ଆନନ୍ଦପୁର,୧୮/୧୧: ଘଷିପୁରା ପୋଲିସର ବଡ଼ ସଫଳତା । ବାଇକ୍ ଲୁଟେରା ଗ୍ୟାଙ୍ଗକୁ କରିଲା କାବୁ । ୬ଟି ଚୋରା ବାଇକ୍ ସହ ୩ ଲୁଟେରାଙ୍କୁ ଗିରଫ କଲା ପୋଲିସ । ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ନାବାଳକ ସାମିଲ ରହିଛନ୍ତି । ଗିରଫ ହୋଇଥିବା ଯୁବକ ଗୁହାଳିଆ ଗାଁର ଲିଟୁ ଜେନା, ଜୀବନ ଜେନା ଏବଂ ନାବାଳକ ରାଜା ଜେନା ବୋଲି ଜଣାପଡିଛି । କେନ୍ଦୁଝର ଜିଲ୍ଲା ଆନନ୍ଦପୁର ବ୍ଲକ୍ରେ ଏଭଳି ଘଟଣା ସାମ୍ନାକୁ ଆସିଛି ।
ସୂଚନ ମୁତାବକ, ଘଷିପୁରା ଅଞ୍ଚଳର ବିଭିନ୍ନ ଜନଗହଳି ପୂର୍ଣ୍ଣ ହାଟ ବଜାରରୁ ବାରମ୍ବାର ବାଇକ୍ ଚୋରି ହେଉଥିବା ନେଇ ଅଭିଯୋଗ ହୋଇଥିଲା । ବରମ୍ୱାର ଏଭଳି ଘଟଣା ସାମ୍ନାକୁ ଆସିବା ପରେ ଘଷିପୁରା ପୋଲିସ ଲୁଟେରାଙ୍କୁ ଧରିବାକୁ ବିଭିନ୍ନ ସ୍ଥାନରେ ଚଢାଉ କରିଥିଲା । ପରେ ଏକ ବିଶେଷ ସୂତ୍ରରୂ ଖବର ପାଇ ଘସିପୁରା ଥାନା ଅଧିକାରୀଙ୍କ ନେତୃତ୍ୱରେ ଏକ ଟିମ ଗଠନ କରାଯାଇଥିଲା । ଏହି ଟିମ୍ ବାଇଲୋ ପଞ୍ଚାୟତ ଗୁହାଳିଆ ଗାଁର କାଜୁ ଜଙ୍ଗଲରେ ଅଚାନକ ଚଢ଼ାଉ କରିଥିଲା । ଏହି ଚଢାଉରେ ନମ୍ବର ବଦଳି ଥିବା ୬ ଟି ଚୋରା ବାଇକକୁ ଜବତ କରିବା ସହ ଚୋରିରେ ସଂପୃକ୍ତ ଥିବା ୨ ଜଣ ଯୁବକ ଏବଂ ଜଣେ ନାବାଳକଙ୍କୁ କାବୁ କରିବାରେ ସଫଳ ହୋଇଥିଲା ପୋଲିସ । ସମସ୍ତ ଅଭିଯୁକ୍ତଙ୍କୁ ଥାନାରେ ଜେରା କରିବା ପରେ ଏକ ମାମଲା ରୁଜୁ କରି ଦୁଇ ଜଣ ଯୁବକଙ୍କୁ ଆନନ୍ଦପୂର ବିଚାର ବିଭାଗୀୟ ହାଜତକୁ ପଠାଇ ଦେଇଛି ପୋଲିସ । ଏହା ସହ ନାବାଳକ ରାଜାକୁ ଜୁଭେନାଇଲ ହାଜତକୁ ପଠା ଯାଇଛି ।
