ମୁମ୍ବାଇ,୧୪/୧୨ : ବଲିଉଡ ଭେଟେରାନ ଅଭିନେତା ରାଜ କପୁରଙ୍କ ୧୦୦ ତମ ଜନ୍ମ ବାର୍ଷିକୀ । ଏନେଇ ଗତକାଲି ଠାରୁ ସିନେମା ପ୍ରେମୀଙ୍କ ପାଇଁ ଆୟୋଜିତ ହୋଇଥିଲା କାର୍ଯ୍ୟକ୍ରମ । ଆଉ ଏଥିରେ ସାମିଲ ହୋଇଥିଲେ ଫିଲ୍ମ ଇଣ୍ଡଷ୍ଟ୍ରିର ଜଣାଶୁଣା ସେଲିବ୍ରିଟି। ସେହିପରି ଆଜି ମୁମ୍ବାଇରେ ଏକ ଚଳଚ୍ଚିତ୍ର ମହୋତ୍ସବ ଆରମ୍ଭ ହୋଇଛି । ଯାହା ତାଙ୍କର ୧୦୦ତମ ଜନ୍ମ ବାର୍ଷିକୀ ଅବସରରେ ପାଳନ କରାଯାଉଛି । ଏହି ବିଶେଷ ଉତ୍ସବକୁ ପାଳନ କରିବା ପାଇଁ ଗତ ଶୁକ୍ରବାର ଦିନ ଶୋ’ମ୍ୟାନଙ୍କ ପରିବାର ସଦସ୍ୟ ରାଜ କପୁରଙ୍କ ସିନେମା କାର୍ଯ୍ୟକୁ ପୁନର୍ଜୀବିତ କରିବାକୁ ଏକାଠି ହୋଇଥିଲେ। ଏହି କାର୍ଯ୍ୟକ୍ରମରେ କପୁର ପରିବାର ଏକାଠି ପୋଜ୍ ଦେଇଥିଲେ । ରାଜ କପୁରଙ୍କ ପୁଅ ରନ୍ଧୀର କପୁର, ଝିଅ ରେମା ଜୈନ, ବୋହୂ ବବିତା ଏବଂ ନୀତୁ କପୁରଙ୍କ ଠାରୁ ନାତି ରଣବୀର କପୁର ଏବଂ ନାତୁଣୀ କରୀନା କପୁର, କରିସ୍ମା କପୁର ଏବଂ ରିଦ୍ଧିମା କପୁର ସାହନି ସମସ୍ତେ ଗ୍ରାଣ୍ଡ ଷ୍ଟାଇଲରେ ଏହି ମହୋତ୍ସବରେ ଯୋଗ ଦେଇଥିଲେ। ଯାହାର ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।
ତେବେ କେବଳ ଯେ କପୁର ପରିବାର ନୁହେଁ ଫିଲ୍ମ ଇଣ୍ଡଷ୍ଟ୍ରିର ଅନେକ ବଡ ତାରକା ମଧ୍ୟ କାର୍ଯ୍ୟକ୍ରମରେ ସାମିଲ ହୋଇଥିଲେ । ପ୍ରେମ ଚୋପ୍ରା, ଜିତେନ୍ଦ୍ର, ରେଖା, କାର୍ତ୍ତିକ ଆର୍ଯ୍ୟନ, ବିକି କୌଶଲ, ମହେଶ ଭଟ୍ଟ, ସଞ୍ଜୟ ଲୀଲା ବଂଶାଲୀ, ରିତେଶ ଦେଶମୁଖ, ହୁମା କ୍ୟୁରେଶୀ ଏବଂ ଶର୍ମନ ଯୋଶୀଙ୍କ ସହ ଅନେକ ଚଳଚ୍ଚିତ୍ର ବ୍ୟକ୍ତିତ୍ୱ ସାମିଲ ହୋଇଥିଲେ । ତେବେ ଏହି କାର୍ଯ୍ୟକ୍ରମରେ ଇଭେଣ୍ଟରେ ଆର.କେ ଫିଲ୍ମ, ଫିଲ୍ମ ହେରିଟେଜ୍ ଫାଉଣ୍ଡେସନ୍ ଏବଂ ନ୍ୟାସନାଲ୍ ଫିଲ୍ମ ଆର୍କାଇଭ୍ ଅଫ୍ ଇଣ୍ଡିଆ ଶୋମ୍ୟାନ୍ ରାଜ କପୁରଙ୍କ ୧୦୦ ତମ ଜନ୍ମ ବାର୍ଷିକୀ ପାଳନ କରୁଛି । ଏହି ଉତ୍ସବରେ ରାଜ କପୁରଙ୍କ ୧୦ଟି ଆଇକନ୍ ଚଳଚ୍ଚିତ୍ର ୪୦ ଟି ସହର ଏବଂ ୧୩୫ ପ୍ରେକ୍ଷାଳୟରେ ପ୍ରଦର୍ଶିତ ହେବ । ପ୍ରାୟ ଚାରି ଦଶନ୍ଧି ଧରି ରାଜ କପୁରଙ୍କ ଶ୍ରେଷ୍ଠ ଚଳଚ୍ଚିତ୍ର ଏବଂ କାର୍ଯ୍ୟଗୁଡ଼ିକୁ ଆଲୋକିତ କରିବାକୁ ଏହି ଉତ୍ସବର ଲକ୍ଷ୍ୟ ରହିଛି ।
