ନୂଆଦିଲ୍ଲୀ,୨୬/୧୧ : ବର୍ଡର ଗାଭାସ୍କର ଟ୍ରଫି ଟୁର୍ଣ୍ଣାମେଣ୍ଟର ପ୍ରଥମ ଟେଷ୍ଟ ସିରିଜ ଶେଷ ହୋଇଛି । ପର୍ଥରେ ଭାରତ ଓ ଆଷ୍ଟ୍ରେଲିଆ ମଧ୍ୟରେ ପ୍ରଥମ ଟେଷ୍ଟ ଅନୁଷ୍ଠିତ ହୋଇଥିଲା । ଆସନ୍ତା ଡିସେମ୍ବର ୬ ତାରିଖରୁ ଆଡିଲେଟରେ ଦ୍ବିତୀୟ ଟେଷ୍ଟ ସିରିଜ ଖେଳାଯିବ । ଏହା ପୂର୍ବରୁ ସିରିଜ ମଝିରେ ଭାରତ ଫେରିଛନ୍ତି ମୁଖ୍ୟ କୋଚ୍ ଗୌତମ ଗମ୍ଭୀର । ଅଚାନକ ଭାରତ ଆସିବା ପଛରେ ପାରିବାରିକ ସମସ୍ୟା ଥିବା ଦର୍ଶାଇଛନ୍ତି ।
ପରିବାରରେ କିଛି ସମସ୍ୟା ଥିବାରୁ ଭାରତୀୟ କ୍ରିକେଟ ଦଳର ହେଡ୍ କୋଚ୍ ଗୌତମ ଗମ୍ଭୀରଙ୍କୁ ହଠାତ୍ ଭାରତ ଆସିବାକୁ ପଡିଛି । ଡିସେମ୍ବର ୬ରୁ ଆଡିଲେଡରେ ବର୍ଡର ଗାଭାସ୍କର ଟ୍ରଫି ଦ୍ବିତୀୟ ଟେଷ୍ଟ ଆରମ୍ଭ ହେବ । ଏହା ପୂର୍ବରୁ ସେ ଭାରତ ଫେରିଛନ୍ତି । ତାଙ୍କ ଅନୁପସ୍ଥିରେ ସହକାରୀ କୋଚ୍ ଅଭିଷେକ ନାୟର, ରିୟାନ ଦଶ ଡୋଚେଟ୍, ବୋଲିଂ କୋଚ୍ ମର୍ନେ ମର୍କେଲ ଏବଂ ଫିଲ୍ଡିଂ କୋଚ୍ ଟି ଦିଲୀପ ଏହି ପ୍ରଶିକ୍ଷଣ ଶିବିରେ ସାମିଲ ହେବେ । ଦ୍ବିତୀୟ ଟେଷ୍ଟ ପୂର୍ବରୁ ଗମ୍ଭୀର ଫେରିବାର ସମ୍ଭାବନା ରହିଛି ।
ଭାରତ ଓ ଆଷ୍ଟ୍ରେଲିଆ ମଧ୍ୟରେ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳାଯାଉଛି । ପର୍ଥରେ ପ୍ରଥମ ଟେଷ୍ଟ ସରିଛି । ଭାରତ ଚମତ୍କାର ପ୍ରଦର୍ଶନ ବଳରେ ବୃହତ ବିଜୟ ହାସଲ କରିଛି । କଙ୍ଗାରୁ ଦଳକୁ ତାର ଘରୋଇ ମଟିରେ ୨୯୫ରନରେ ପରାସ୍ତ କରି ୧-୦ ସିରିଜରେ ଆଗରେ ରହିଛି । ଗୌତମ ଗମ୍ଭୀରଙ୍କ କୋଚିଂରେ ଭାରତୀୟ ଦଳ ଶ୍ରୀଲଙ୍କାରେ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜରେ ପରାସ୍ତ ହୋଇଥିଲା । ମାତ୍ର ଟିଟ୍ବେଣ୍ଟି ସିରିଜ ଜିତିଥିଲା । ବାଂଲାଦେଶ ବିପକ୍ଷରେ ଟି୨୦ ଓ ଟେଷ୍ଟ ସିରିଜରେ ବିଜୟୀ ହୋଇଥିଲା । ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜରେ ଭାରତ ପରାସ୍ତ ହୋଇଥିଲା । ଏହା ପରେ କୋଚ୍ ଗୌତମ ଗମ୍ଭୀରଙ୍କୁ ସମାଲୋଚନାର ଶିକାର ହେବାକୁ ପଡିଥିଲା । ବର୍ଡର ଗାଭାସ୍କର ଟ୍ରଫି ସିରିଜ ତାଙ୍କ ପାଇଁ ଭାଗ୍ୟ ପରୀକ୍ଷା ପରି ହେବାକୁ ଯାଉଛି ।
