ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ଶୋପିଆନ ଜିଲ୍ଲାରେ ମଙ୍ଗଳବାର ସୁରକ୍ଷାକର୍ମୀଙ୍କ ସହ ଏକ ମୁହାଁମୁହିଁ ଗୁଳିବିନିମୟରେ ଜଣେ ଆତଙ୍କବାଦୀ ନିହତ ହୋଇଛନ୍ତି। ସୂଚନା ଅନୁଯାୟୀ, ଶୋପିଆନର ଜିନପାଥର କେଲର ଅଞ୍ଚଳରେ ଏହି ଏନକାଉଣ୍ଟର ହୋଇଥିଲା। ଯେଉଁଠାରେ ଆହୁରି ଦୁଇ ଜଣ ଆତଙ୍କବାଦୀ ଫସିଥିବା ସନ୍ଦେହ କରାଯାଉଛି।
ସୂଚନା ମୁତାବକ, ଭାରତୀୟ ସେନାର ରାଷ୍ଟ୍ରୀୟ ରାଇଫଲ୍ସ ଇଉନିଟରୁ ମିଳିଥିବା ନିର୍ଦ୍ଦିଷ୍ଟ ଗୁଇନ୍ଦା ସୂଚନା ଆଧାରରେ ସେନା ଏହି ଅଞ୍ଚଳରେ ଏକ ସର୍ଚ ଆଣ୍ଡ ଡିଷ୍ଟ୍ରୟ ଅପରେସନ ଆରମ୍ଭ କରିଥିଲା। ଅପରେସନ ସମୟରେ ଆତଙ୍କବାଦୀମାନେ ସୁରକ୍ଷାକର୍ମୀଙ୍କ ଉପରେ ଭାରୀ ଗୁଳିବର୍ଷଣ କରିଥିଲେ। ଯାହାର ଜବାବରେ ଭାରତୀୟ ସେନା ମଧ୍ୟ ତୀବ୍ର ଗୁଳିବିନିମୟ କରିଥିଲା। ଏହି ଗୁଳିବିନିମୟରେ ଜଣେ ଆତଙ୍କବାଦୀ ନିହତ ହୋଇଥିବା ବେଳେ ଅନ୍ୟ ଦୁଇ ଜଣ ଏବେ ମଧ୍ୟ ସେହି ଅଞ୍ଚଳରେ ଫସିଥିବା ଆଶଙ୍କା କରାଯାଉଛି।
ସୂତ୍ର ଅନୁଯାୟୀ, ନିହତ ଆତଙ୍କବାଦୀ ଲସ୍କର-ଏ-ତୋଇବା ସଙ୍ଗଠନ ସହ ଜଡ଼ିତ ଥିଲେ। ଏହି ଏନକାଉଣ୍ଟର ପରେ ଅଞ୍ଚଳଟିକୁ ସମ୍ପୂର୍ଣ୍ଣ ଘେରାବନ୍ଦୀ କରାଯାଇ ଅଧିକ ସର୍ଚ ଅପରେସନ ଜାରି ରଖାଯାଇଛି। ଆତଙ୍କୀ ସଂଗଠନ ଉକ୍ତ ଅଞ୍ଚଳରେ ସକ୍ରିୟ ରହିଥିବା ବେଳେ ସେନା ପକ୍ଷରୁ ଏନକାଉଣ୍ଟର ଜାରି ରହିଛି। ସୁରକ୍ଷା ଦୃଷ୍ଟିରୁ ଉକ୍ତ ଅଞ୍ଚଳରେ ଅଧିକ ସୁରକ୍ଷାକର୍ମୀ ମୁତୟନ କରାଯାଇଛି। ଏହାଛଡା ସୁରକ୍ଷା ବାହିନୀ ଅନ୍ୟ ଫସିଥିବା ଆତଙ୍କବାଦୀଙ୍କୁ ଖୋଜି ବାହାର କରିବା ପାଇଁ ଜୋରଦାର ଅପରେସନ ଜାରି ରଖିଛନ୍ତି।
ଏହି ଅପରେସନ ଏପ୍ରିଲ ୨୨ ତାରିଖରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଆରମ୍ଭ ହୋଇଥିବା ‘ଅପରେସନ ସିନ୍ଦୁର’ର ଏକ ଅଂଶ ବୋଲି କୁହାଯାଉଛି। ପହଲଗାମ ଆକ୍ରମଣରେ ୨୬ ଜଣ ନିରୀହ ନାଗରିକ ପ୍ରାଣ ହରାଇଥିଲେ। ଏହାର ଜବାବରେ ଭାରତ ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀରରେ ଆତଙ୍କବାଦୀ ଭିତ୍ତିଭୂମି ଉପରେ ଏୟାରଷ୍ଟ୍ରାଇକ କରିଥିଲା।
