ବଲାଙ୍ଗିର, ୨/୦୬ : ଦୋକାନ ସଟର ଭାଙ୍ଗି ଲୁଟିନେଲେ ୩୦ ହଜାର ଟଙ୍କାର ସାମଗ୍ରୀ। ଶନିବାର ବିଳମ୍ଵିତ ରାତିରେ ବଲାଙ୍ଗିର ଜିଲ୍ଲା ମୁରିବାହାଲ ଥାନା ହଳଦୀ ପଞ୍ଚାୟତ ସଦର ମହମୁକମାର ବଜାର ଛକରେ ଥିବା ଅନୀଲ କୁମାର ହାତୀଙ୍କ ଦୋକାନରୁ ଲୁଟ୍ ହୋଇଛି। ଏନେଇ ସେ ଥାନାରେ ଅଭିଯୋଗ କରିଛନ୍ତି। ପୁଲିସ ତଦନ୍ତ ଆରମ୍ଭ କରିଛି।
ସୂଚନାନୁଯାୟୀ, ହଳଦୀ ଗ୍ରାମର ସନମତ ହାତୀଙ୍କ ପୁଅ ଅନୀଲ କୁମାର ହାତୀ(୩୧ ବର୍ଷ) ବଜାର ଛକରେ ଏକ କିରାନା(ପାନ)ଦୋକାନ ଦେଇଛନ୍ତି। ଶନିବାର ରାତି ସାଢ଼େ ୯ଟାରେ ସେ ଦୋକାନ ବନ୍ଦ କରି ଘରକୁ ଚାଲି ଯାଇଥିଲେ। ମଧ୍ୟରାତ୍ରୀରେ ତାଙ୍କ ଦୋକାନର ସଟର ଭାଙ୍ଗି କେହି ଦୁର୍ବୃତ୍ତ ବିଭିନ୍ନ ସାମଗ୍ରୀ ଲୁଟି ନେଇଥିଲେ। ସକାଳୁ ଅନୀଲ ଦୋକାନ ଖୋଲିବାକୁ ଆସି ଲୁଟ୍ ହୋଇଥିବା ନେଇ ଜାଣିଥିଲେ। ଏନେଇ ସେ ସ୍ଥାନୀୟ ହଳଦୀ ସମିତି ସଭ୍ୟ ଟୁନାମଣି ମହାନନ୍ଦଙ୍କ ସହ ଆସି ଥାନାରେ ଏକ ଲିଖିତ ଅଭିଯୋଗ କରିଥିଲେ।
ଲୁଟ୍ ହୋଇଥିବା ସମସ୍ତ ସାମଗ୍ରୀର ଆନୁମାନିକ ମୂଲ୍ୟ ୩୦ହଜାର ଟଙ୍କା ହେବ ବୋଲି ଜଣାପଡିଛି। ଅନୀଲଙ୍କ ଦୋକାନରେ ତୃତୀୟ ଥର ପାଇଁ ଚୋରି ହୋଇଥିବା ସେ ଏତଲାରେ ଉଲ୍ଲେଖ କରିଛନ୍ତି। ଅନୀଲଙ୍କ ଏତଲା ଆଧାରରେ ପୁଲିସ ହଳଦୀ ବଜାର ଛକରେ ଥିବା ଦୋକାନରେ ପହଞ୍ଚି ତଦନ୍ତ କରିଛି। ଏ ସମ୍ପର୍କରେ ଏକ ମାମଲା ରୁଜ୍ଜୁ କରାଯାଇ ଅଧିକ ତଦନ୍ତ ଜାରି ରହିଛି ବୋଲି ଥାନା ଆଇଆଇସି ସିପୋରା ସରାୟ ଲୁଗୁନ ପ୍ରକାଶ କରିଛନ୍ତି ।
