ଜୟପୁର,୧୧/୧୧: ରଣ୍ଡାପାଲ୍ଲୀ ପଞ୍ଚାୟତର ରାଣୀଗଡ । ପାହାଡ ଉପରେ ରହିଛି ଏ ଗାଁ । ନିକଟରେ ଥିବା ଏକ ପଥରରେ ରହିଛି ପ୍ରଭୁ ଶ୍ରୀରାମଙ୍କ ପାଦଚିହ୍ନ । ପ୍ରଭୁ ରାମଚନ୍ଦ୍ର ଏହି ଅଞ୍ଚଳରେ ରହୁଥିବାରୁ ଗାଁର ନାଁ ରାମଗଡ ଭାବେ ନାମିତ ହୋଇଥାଇପାରେ ବୋଲି କହିଛନ୍ତି ଗ୍ରାମବାସୀ । ପ୍ରତି ତିନି ବର୍ଷରେ ଏଠାରେ ଯାତ୍ରା ହେଉଛି । ଅଥଚ ପର୍ଯ୍ୟଟନ ବିଭାଗର ଦୃଷ୍ଟି ଆଢୁଆଳରେ ରହିଯାଇଛି ଏ ଗାଁ ।
ରାମଗଡରେ ରହୁଛନ୍ତି ୬୫ ପରିବାର । ବୈରାଗୀମଠରୁ ପାହାଡ ଦେଇ ୬ କିମି ଗଲେ ପଡେ ଏହି ଗାଁ । ଗଡ଼ପଦରର ପିକନିକ ସ୍ପଟ୍ ଦେଇ ଆଉ ଏକ ପାହାଡିଆ ରାସ୍ତା ବି ରହିଛି ଗାଁକୁ । ଏହାର ଦୂରତା ହେଉଛି ୭ କିମି । ଏପର୍ଯ୍ୟନ୍ତ ଗାଁକୁ ଭଲ ରାସ୍ତାଟିଏ ନାହିଁ । ଚାଲିଚାଲି ପାହାଡିଆ ରାସ୍ତା ଦେଇ ଯିବାଆସିବା କରିବାକୁ ପଡୁଛି । ଗତବର୍ଷ ମନରେଗାରେ ମାଟି ରାସ୍ତା ତିଆରି ହୋଇଥିଲା । ବର୍ଷାରେ ତାହା ଧୋଇ ହୋଇଯାଇଛି । ଗାଁର ୫୦୦ମିଟର ଦୂରରେ ରହିଛି ଏକ ବଡ ସମତଳ ପଥର । ଏହି ପଥର ଉପରେ ପ୍ରଭୁ ଶ୍ରୀରାମଙ୍କ ପାଦ ଚିହ୍ନ ଥିବା ଲୋକେ କହୁଛନ୍ତି । ଏହାକୁ ପୂଜା କରାଯାଉଛି । ପ୍ରତି ତିନିବର୍ଷରେ ଥରେ ଧୁମଧାମରେ ପର୍ବ ପାଳନ କରାଯାଉଛି । ଶହଶହ ଲୋକ ଏଠାକୁ ଆସି ପୂଜାର୍ଚ୍ଚନା କରୁଛନ୍ତି । ଗାଁ ନିକଟରେ ବାଜ୍ନି ପଥର ରହିଛି । ଏହି ପଥରରେ ଅନ୍ୟ ଏକ ପଥର ବାଡେଇଲେ ବାଦ୍ୟଯନ୍ତ୍ର ଭିଳ ଶଦ୍ଦ ବାହାରୁଛି । ଏହି ଅଞ୍ଚଳ ଏପର୍ଯ୍ୟନ୍ତ ଲୋକଲୋଚନକୁ ଆସିପାରୁନି । ପର୍ଯ୍ୟଟନ ବିଭାଗ ଏଥିପ୍ରତି ଦୃଷ୍ଟି ଦେଲେ ସ୍ଥାନର ବିକାଶ ହୋଇପାରନ୍ତା ବୋଲି କହିଛନ୍ତି ଗ୍ରାମବାସୀ ।
ଜିଲ୍ଲା ପର୍ଯ୍ୟଟନ ଅଧିକାରୀ ଟି. ପ୍ରଧାନ କହିଛନ୍ତି, ବିଭାଗର ମାନଦଣ୍ଡରେ ଆସିଲେ ଏହାକୁ ପର୍ଯ୍ୟଟନ ସ୍ଥଳ ଭାବେ ଘୋଷଣା କରାଯିବ । ଏ ସମ୍ପର୍କରେ ତଥ୍ୟ ସଂଗ୍ରହ କରି ବିକାଶ ଲାଗି ଯୋଜନା କରାଯିବ । ରାଜ୍ୟ ସରକାରଙ୍କୁ ପ୍ରସ୍ତାବ ପଠାଯିବ।
