ନୂଆଦିଲ୍ଲୀ, ୧୪/୧୨ : ବିବାହ ବିଚ୍ଛେଦ ଅନେକଙ୍କ ଜୀବନରେ ଅତି ତିକ୍ତ ଅନୁଭୂତି ଆଣି ଦେଇଥାଏ । ନିକଟରେ ଜଣେ ମହିଳା ମେହେନ୍ଦୀରେ ତାଙ୍କର ହୃଦୟ ଭାଙ୍ଗିଯିବାର ଯନ୍ତ୍ରଣା ଓ ବିଫଳ ବୈବାହିକ ଜୀବନର କାହାଣୀକୁ ଚିତ୍ରଣ କରିଛନ୍ତି । ସେ ସଂପର୍କିତ ଫଟୋ ଓ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେଉଛି ।
ଭିଡିଓରେ ଦେଖିବାକୁ ମିଳୁଛି ଯେ ମହିଳା ଜଣକ ତାଙ୍କ କହୁଣୀରୁ ନେଇ ହାତର ପାପୁଲି ପର୍ଯ୍ୟନ୍ତ ମେହେନ୍ଦୀ କରିଛନ୍ତି । ସେଥିରେ ଶାଶୂଘରେ ସେ ସାମ୍ନା କରିଥିବା ଯନ୍ତ୍ରଣାର ବିଭିନ୍ନ ପର୍ଯ୍ୟାୟକୁ ଚିତ୍ର ମାଧ୍ୟମରେ ଅବତାରଣା କରିଛନ୍ତି । ଶାଶୂଘରେ ତାଙ୍କୁ କିଭଳି ଚାକର ଭଳି ଖଟାଯାଉଥିଲା, ସେ କିଭଳି ଏକୁଟିଆ ହୋଇଯାଇଥିଲେ, ସ୍ୱାମୀଙ୍କ ଅସହଯୋଗ, ପରିବାର ସଦସ୍ୟଙ୍କ ସହିତ କଳହ, ଭୁଲ ବୁଝାମଣା ଇତ୍ୟାଦି ସମସ୍ତ ପ୍ରକାର କଥାର ପ୍ରତୀକ ଭାବେ ଗୋଟିଏ ଗୋଟିଏ ଚିତ୍ର ରହିଛି । ଶେଷ ଡିଜାଇନ୍ଟି ତାଙ୍କ ବିବାହ ବିଚ୍ଛେଦକୁ ସୂଚାଉଛି । ସବୁ ଡିଜାଇନ୍ର ତଳେ ତାହା ତାଙ୍କର କେଉଁ ମାନସିକ ସ୍ଥିତିକୁ ଦର୍ଶାଉଛି ସେ ସଂପର୍କରେ ମଧ୍ୟ ମହିଳା ଜଣକ ଇଂରାଜୀରେ ଲେଖିଛନ୍ତି । ମହିଳାଙ୍କର ଏଭଳି ବିଚାରଧାରା ପ୍ରତି ଅନେକ ୟୁଜର ସହାନୁଭୂତି ପ୍ରକାଶ କରିଛନ୍ତି ।
ସୂଚନାଥାଉକି, ଆଜିକାଲି ବିବାହ ବିଚ୍ଛେଦ ବା ଡିଭୋର୍ସ ମେହେନ୍ଦୀର ଟ୍ରେଣ୍ଡ ଚାଲିଛି। ଏହା ପାରମ୍ପରିକ ମେହେନ୍ଦୀ ଭଳି ନୁହେଁ । ଏହା ମହିଳାଙ୍କ ଅଧିକାର, ବିବାହ ବନ୍ଧନରେ ସେମାନେ ସାମ୍ନା କରୁଥିବା ଚ୍ୟାଲେଞ୍ଜ ଓ ଭାବନାତ୍ମକ ସଂଘର୍ଷକୁ ସୂଚାଇଥାଏ ।
