ମାଲକାନଗିରି, ୨୨/୧୧ : ଭୁସୁଡୁଛି ଲାଲଗଡ଼। ନିପାତ ହେଉଛି ଲାଲବାହିନୀ। ମାଲକାନଗିରି ଛତିଶଗଡ଼ ସୀମାନ୍ତ ସୁକମା ଜିଲ୍ଲାରେ ବଡ଼ ଧରଣର ଅପରେସନ। ଭେଜି ଜଙ୍ଗଲରେ ମାଓବାଦୀ ଓ ସୁରକ୍ଷାବାହିନୀ ମୁହାଁମୁହିଁ। ଏନକାଉଣ୍ଟରରେ ୧୦ ମାଓବାଦୀ ସଫା। ଘଟଣାସ୍ଥଳରୁ ୩ଟି ଅଟୋମେଟିକ୍ ରାଇଫଲ୍ ସହ ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ।
ସୂଚନାନୁଯାୟୀ, ମାଓବାଦୀମାନେ ଓଡ଼ିଶା ଦେଇ ଛତିଶଗଡ଼ରେ ପ୍ରବେଶ କରୁଥିବା ନେଇ ସୁରକ୍ଷାବାହିନୀକୁ ଗୁଇନ୍ଦା ସୂତ୍ରରୁ ସୂଚନା ମିଳିଥିଲା। ଏହାପରେ ଡିଆରଜି ବାହିନୀ ସୁକମା ଜିଲ୍ଲାର ଭେଜି ଜଙ୍ଗଲରେ ସର୍ଚ୍ଚ ଅପରେସନ ଆରମ୍ଭ କରିଥିଲା। ଶୁକ୍ରବାର ସକାଳେ ମାଓବାଦୀମାନେ ସୁରକ୍ଷାବାହିନୀ ଉପରକୁ ଗୁଳି ଚଳାଇଥିଲେ। ଫଳରେ ସୁରକ୍ଷାବାହିନୀ ଏହାର ପାଲଟା ଜବାବ ଦେଇଥିଲା। ଏହି ଏନକାଉଣ୍ଟରରେ ୧୦ ଜଣ ମାଓବାଦୀ ନିପାତ ହୋଇଛନ୍ତି। ଘଟଣାସ୍ଥଳରୁ ୩ଟି ଅଟୋମେଟିକ୍ ରାଇଫଲ୍, ଏକେ-୪୭ ଏବଂ ଅନ୍ୟ ଅସ୍ତ୍ରଶସ୍ତ୍ର ଜବତ ହୋଇଛି। ଘଟଣାସ୍ଥଳରେ ସର୍ଚ୍ଚ ଅପରେସନ ଜାରି ରହିଛି। ମାଓବାଦୀମାନେ ଛତ୍ରଭଙ୍ଗ ଦେଇଛନ୍ତି। ଏନେଇ ସୁକମା ଏସପି ସୂଚନା ଦେଇଛନ୍ତି।
