ନୂଆଦିଲ୍ଲୀ,୦୩/୦୫:  ଟିକଟକ ଉପରେ ଜରିମାନା ଲଗାଇଲା ୟୁରୋପୀୟ ସଂଘ ।  ୫୩୦  ନିୟୁତ ୟୁରୋର ତଣ୍ଡ ଗଣିବ ଟିକଟକ । ୪ ବର୍ଷର ତଦନ୍ତ ପରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି ୟୁରୋପୀୟ ସଂଘ ।  ଟିକଟକ୍ ୟୁରୋପୀୟ ୟୁନିଅନ ଗୋପନୀୟତା ନୀତି ଉଲ୍ଲଂଘନ କରି ୟୁରୋପୀୟ ୟୁଜର୍ସଙ୍କ ବ୍ୟକ୍ତିଗତ ତଥ୍ୟ ଚୀନକୁ ପଠାଇ ଥିବାରୁ  ୟୁରୋପୀୟ ସଂଘ ଏହି ଜରିମାନା ଲଗାଇଛି। 

ଟିକଟକର ୟୁରୋପୀୟ ମୁଖ୍ୟାଳୟ ଡବଲିନରେ ଅବସ୍ଥିତ। ଏନେଇ ଆୟରଲ୍ୟାଣ୍ଡର ଡାଟା ପ୍ରୋଟେକ୍ସନ କମିଶନ ତଦନ୍ତର ନେତୃତ୍ୱ ନେଇଥିଲେ। କମିଶନ ଏହା ମଧ୍ୟ କହିଛନ୍ତି ଯେ, ଟିକଟକ ୟୁଜର୍ସମାନଙ୍କୁ ସ୍ପଷ୍ଟ କରୁନଥିଲା ଯେ ସେମାନଙ୍କର ତଥ୍ୟ କେଉଁଠାକୁ ପଠାଯାଉଛି ଏବଂ ଏହାକୁ କିପରି ପ୍ରକ୍ରିୟାକରଣ କରାଯାଉଛି। ଅନ୍ୟପଟେ ଟିକଟକ ଏହି ନିଷ୍ପତ୍ତି ସହିତ ଅସହମତି ପ୍ରକାଶ କରିଛି ଏବଂ ଏହା ବିରୁଦ୍ଧରେ ଅପିଲ କରିବ ବୋଲି କହିଛି। କମ୍ପାନୀ ଏକ ବ୍ଲଗ୍ ପୋଷ୍ଟରେ କହିଛି ଯେ, ତଦନ୍ତ ଅବଧି ୨୦୨୩ ମେ ମାସରେ ଶେଷ ହୋଇଥିଲା, ସେହି ସମୟରେ କମ୍ପାନୀ 'ପ୍ରୋଜେକ୍ଟ କ୍ଲୋଭର' ନାମକ ଏକ ଡାଟା ସ୍ଥାନୀୟକରଣ ପ୍ରକଳ୍ପ ଆରମ୍ଭ କରିଥିଲା, ଯାହା ଅଧୀନରେ ୟୁରୋପରେ ତିନୋଟି ଡାଟା ସେଣ୍ଟର ନିର୍ମାଣ କରାଯାଉଛି।"

ପ୍ରୋଜେକ୍ଟ କ୍ଲୋଭରର ଅଂଶ ଭାବରେ, ଆମେ ଶିଳ୍ପରେ ସବୁଠାରୁ କଠୋର ଡାଟା ସୁରକ୍ଷା ପଦକ୍ଷେପ କାର୍ଯ୍ୟକାରୀ କରିଛୁ ଏବଂ ୟୁରୋପୀୟ ସାଇବର ସୁରକ୍ଷା ଫାର୍ମ NCC ଗ୍ରୁପ୍ ଠାରୁ ଆମର କାର୍ଯ୍ୟର ସ୍ୱାଧୀନ ତଦାରଖ କରିଛୁ ବୋଲି ଟିକଟକର ୟୁରୋପୀୟ ପବ୍ଲିକ୍ ପଲିସି ମୁଖ୍ୟ କ୍ରିଷ୍ଟିନ୍ ଗ୍ରାନ୍ କହିଛନ୍ତି। ତେବେ ଟିକଟକ୍ ଦାବି କରିଛି ଯେ, ୟୁରୋପୀୟ ଉପଭୋକ୍ତାଙ୍କ ତଥ୍ୟ ସେୟାର କରିବା ପାଇଁ ଚୀନ ସରକାରଙ୍କଠାରୁ ଏହାକୁ କେବେ ଅନୁରୋଧ କରାଯାଇ ନାହିଁ ଏବଂ ଏହା କେବେ କରିନାହିଁ। ତଦନ୍ତରୁ ଏହା ମଧ୍ୟ ଜଣାପଡିଛି ଯେ TikTokର ପୁରୁଣା ଗୋପନୀୟତା ନୀତିରେ ୟୁଜର୍ସଙ୍କ ତଥ୍ୟ ଚୀନ୍ ଭଳି ତୃତୀୟ ଦେଶକୁ ପଠାଯାଉଥିବା କଥା ଉଲ୍ଲେଖ କରାଯାଇ ନାହିଁ।