ଛତ୍ରପୁର,୦୨/୧୧: ଭାରତୀୟ ଷ୍ଟେଟ ବ୍ୟାଙ୍କର ଛତ୍ରପୁର ଶାଖାରେ ଅଗ୍ନିକାଣ୍ଡ । ସଟ୍ ସର୍କିଟରୁ ବ୍ୟାଙ୍କରେ ନିଆଁ ଲାଗିଥିବା ବେଳେ ଛତ୍ରପୁର ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ କରିଛି । ଏହି ଅଗ୍ନିକାଣ୍ଡରେ କୌଣସି ବଡ଼ ଧରଣର କ୍ଷୟକ୍ଷତି ହୋଇନଥିବା ସୂଚନା ମିଳିଛି । ଗଞ୍ଜାମ ଜିଲ୍ଲା ଛତ୍ରପୁର ବ୍ଲକ୍ରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଶନିବାର ବ୍ୟାଙ୍କର ଉପର ମହଲାରୁ ଧୂଆଁ ବାହାରୁଥିବା କିଛି ଲୋକ ଦେଖିଥିଲେ । ଏହା ଦେଖି ଗ୍ରାହକ ଓ କର୍ମଚାରୀ ଭୟରେ ବାହାରକୁ ଦୌଡ଼ିଥିଲେ । ବ୍ୟାଙ୍କର କର୍ମଚାରୀ ଏହି ଘଟଣା ସମ୍ୱନ୍ଧରେ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବାହିନୀର ଏକ ଟିମ୍ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ କରିଛନ୍ତି । ଏହି ଘଟଣା ହେବାରୁ କିଛି ଘଣ୍ଟା ପାଇଁ ବ୍ୟାଙ୍କ ସେବା ବନ୍ଦ ରହିଥିଲା । ବ୍ୟାଙ୍କର ଉପର ମହଲାରେ ଲାଗିଥିବା ସୋଲାର ପାନେଲରୁ ହିଁ ସର୍ଟ ସର୍କିଟ ହୋଇ ନିଆଁ ଲାଗିଥିବା ଜଣାପଡିଛି । ଏହି ଘଟଣାରେ ବ୍ୟାଙ୍କର କୌଣସି ବଡ଼ ଧରଣର କ୍ଷତି ହୋଇନଥିବା ଜଣାପଡିଛି ।
