ଗାଜିଆବାଦ, ୨୧।୪: ଉତ୍ତରପ୍ରଦେଶର ଗାଜିଆବାଦସ୍ଥିତ କ୍ରାସିଂ ରିପବ୍ଲିକ ଥାନା ଅନ୍ତର୍ଗତ ସୁଦାମାପୁରୀ ଅଞ୍ଚଳରେ ଏକ ହୃଦୟବିଦାରକ ଘଟଣା ଘଟିଯାଇଛି । ସାମାନ୍ୟ ଅସାବଧାନତା ଯୋଗୁଁ ଏଲପିଜି ସିଲିଣ୍ଡରରୁ ଗ୍ୟାସ୍ ଲିକ୍ ହୋଇ ଭୟଙ୍କର ଅଗ୍ନିକାଣ୍ଡ ଘଟିଛି । ଏହି ଦୁର୍ଘଟଣାରେ ୫ ଜଣ ଯୁବକ ଗୁରୁତର ଭାବେ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ଥିବା ଜଣାପଡ଼ିଛି । ସୂଚନା ଅନୁଯାୟୀ, ସୁଦାମାପୁରୀରେ ଅମିତ, ମୁକେଶ, ସୋନୁ, ସନ୍ତୋଷ ଏବଂ ରୂପନ ନାମକ ୫ ଜଣ ଯୁବକ ଭଡ଼ା ଘରେ ରହି ଆଇସକ୍ରିମ ବିକ୍ରି କାମ କରନ୍ତି । ରବିବାର ବିଳମ୍ବିତ ରାତିରେ ସମସ୍ତେ କାମ ସାରି ଫେରିବା ପରେ ରାତି ଖାଇବା ପ୍ରସ୍ତୁତ କରୁଥିଲେ । ରୋଷେଇ ସମୟରେ ୫ କିଲୋଗ୍ରାମ ବିଶିଷ୍ଟ ଛୋଟ ସିଲିଣ୍ଡରରେ ଗ୍ୟାସ୍ କମ୍ ଥିବା ପରି ମନେ ହୋଇଥିଲା । ଏହି ସମୟରେ ଜଣେ ଯୁବକ ରେଗୁଲେଟର ବନ୍ଦ ନକରି ହଠାତ୍ ପାଇପ୍ଟିକୁ ବାହାର କରିଦେଇଥିଲେ, ଯାହାଫଳରେ ଗ୍ୟାସ୍ ସାରା ରୁମ୍ରେ ବ୍ୟାପି ଯାଇଥିଲା ।
ଏହା ବି ପଢ଼ନ୍ତୁ... 'ଭାରତ ଭୁଲେ ନାହିଁ, ନ୍ୟାୟ ମିଳିଲା'...ପହଲଗାମ ହମ୍ଲା ବର୍ଷେ ପୂର୍ବରୁ ପାକିସ୍ତାନକୁ ଭାରତୀୟ ସେନାର କଡ଼ା ମେସେଜ୍
ଠିକ୍ ସେହି ସମୟରେ ସୋନୁ ନାମକ ଯୁବକ ଜଣକ ବିଡ଼ି ଲଗାଇବା ପାଇଁ ଦିଆସିଲି କାଠି ମାରିଥିଲେ । ଦିଆସିଲି ନିଆଁ ସଂସ୍ପର୍ଶରେ ଆସିବା ମାତ୍ରେ ଘର ଭିତରେ ଜମି ରହିଥିବା ଗ୍ୟାସ୍ରେ ନିଆଁ ଲାଗିଯାଇଥିଲା । ଦେଖୁ ଦେଖୁ ନିଆଁ ଏତେ ଭୟଙ୍କର ରୂପ ନେଇଥିଲା ଯେ, ସେଠାରେ ଉପସ୍ଥିତ ଥିବା ପାଞ୍ଚ ଯୁବକ ରକ୍ଷା ପାଇପାରିନଥିଲେ ଏବଂ ନିଆଁ ଚେଙ୍କରେ ଜଳି ଯାଇଥିଲେ । ଅଘଟଣ ପରେ ସ୍ଥାନୀୟ ଲୋକଙ୍କ ସହାୟତାରେ ସମସ୍ତଙ୍କୁ ତୁରନ୍ତ ଜିଲ୍ଲା MMG ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ଅବସ୍ଥା ଗୁରୁତର ହେବାରୁ ସୋନୁ, ସନ୍ତୋଷ ଏବଂ ରୂପନଙ୍କୁ ଦିଲ୍ଲୀର ସଫଦରଜଙ୍ଗ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ସୂଚନା ଅନୁଯାୟୀ, ସୋନୁ ଏବଂ ସନ୍ତୋଷଙ୍କୁ ପ୍ରାଥମିକ ଚିକିତ୍ସା ପରେ ଡିସଚାର୍ଜ କରାଯାଇଥିବା ବେଳେ ରୂପନ ଏବେ ବି ସଫଦରଜଙ୍ଗରେ ଚିକିତ୍ସିତ ହେଉଛନ୍ତି । ଅନ୍ୟପକ୍ଷରେ ମୁକେଶ ଏବଂ ଅମିତଙ୍କ ଚିକିତ୍ସା MMG ଡାକ୍ତରଖାନାର ବର୍ଣ୍ଣ ୱାର୍ଡରେ ଜାରି ରହିଛି ।
ସତର୍କତା ଜରୁରୀ: ଏହି ଦିଗ ପ୍ରତି ଦିଅନ୍ତୁ ଧ୍ୟାନ
ଏହି ଦୁର୍ଘଟଣା ସାଧାରଣ ଲୋକଙ୍କ ପାଇଁ ଏକ ବଡ଼ ଶିକ୍ଷା । ଗ୍ୟାସ୍ ସିଲିଣ୍ଡର ବ୍ୟବହାର ସମୟରେ ନିମ୍ନଲିଖିତ ସାବଧାନତା ଅବଲମ୍ବନ କରିବା ଉଚିତ୍:
ରେଗୁଲେଟର ସାବଧାନତା: ପାଇପ୍ ବାହାର କରିବା ପୂର୍ବରୁ ସର୍ବଦା ରେଗୁଲେଟର ବନ୍ଦ ଅଛି କି ନାହିଁ ନିଶ୍ଚିତ କରନ୍ତୁ ।
ଗ୍ୟାସ୍ ଗନ୍ଧ: ଯଦି ଗ୍ୟାସ୍ ଗନ୍ଧ ହେଉଥାଏ, ତେବେ ଭୁଲରେ ବି ମାଚିସ୍, ଲାଇଟର କିମ୍ବା ବିଦ୍ୟୁତ୍ ସୁଇଚ୍ ଅନ୍ କରନ୍ତୁ ନାହିଁ ।
ବାୟୁ ଚଳାଚଳ: ଗ୍ୟାସ୍ ଲିକ୍ ହେଲେ ତୁରନ୍ତ ଘରର କବାଟ ଓ ଝରକା ଖୋଲି ଦିଅନ୍ତୁ ।
ନିଶାଦ୍ରବ୍ୟରୁ ଦୂରେଇ ରୁହନ୍ତୁ: ରୋଷେଇ ଘର କିମ୍ବା ଗ୍ୟାସ୍ ସିଲିଣ୍ଡର ପାଖରେ ବିଡ଼ି, ସିଗାରେଟ୍ ଟାଣନ୍ତୁ ନାହିଁ ।
ନିୟମିତ ଯାଞ୍ଚ: ସମୟ ସମୟରେ ଗ୍ୟାସ୍ ପାଇପ୍ ଏବଂ ରେଗୁଲେଟର ଠିକ୍ ଅଛି କି ନାହିଁ ଯାଞ୍ଚ କରନ୍ତୁ ।
ପୁଲିସ ଏହି ଘଟଣାର ତଦନ୍ତ କରୁଥିବା ବେଳେ ଏଭଳି ଅଘଟଣ ଯେପରି ପୁନରାବୃତ୍ତି ନହୁଏ ସେଥିପାଇଁ ସମସ୍ତଙ୍କୁ ସଚେତନ ରହିବାକୁ ପରାମର୍ଶ ଦିଆଯାଇଛି ।
