ନୂଆଦିଲ୍ଲୀ: ଇସ୍ରାଏଲର ଆକ୍ରମଣରେ ଅସ୍ତବ୍ୟସ୍ତ ଗାଜା । ସେଠାରେ ବସବାସ କରୁଥିବା ଲୋକଙ୍କ ଅବସ୍ଥା ନକହିଲେ ଭଲ । ଖାଦ୍ୟର ଘୋର ଅଭାବ ଲୋକଙ୍କ ଜୀବନ ନେଉଛି । ଏହାକୁ ନଜରରେ ରଖି ଶୁକ୍ରବାର ଜାତିସଂଘ ଗାଜାରେ ଦୁର୍ଭିକ୍ଷ ଘୋଷଣା କରିଛି । ବିଶେଷଜ୍ଞମାନେ କହିଛନ୍ତି ଯେ, ଏହା ୫ ଲକ୍ଷ ଲୋକଙ୍କୁ ପ୍ରଭାବିତ କରୁଛି । ଯଦି ଇସ୍ରାଏଲ ଏବଂ ହମାସ ମଧ୍ୟରେ ଯୁଦ୍ଧବିରତି ନହୁଏ ଏବଂ ମାନବିକ ସହାୟତାର ନିରବଚ୍ଛିନ୍ନ ଯୋଗାଣ ସୁନିଶ୍ଚିତ ନହୁଏ, ତେବେ ଏହି ସଙ୍କଟ ସମଗ୍ର ଅଞ୍ଚଳରେ ବ୍ୟାପିପାରେ । 

 ଜାତିସଂଘ ସହାୟତା ମୁଖ୍ୟ ଟମ୍ ଫ୍ଲେଚର କହିଛନ୍ତି ଯେ, ପଶ୍ଚିମ ଏସିଆରେ ପ୍ରଥମେ ଆସିଥିବା ଏହି ବିପର୍ଯ୍ୟୟ ସମ୍ପୂର୍ଣ୍ଣ ଭାବରେ ରୋକାଯାଇପାରିବ । ସେପଟେ ଗାଜାରେ ଦୁର୍ଭିକ୍ଷର ଦାବିକୁ ପ୍ରତ୍ୟାଖ୍ୟାନ କରିଛି ଇସ୍ରାଏଲ । ସମନ୍ୱିତ ଖାଦ୍ୟ ସୁରକ୍ଷା ପର୍ଯ୍ୟାୟ ବର୍ଗୀକରଣ (IPC) ପକ୍ଷରୁ କୁହାଯାଇଛି ଯେ, ଗାଜା ସହର ଦୁର୍ଭିକ୍ଷର ସମ୍ମୁଖୀନ ହେଉଛି ଏବଂ ଏହି ସଙ୍କଟ ଆସନ୍ତା ମାସ ଶେଷ ସୁଦ୍ଧା ଦକ୍ଷିଣରେ ଡେର ଅଲ-ବାଲାହ ଏବଂ ଖାନ ୟୁନିସ ଭଳି ସହରକୁ ବ୍ୟାପିପାରେ । ଗାଜା ପଟିରେ ଇସ୍ରାଏଲର ଲଗାତାର ସାମରିକ କାର୍ଯ୍ୟାନୁଷ୍ଠାନ ଏବଂ ଖାଦ୍ୟ ଓ ଅନ୍ୟାନ୍ୟ ମାନବିକ ଯୋଗାଣ ବାଧାପ୍ରାପ୍ତ ହେବା ଯୋଗୁଁ ପାଲେଷ୍ଟାଇନ ନାଗରିକ ପ୍ରଭାବିତ ହେଉଛନ୍ତି । ବିଶେଷକରି ପିଲାମାନେ ଅନାହାରର ଶିକାର ହେଉଛନ୍ତି । 

 ପଶ୍ଚିମ ଏସିଆର ଯୁଦ୍ଧଗ୍ରସ୍ତ ଅଞ୍ଚଳରେ ଦୁର୍ଭିକ୍ଷ ପରିସ୍ଥିତିକୁ ଆଇପିସି ପ୍ରଥମ ଥର ପାଇଁ ନିଶ୍ଚିତ କରିଛି । ଏହା ହମାସ ସହିତ ଯୁଦ୍ଧବିରତି ଚୁକ୍ତିନାମାରେ ପହଞ୍ଚିବା ପାଇଁ ଇସ୍ରାଏଲ ଉପରେ ଚାପ ବୃଦ୍ଧି କରିପାରେ। ସେପଟେ ଇସ୍ରାଏଲ, ଗାଜା ପଟିରେ ସାମରିକ ଅଭିଯାନକୁ ତୀବ୍ର କରି ଗାଜା ସିଟି ଏବଂ ଅନ୍ୟ ସହରଗୁଡ଼ିକର ନିୟନ୍ତ୍ରଣ ହାସଲ କରିବାକୁ ଯୋଜନା କରୁଛି । ବିଶେଷଜ୍ଞମାନେ ଆଶଙ୍କା ପ୍ରକାଶ କରିଛନ୍ତି ଯେ, ଏହା ଏହି ଅଞ୍ଚଳରେ ଖାଦ୍ୟ ସଙ୍କଟକୁ ଆହୁରି ଘନୀଭୂତ କରିପାରେ ।