ଭୁବନେଶ୍ଵର, ୦୪/୦୨ : ଦୁର୍ବଳ ହେଉଛି ମାଓ ସଙ୍ଗଠନ। ସୁରକ୍ଷାକର୍ମୀଙ୍କ ଜୋରଦାର ଅପରେସନ ପରେ ଭୟଭୀତ ହୋଇ ଆତ୍ମସମର୍ପଣ କଲେ ୪ ହାର୍ଡକୋର୍ ମାଓବାଦୀ। ମାଓବାଦୀଙ୍କ TCOC ଆରମ୍ଭରୁ ଚାରି ଜଣ ହାର୍ଡକୋର ନକ୍ସଲ ମହାରାଷ୍ଟ୍ର ଗଡଚିରୋଲି ପୋଲିସ ଓ CRPF ସମ୍ମୁଖରେ ଆତ୍ମସମର୍ପଣ କରିଛନ୍ତି। ସେମାନଙ୍କ ମୁଣ୍ଡ ଉପରେ ମୋଟ ୨୮ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା ହୋଇଥିଲା। 

ସୂଚନାନୁଯାୟୀ, ଜଣେ ଡିଭିଜନାଲ୍ କମିଟି ସଦସ୍ୟ ଓ ଜଣେ ଏରିଆ କମିଟି ସଦସ୍ୟ ସହ ଦୁଇ ଜଣ ପ୍ଲାଟୁନ୍ ସଦସ୍ୟ ଗଡ଼ଚିରୋଲି ପୋଲିସ ନିକଟରେ ଆତ୍ମସମର୍ପଣ କରିଛନ୍ତି । ଆତ୍ମସମର୍ପଣ କରିଥିବା ଚାରି ହାର୍ଡକୋର ମାଓବାଦୀ ହେଲେ ଅଶୋକ ପୋଚ୍ୟା ସାଦେକ, ବନିତା ଦୋହେ ଜୋର, ସାଧୁ ଲିଙ୍ଗୁ ଓ ମୁନ୍ନି ପୋଡିଆ କୋରସା। ଆତ୍ମସମର୍ପଣ ପରେ ଏମାନଙ୍କୁ ସରକାରଙ୍କ ନିୟମ ଅନୁସାରେ ଥଇଥାନ କରାଯିବ ବୋଲି ସୂଚନା ମିଳିଛି।

ଏହି ଖବରଟିକୁ ପଢନ୍ତୁ-ନାବାଳିକାଙ୍କ ଉପରେ ଚଢିଗଲା ମୋ ବସ୍, ନନ୍ଦନକାନନ ପଟିଆ ରୋଡ୍ ଅବରୋଧ

ଉଲ୍ଲେଖଯୋଗ୍ୟ ଯେ, ମାଓମୁକ୍ତ ଭାରତ ଗଠନ ଲାଗି ତାରିଖ ଘୋଷଣା ହେବା ପରେ ୨୦୨୪ରେ ଛତିଶଗଡରେ ୧୮୯ ଜଣ ମାଓବାଦୀ ଆତ୍ମସମର୍ପଣ କରିଛନ୍ତି। ସେହିଭଳି ୫୮ ଜଣ ମାଓବାଦୀ ସୁରକ୍ଷାକର୍ମୀଙ୍କ ଗୁଳିରେ ପ୍ରାଣ ହରାଇଛନ୍ତି। ସେହିପରି ୫୦୩ ଜଣ ମାଓବାଦୀ ପୋଲିସ ହାତରେ ଗିରଫ ହେବା ପରେ ମାଓ ସଙ୍ଗଠନ ଦୁର୍ବଳ ହେବାରେ ଲାଗିଛି। ୨୦୨୫ ଜାନୁଆରୀ ମାସରେ ୨୩ ଜଣ ମାଓବାଦୀ ପୋଲିସ ନିକଟରେ ଆତ୍ମସମର୍ପଣ କରିଥିବା ବେଳେ ୪୬ ଜଣ ମାଓବାଦୀଙ୍କୁ ଗିରଫ କରାଯାଇଛି ଓ ୧୭ ଜଣ ମାଓବାଦୀ ଏନକାଉଣ୍ଟରରେ ନିହତ ହୋଇଛନ୍ତି। ଫେବୃଆରୀ ୧ରେ ୧୦ ଜଣ ମାଓବାଦୀ ଆତ୍ମସମର୍ପଣ କରିଥିବା ବେଳେ ଆଜି ଆଉ ୪ ଜଣ ଆତ୍ମସମର୍ପଣ କରିଛନ୍ତି।