କେନ୍ଦୁଝର,୨୨/୦୩: ଦୁଇ ଜଣ ପୂର୍ବତନ ଏମ୍ପି ଦଳ ଛାଡି କଂଗ୍ରେସରେ ଯୋଗ ଦେଇଥିବା ବେଳେ ପୁଣି ୨ ଜଣ ପୂର୍ବତନ ବିଧାୟକ କଂଗ୍ରେସରେ ଯୋଗ ଦେବାକୁ ଯାଉଛନ୍ତି । ଏହି ଦୁଇ ଜଣ ହେଲେ କେନ୍ଦୁଝର ସଦର ପୂର୍ବତନ ବିଜେଡି ବିଧାୟକ ସୁବର୍ଣ୍ଣ ନାଏକ ଓ ତେଲକୋଇର ପୂର୍ବତନ ବିଧାୟକ ପ୍ରାଣବଲ୍ଲଭ ନାଏକ ।
ଇଂ ସୁବର୍ଣ୍ଣ ନାଏକ ୨୦୦୯ରେ ଇଞ୍ଜିନିୟରିଂ ଚାକିରି ଛାଡି ବିଜେଡି ପ୍ରାର୍ଥୀ ହୋଇ ବିଜୟୀ ହୋଇଥିଲେ । ସୁବର୍ଣ୍ଣଙ୍କ ପତ୍ନୀ ପ୍ରତିଭା ମଞ୍ଜରୀ ମଧ୍ୟ ଝୁମ୍ପୁରା ବ୍ଲକ ଅଧ୍ୟକ୍ଷା ହେବା ସହିତ ପରବର୍ତ୍ତୀ ସମୟରେ ଜିଲ୍ଲା ପରିଷଦ ସଦସ୍ୟା ଭାବେ ନିର୍ବାଚିତ ହୋଇଥିଲେ । ୨୦୧୪ କିମ୍ବା ୨୦୧୯ରେ ବିଜେଡିରୁ ଟିକଟ୍ ଆବେଦନ କରିଥିଲେ ମଧ୍ୟ ତାଙ୍କୁ ପ୍ରାର୍ଥୀ କରାଯାଇନଥିଲା । ଗତ ନିର୍ବାଚନରେ ସୁବର୍ଣ୍ଣ ସ୍ୱାଧୀନ ପ୍ରାର୍ଥୀ ଭାବେ ଲଢ଼ିବାରୁ ଭୋଟ ବିଭାଜନ ଯୋଗୁ ବିଜେଡି ପ୍ରାର୍ଥୀ ମାତ୍ର ୧୨ ଶହ ଭୋଟରେ ପରାଜିତ ହୋଇଥିଲେ । ଏଥର ମଧ୍ୟ ସୁବର୍ଣ୍ଣଙ୍କୁ ଟିକଟ୍ ମିଳୁନଥିବାରୁ ସେ ପତ୍ନୀଙ୍କ ସହିତ ମିଶି କଂଗ୍ରେସରେ ଯୋଗଦେବେ । କେନ୍ଦୁଝର ଆସନରୁ ପ୍ରତିଭା ନିର୍ବାଚନ ଲଢ଼ିବାକୁ ଯାଉଥିବା ସୂଚନା ମିଳିଛି । ବ୍ୟକ୍ତିଗତ ଭାବେ ସୁବର୍ଣ୍ଣଙ୍କ ନିଜସ୍ୱ ଭୋଟବ୍ୟାଙ୍କ ଏବେ ବି ନିର୍ବାଚନମଣ୍ଡଳୀରେ ରହିଛି ।
୧୯୮୫ ମସିହାରେ ତେଲକୋଇ ଆସନରୁ କଂଗ୍ରେସ ପ୍ରାର୍ଥୀ ଭାବେ ବିଜୟୀ ହୋଇଥିବା ପ୍ରାଣବଲ୍ଲଭ ନାଏକ ୨୦୧୯ ମସିହାରେ ବିଜେଡିରେ ଯୋଗ ଦେଇଥିଲେ । ୫ ବର୍ଷ ଧରି ବିଜେଡିରେ ରହିବା ପରେ ପରେ ପ୍ରାଣବଲ୍ଲଭ କଂଗ୍ରେସରେ ଯୋଗ ଦେବେ ବୋଲି ସୂଚନା ମିଳିଛି ।