ନୂଆଦିଲ୍ଲୀ: ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ୨୫% ଟାରିଫ ଏବଂ ରୁଷିଆରୁ ତୈଳ ଓ ସାମରିକ ସାମଗ୍ରୀ କ୍ରୟ ପାଇଁ ଅତିରିକ୍ତ ଦଣ୍ଡ ଲଗାଇବା ଧମକ ସତ୍ତ୍ୱେ, ଭାରତ ରୁଷିଆରୁ ତୈଳ ଆମଦାନୀ ଜାରି ରଖିବ ବୋଲି ଅଧିକାରୀମାନେ ସୂଚନା ଦେଇଛନ୍ତି।
ଏନେଇ ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି, “ଭାରତର ଶକ୍ତି କ୍ରୟ ଜାତୀୟ ସ୍ୱାର୍ଥ ଓ ବଜାର ଶକ୍ତି ଉପରେ ନିର୍ଭର କରେ। ରୁଷିଆ ସହ ଆମର ସମ୍ପର୍କ ସ୍ଥିର ଓ ଦୀର୍ଘକାଳୀନ।” ୨୦୨୨ରେ ୟୁକ୍ରେନ ଯୁଦ୍ଧ ପରେ ରୁଷିଆ ରିହାତି ଦରରେ ତୈଳ ଯୋଗାଇଥିଲା। ଯାହା ବର୍ତ୍ତମାନ ଭାରତର ମୋଟ ତୈଳ ଆମଦାନୀର ୩୫-୪୦% ପୂରଣ କରୁଛି, ଯାହା ପୂର୍ବରୁ ମାତ୍ର ୦.୨% ଥିଲା।
ଟ୍ରମ୍ପ ଦାବି କରିଛନ୍ତି ଯେ ଭାରତ ରୁଷିଆରୁ ଶସ୍ତା ତୈଳ କିଣି ବଜାରରେ ବିକ୍ରି କରି ଲାଭ କରୁଛି, ଯାହା ୟୁକ୍ରେନ ଯୁଦ୍ଧକୁ ସମର୍ଥନ କରୁଛି। ସେ ଟ୍ରୁଥ ସୋସିଆଲରେ ଲେଖିଛନ୍ତି, “ଭାରତ ରୁଷିଆରୁ ବିପୁଳ ପରିମାଣରେ ତୈଳ କିଣୁଛି ଓ ଲାଭ କରୁଛି। କିନ୍ତୁ ୟୁକ୍ରେନରେ ଯୁଦ୍ଧ ଯନ୍ତ୍ରଣାକୁ ଖାତିର କରୁନାହିଁ।” ଭାରତ ଏହାକୁ ଅଯୌକ୍ତିକ ଯୁକ୍ତି କହିବା ସହ ଏହାର ଖଣ୍ଡନ କରିଛି।
ଭାରତ ଏନେଇ କହିଛି ଯେ ୟୁକ୍ରେନ ଯୁଦ୍ଧ ପରେ ପାରମ୍ପରିକ ଯୋଗାଣକାରୀ ଦେଶମାନେ ଇଉରୋପ ଆଡକୁ ମୁହାଁଇବାରୁ ରୁଷିଆ ତୈଳ ଉପରେ ନିର୍ଭର କରାଯାଇଥିଲା। ଯାହା ବିଶ୍ୱ ତୈଳ ମୂଲ୍ୟ ନିୟନ୍ତ୍ରଣରେ ସହାୟକ ହୋଇଥିଲା। ଭାରତ ଋଷିଆର ଏକ ମିତ୍ର ରାଷ୍ଟ୍ର ଓ ଋଷିଆ ଭାରତକୁ ରିହାତି ଦରରେ ତୌଳ ପ୍ରଦାନ କରୁଛି। ଭାରତ କାହା କଥା ଶୁଣିବା ପୂର୍ବରୁ ପ୍ରଥମେ ଜାତୀୟ ସ୍ୱାର୍ଥକୁ ପ୍ରାଥମିକତା ଦେବ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ “ମେକ୍ ଇନ୍ ଇଣ୍ଡିଆ”କୁ ପ୍ରୋତ୍ସାହନ ଦେଇ ସ୍ଥାନୀୟ ଉତ୍ପାଦ କିଣିବାକୁ ଆହ୍ୱାନ ଦେଇଛନ୍ତି। ଭାରତ ଆମେରିକୀୟ କୃଷି ଓ ଦୁଗ୍ଧ ଜାତୀୟ ଉତ୍ପାଦର କାରବାର ପାଇଁ ବଜାର ଖୋଲିବାକୁ ମନା କରିଛି। ପେଟ୍ରୋଲିୟମ ମନ୍ତ୍ରୀ ହରଦୀପ ସିଂ ପୁରୀ କହିଛନ୍ତି, “ଆମେ ୪୦ଟି ଦେଶରୁ ତୈଳ ଆମଦାନୀ କରୁଛୁ। ରୁଷିଆ ତୈଳ ବନ୍ଦ ହେଲେ ଅନ୍ୟ ଦେଶ ଏହାକୁ ପୂରଣ କରିପାରିବେ।” ତେବେ, ଦୀର୍ଘମିଆଦୀ ଚୁକ୍ତି ଓ ଲଜିଷ୍ଟିକ୍ସ ଯୋଗୁଁ ରୁଷିଆ ତୈଳ ଆମଦାନୀ ତୁରନ୍ତ ବନ୍ଦ କରିବା କଷ୍ଟକର।
ଟ୍ରମ୍ପଙ୍କ ଏହି ମନମୁଖି ନୀତି ଭାରତ-ଆମେରିକା ସମ୍ପର୍କରେ ଚାପ ସୃଷ୍ଟି କରୁଛି। କିନ୍ତୁ ଭାରତ ଜାତୀୟ ସ୍ୱାର୍ଥ ଓ ଅର୍ଥନୈତିକ ସ୍ଥିରତାକୁ ଅଗ୍ରାଧିକାର ଦେଇ ରୁଷିଆଠୁ ତୈଳ ଆମଦାନୀ ଜାରି ରଖିବ ବୋଲି ଘୋଷଣା କରିଛି।
