ନୂଆଦିଲ୍ଲୀ,୦୫/୧୨: ବାଂଲାଦେଶରେ ହସିନା ସରକାରର ପତନ ଏବଂ ୟୁନୁସ ସରକାର କ୍ଷମତାସୀନ ହେବା ପରେ ଲଗାତର ଭାବେ ହିନ୍ଦୁମାନଙ୍କୁ ଟାର୍ଗେଟ୍ କରାଯାଉଛି । ହିନ୍ଦୁ ଧର୍ମର ସାଧୁସନ୍ଥଙ୍କୁ ଗିରଫ କରାଯାଉଛି । ସେମାନଙ୍କ ଉପରେ ନଜର ରଖାଯିବା ସହ କୌଣସି କାର୍ଯ୍ୟ କରିବାକୁ ଦିଆଯାଉ ନାହିଁ । ସାଧାରଣ ହିନ୍ଦୁ ନାଗରିକଙ୍କୁ ବି ହମ୍ଲା ହେଉଛି । ଏହି ଘଟଣାକୁ ନେଇ ବ୍ରିଟେନ୍ ଓ ଆମେରିକା ଭଳି ଦେଶ ଗଭୀର ଚିନ୍ତାବ୍ୟକ୍ତ କରିଛନ୍ତି । ବ୍ରିଟେନ୍ର ସଂସଦରେ ଏହି ପ୍ରସଙ୍ଗ ଉଠିଛି । ବାଂଲାଦେଶରୁ ହିନ୍ଦୁଙ୍କୁ ସମ୍ପୂର୍ଣ୍ଣ ଭାବେ ହଟାଇଦେବା ପାଇଁ ମସୁଧା ଚାଲିଥିବା ବ୍ରିଟେନ୍ର ଜଣେ ସାଂସଦ କହିଛନ୍ତି ।
ରିପୋର୍ଟ ମୁତାବକ, ବ୍ରିଟିଶ ସଂସଦରେ ବୁଧବାର ବାଂଲାଦେଶ ପ୍ରସଙ୍ଗ ଉଠିଥିଲା । ବିରୋଧୀ କଞ୍ଜରଭେଟିଭ୍ ପାର୍ଟି ସାଂସଦ ବବ୍ ବ୍ଲାକ୍ମ୍ୟାନ୍ କହିଥିଲେ କି ବାଂଲାଦେଶରେ ଶେଖ ହସିନା କ୍ଷମତାରୁ ହଟିବା ପରେ ହିନ୍ଦୁମାନଙ୍କୁ ଦେଶରୁ ବିଦା କରିବା ଲାଗି ଉଦ୍ୟମ ହେଉଛି । ସେଠାରେ ହିନ୍ଦୁ ମନ୍ଦିର ଉପରେ ଆକ୍ରମଣ ସହ ଲୋକଙ୍କ ଘର ପୋଡ଼ି ଦିଆଯାଉଛି । ଏହି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦାୟିତ୍ୱ ବ୍ରିଟେନ୍ର । କାରଣ ସେମାନେ ହିଁ ବାଂଲାଦେଶକୁ ସ୍ୱାଧୀନ କରାଇଥିଲେ ।
ଏହା ଉପରେ ଜବାବ ଦେଇ ବ୍ରିଟେନ୍ର ବିଦେଶ ମନ୍ତ୍ରୀ କ୍ୟାଥେରିନ୍ ୱେଷ୍ଟ କହିଥିଲେ, ଆମେ ଭାରତର ଚିନ୍ତା ନେଇ ଭଲ ଭାବେ ଅବଗତ। ଗତ ସପ୍ତାହରେ ଆମେ ବାଂଲାଦେଶ ଯାଇଥିଲୁ । ଏହି ସମୟରେ ୟୁନୁସ ସରକାର ସଂଖ୍ୟାଲଘୁଙ୍କ ହିତକୁ ଗୁରୁତ୍ୱ ଦେବ ବୋଲି ଆମକୁ ପ୍ରତିଶ୍ରୁତି ଦେଇଥିଲା । କଞ୍ଜରଭେଟିଭ୍ ସାଂସଦ ପ୍ରୀତି ପଟେଲ କହିଛନ୍ତି,ବାଂଲାଦେଶରେ ହିଂସା ଜାରି ରହିଛି । ଏହାକୁ ସରକାର ରୋକିପାରୁ ନାହାନ୍ତି । ବାଂଲାଦେଶରେ ରହୁଥିବା ସଂଖ୍ୟାଲଘୁଙ୍କ ପାଇଁ ଆମର ଗଭୀର ସମବେଦନା । ବାଂଲା ସ୍ଥିତି ଉପରେ ସରକାର ନଜର ରଖିଥିବା ଲେବର ପାର୍ଟି ସାଂସଦ ବ୍ୟାରୀ ଗାର୍ଡିନର୍ କହିଛନ୍ତି ।
ଆମେରିକା ମଧ୍ୟ ବାଂଲାଦେଶରେ ହିନ୍ଦୁ ଓ ସଂଖ୍ୟାଲଘୁଙ୍କ ଉପରେ ହେଉଥିବା ଆକ୍ରମଣକୁ ନେଇ ଚିନ୍ତା ପ୍ରକଟ କରିଛି । ବିଦେଶ ମନ୍ତ୍ରଣାଳୟ ଉପ ମୁଖପାତ୍ର ବେଦାନ୍ତ ପଟେଲ କହିଛନ୍ତି, ବାକ୍ ସ୍ୱାଧୀନତା ଓ ମୌଳିକ ଅଧିକାରକୁ ସମ୍ମାନ ଦେବା ପ୍ରତ୍ୟେକସରକାରର କାର୍ଯ୍ୟ । ହେଲେ ବାଂଲାଦେଶରେ ସେଭଳି ଘଟୁନାହିଁ । ସଂଖ୍ୟାଲଘୁଙ୍କ ସୁରକ୍ଷା କରିବା ସରକାରଙ୍କ ଦାୟିତ୍ୱ । ଗିରଫ ହୋଇଥିବା ଲୋକମାନଙ୍କୁ ନିଜ ପକ୍ଷ ରଖିବା ପାଇଁ ସୁଯୋଗ ଦେବା ଉଚିତ । ମାନବାଧିକାର ଆଧାରରେ ସମସ୍ତଙ୍କ ସହ ଉଚିତ ବ୍ୟବହାର ପ୍ରଦର୍ଶନ କରାଯିବା ଆବଶ୍ୟକ।
ଉଲ୍ଲେଖଯୋଗ୍ୟ, ବାଂଲାଦେଶରେ ଇସ୍କନର ପ୍ରମୁଖ ପୂର୍ବ ନେତା ଚିନ୍ମୟ କୃଷ୍ଣ ଦାସଙ୍କୁ ଗତ ସପ୍ତାହରେ ରଙ୍ଗପୁରରେ ହିନ୍ଦୁ ସମୁଦାୟଙ୍କ ସମର୍ଥନରେ ବିରୋଧ ପ୍ରଦର୍ଶନ ପରେ ଗିରଫ କରାଯାଇଥିଲା । ତାଙ୍କୁ ରାଜଧାନୀ ଢାକାରୁ ଗିରଫ କରାଯାଇ ତାଙ୍କ ବିରୋଧରେ ଦେଶଦ୍ରୋହ ଅଭିଯୋଗ ଅଣାଯାଇଥିଲା । ନଭେମ୍ବର ୨୬ରେ ଢାକାର ଏକ ଅଦାଲତ ତାଙ୍କ ଜାମିନ ଆବେଦନ ଖାରଜ କରିଦେଇଥିଲେ । ଏହାପରେ ଦେଶରେ ବିବାଦ ବଢ଼ିଯାଇଥିଲା । ବାଂଲାଦେଶରେ ହିନ୍ଦୁ ସଙ୍ଗଠନ ସନାତନୀ ଜାଗରଣ ଜୋତର ଅଭିଯୋଗ ମୁତାବକ, ୟୁନୁସ ସରକାର ୭୦ ହିନ୍ଦୁ ଓକିଲଙ୍କୁ ମନମୁଖି ଭାବେ ଫସାଇଛି । ଏହାଦ୍ୱାରା ଚିନ୍ମୟ ପ୍ରଭୁଙ୍କ ତରଫରୁ କେହି ମାମଲା ଲଢ଼ିପାରିବେ ନାହିଁ ।
