ବାଙ୍କୀ, ୦୮/୦୭ : ହୀରାକୁଦ ବନ୍ୟାଜଳ ଛାଡ଼ିବା ପରେ ମହାନଦୀରେ ବୃଦ୍ଧି ପାଇଛି ଜଳସ୍ତର। ମୁଣ୍ଡଳୀରେ ପହଞ୍ଚିଛି ବର୍ଷର ପ୍ରଥମ ବନ୍ୟାଜଳ। ସକାଳ ୮ଟା ସୁଦ୍ଧା ମୁଣ୍ଡଳୀରେ ପ୍ରବାହିତ ହେଉଛି ୮୭ ହଜାର ୭୦୦ କ୍ୟୁସେକ ଜଳ। ସେପଟେ ମହାନଦୀରେ ଜଳସ୍ତର ବଢିବା ଯୋଗୁଁ ବାଙ୍କୀରେ ବଢିଛି ବନ୍ୟା ଆଶଙ୍କା। ବାଙ୍କୀ ଏବଂ ତିଗିରିଆ ଅଞ୍ଚଳର ୩୦ରୁ ଉର୍ଦ୍ଧ୍ଵ ଗ୍ରାମବାସୀଙ୍କ ମନରେ ଛନକା।
ମହାନଦୀରେ ଜଳସ୍ତର ବଢିଲେ କଟକ ଜିଲ୍ଲାରେ ସର୍ବପ୍ରଥମେ ବାଙ୍କୀ ବ୍ଲକର ହୁଳୁହୁଳା ବ୍ରିଜ୍ ବୁଡିଯାଏ । ଯାହାଦ୍ଵାରା ୩୦ରୁ ଉର୍ଦ୍ଧ୍ଵ ଗ୍ରାମ ବାହ୍ୟ ଜଗତରୁ ବିଚ୍ଛିନ୍ନ ହୁଅନ୍ତି। ବାଙ୍କୀ ଅଞ୍ଚଳର ରତାଗଡ଼, ବାଉଁଶପୁଟ, କନ୍ତପହଁରା, ବନ୍ଦାଳ ଏବଂ ତିଗିରିଆ ଅଞ୍ଚଳର ବଡନାଉପୁଟ, ବଉଲାଙ୍ଗ, ଶାଳିଜଙ୍ଗା ଆଦି ପଞ୍ଚାୟତର ଗ୍ରାମବାସୀ ପ୍ରଭାବିତ ହୁଅନ୍ତି। ଏକର ଏକର ଚାଷ ଜମି କ୍ଷତିଗ୍ରସ୍ତ ହୋଇଥାଏ। ଚାଷକୁ ନିର୍ଭର କରି ଚଳୁଥିବା ଚାଷୀ ଏବଂ ବ୍ୟବସାୟୀ ବହୁ ପରିମାଣରେ କ୍ଷତି ସହିଥାନ୍ତି। ପ୍ରତିବର୍ଷ ସମାନ ଘଟଣା ଦେଖିବାକୁ ମିଳେ। ଯେଉଁଥିପାଇଁ ଗତ ବର୍ଷ ବାଙ୍କୀ ବିଧାୟକ ଦେବୀ ରଞ୍ଜନ ତ୍ରିପାଠୀ ହୁଳୁହୁଳା ଉଚ୍ଚ ସେତୁର ଶିଳାନ୍ୟାସ କରିଥିଲେ। କିନ୍ତୁ ଅଦ୍ୟାବଧି ୫୦ ପ୍ରତିଶତ କାମ ଶେଷ ହୋଇନି। ଠିକାଦାର ମନ୍ଥର ଗତିରେ କାମ କରୁଥିବାରୁ ଏହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ସ୍ଥାନୀୟ ବାସିନ୍ଦା। ତେବେ ନିର୍ମାଣ କାର୍ଯ୍ୟ ସରିବାକୁ ଆଉ ୬ ମାସ ଲାଗିବ ବୋଲି କହିଛନ୍ତି ତିଗିରିଆ ବିଭାଗୀୟ ଯନ୍ତ୍ରୀ ରମେଶ ମହାରଣା।
