ଭୁବନେଶ୍ୱର, ୨୪/୦୨: କଳିଙ୍ଗ ଷ୍ଟାଡିୟମରେ ଚାଲିଥିବା ଏଫ୍ଆଇଏଚ୍ ପ୍ରୋ ଲିଗ୍ରେ ସୋମବାର ଘରୋଇ ଭାରତ ଓ ଇଂଲଣ୍ଡ ମୁହାଁମୁହିଁ ହେବେ । ସେମିତି ପୁରୁଷରେ ଜର୍ମାନୀ-ଆୟର୍ଲାଣ୍ଡ ଏବଂ ମହିଳାରେ ଭାରତ ଓ ନେଦରଲାଣ୍ଡସ ମଧ୍ୟରେ ଆଉ ୨ଟି ମ୍ୟାଚ୍ ଖେଳାଯିବ ।
ଭାରତ-ଇଂଲଣ୍ଡ(ପୁରୁଷ): ପ୍ରୋ ଲିଗର ସମସ୍ତ ମ୍ୟାଚ୍ ଦର୍ଶକଙ୍କ ପାଇଁ ମାଗଣା ଦେଖିବାର ସୁବିଧା କରାଯାଇଛି । ଘରୋଇ ଭେନ୍ୟୁରେ ଭାରତ ସିଜନରେ ଶେଷ ଦୁଇ ମ୍ୟାଚ୍ ଇଂଲଣ୍ଡ ବିପକ୍ଷରେ ଖେଳିବ । ସୋମବାର ପ୍ରଥମ ଚରଣ ରହିଛି । ପୂର୍ବରୁ ଘରୋଇ ଦଳ ଆୟର୍ଲାଣ୍ଡ ବିପକ୍ଷରେ ଡବଲ ଏବଂ ଜର୍ମାନୀ ଓ ସ୍ପେନ ବିପକ୍ଷରେ ଗୋଟିଏ ଲେଖାଏଁ ମ୍ୟାଚ୍ ଜିତିଛି । ଫଳରେ ଦଳ ଚଳିତ ସିଜନରେ ୬ଟିରୁ ୪ଟି ବିଜୟ ସହ ମୋଟ୍ ୧୨ ପଏଣ୍ଟ ପାଇ ଟେବୁଲରେ ଚତୁର୍ଥ ସ୍ଥାନରେ ରହିଛି । ଇଂଲଣ୍ଡ ଗୋଟିଏ ପଏଣ୍ଟ ସହ ଭାରତଠୁ ଆଗରେ ରହିଛି । ଉଭୟ ସିଜନରେ ସମାନ ସଂଖ୍ୟକ ମ୍ୟାଚ୍ ଖେଳିଛନ୍ତି । ସୋମବାର ଭାରତ ପୂର୍ବ ପ୍ରଦର୍ଶନ ଜାରି ରଖି ପୂରା ପଏଣ୍ଟ ହାସଲ କରିବାକୁ ଉଦ୍ୟମ କରିବ । ସେମିତି ଘରୋଇ ଦଳ ବିପକ୍ଷରେ ଇଂଲଣ୍ଡ ଶ୍ରେଷ୍ଠ ପ୍ରଦର୍ଶନ ଦେବାକୁ ପ୍ରସ୍ତୁତ ।
ଭାରତ-ନେଦରଲାଣ୍ଡସ (ମହିଳା): ମହିଳା ବର୍ଗରେ ଭାରତର ପ୍ରଦର୍ଶନ ସେତେଟା ଉନ୍ନତ ନାହିଁ । ଦଳ ଏର୍ଯ୍ୟନ୍ତ ୬ଟି ମ୍ୟାଚ୍ରୁ ସିଧାସଳଖ ୨ଟି ବିଜୟ ସହ ୭ ପଏଣ୍ଟ ପାଇ ଟେବୁଲରେ ସପ୍ତମ ସ୍ଥାନରେ ରହିଛି । ସୋମବାର ନେଦରଲାଣ୍ଡସକୁ ଭେଟିବ । ଭ୍ରମଣକାରୀ ଦଳ ବେଶ ଶକ୍ତିଶାଳୀ । ପୂର୍ବରୁ ଦଳ ୬ଟି ମ୍ୟାଚରୁ ୫ଟି ବିଜୟ ସହ ୧୫ ପଏଣ୍ଟ ପାଇ ଟେବୁଲରେ ଦ୍ୱିତୀୟ ସ୍ଥାନରେ ରହିଛି । ଭ୍ରମଣକାରୀ ଦଳକୁ ପ୍ରତିହତ କରିବାକୁ ହେଲେ ଘରୋଇ ଦଳକୁ ସବୁ ବିଭାଗରେ ଶ୍ରେଷ୍ଠ ପ୍ରଦର୍ଶନ ଦେବାକୁ ହେବ ।
