ଧନକୁ ଠାବ କରାଯାଇଥିଲା । ତାକୁ ବାରଙ୍ଗ ଥାନାକୁ ନେଇ ଅଟକ ରଖି ପୁଲିସ ପଚରାଉଚରା କରିଥିଲା । ନିଆଁ ଲଗାଇବା ବେଳେ ଗୋବର୍ଦ୍ଧନ ସାମାନ୍ୟ ଆହତ ହୋଇଥିବାରୁ ତାକୁ ମଧ୍ୟ ଏସ୍ସିବି ପଠାଯାଇଛି । ଦୀନବନ୍ଧୁ ଓ ପୂଜାଙ୍କ ଅବସ୍ଥା ଗୁରୁତର ଥିବା ଏସ୍ସିବି ଡାକ୍ତର ସୂଚନା ଦେଇଛନ୍ତି । ଏହି ଘଟଣା ପଛର ପ୍ରକୃତ କାରଣ ଜଣା ପଡ଼ିନଥିଲେ ବି ପୂର୍ବ ବିବାଦ ପାଇଁ ଯୋଜନାବଦ୍ଧ ଭାବେ ଗୋବର୍ଦ୍ଧନ ଏହି ଅମାନୁଷିକ କାଣ୍ଡ ଭିଆଇଥିବା ପୁଲିସ ଓ ଗ୍ରାମବାସୀ ଆଶଙ୍କା କରୁଛନ୍ତି । ଘଟଣାଟି ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି । ଖାଲି ସେତିକି ନୁହେଁ, ଗୋବର୍ଦ୍ଧନର ଏପରି ଅମାନବୀୟ କାଣ୍ଡକୁ ନେଇ ବାରସିଙ୍ଗା ଗ୍ରାମରେ ଲୋକଙ୍କ ଭିତରେ ଆକ୍ରୋଶ ଦେଖିବାକୁ ମିଳିିଛି।
