ନୂଆଦିଲ୍ଲୀ, ୦୯/୦୫: ଘର ବୁଡ଼ି ପାଣି ଆଣ୍ଠୁଏ, ତଥାପି ଛାଡ଼ୁନି ପାକିସ୍ତାନର ମୁହଁ ଫୁଟାଣି। ଭାରତ ଆକ୍ସନରେ ପାକିସ୍ତାନ ଚିତ୍। ଅପରେସନ ସିନ୍ଦୁର ଇଫେକ୍ଟ୍ରେ ପାକିସ୍ତାନ ଧ୍ଵସ୍ତ ବିଧ୍ଵସ୍ତ। ଭାଙ୍ଗି ଗଲାଣି ଆତଙ୍କୀସ୍ତାନର ଅଣ୍ଟା। ଏବେ ଯୁଦ୍ଧ ଲଢିବାକୁ ଭିକ ମାଗୁଛି କାଙ୍ଗାଳିସ୍ତାନ। ସୋସିଆଲ ମିଡିଆରେ ନିଜ ବନ୍ଧୁ ରାଷ୍ଟ୍ରଙ୍କୁ ଏବେ ମାଗୁଛି ଭିକ। ଋଣ ପାଇଁ କରୁଛି ଗୁହାରୀ। ପଦାରେ ପାଡ଼ିଲା ପାକିସ୍ତାନର ସତ। ପାକିସ୍ତାନ ଅର୍ଥନୈତିକ ମନ୍ତ୍ରାଳୟ ପକ୍ଷରୁ ସୋସିଆଲ୍ ମିଡିଆରେ ଏନେଇ ପୋଷ୍ଟ କରାଯାଇଛି। ଏବେ ସାରା ବିଶ୍ଵ ଆଗରେ ଲଜ୍ଜିତ ହେବା ଭୟରେ ପାକିସ୍ତାନ ମୁହଁ ଲୁଚାଉଛି। ସୋସିଆଲ୍ ମିଡିଆ ହ୍ୟାକ୍ ହୋଇଯାଇଥିଲା ବୋଲି ସଫେଇ ଦେଉଛି। ଏନେଇ ଜଣେ ପାକିସ୍ତାନୀ ମନ୍ତ୍ରୀ କହିଛନ୍ତି ଯେ, ତାଙ୍କର ସୋସିଆଲ୍ ମିଡିଆ ହ୍ୟାକ୍ ହୋଇ ଯାଇଛି। ସେମାନେ ଏହି ପୋଷ୍ଟ କରି ନାହାଁନ୍ତି। ଆକାଉଣ୍ଟକୁ ବନ୍ଦ କରିବା ପାଇଁ ଚେଷ୍ଟା ଚାଲିଛି।
ପାକିସ୍ତାନ ଯେତେ ଲୁଚାଇଲେ ବି ତାର ଆର୍ଥିକ ସ୍ଥିତି ନେଇ କାହାକୁ ଅଛପା ନାହିଁ। କାରଣ ଏବେ ଭୋକରେ ଡହଳ ବିକଳ ହେଉଥିବା ପାକିସ୍ତାନ ଆଇଏମଏଫ୍ ଠାରୁ ଋଣ ନେବାକୁ ଚେଷ୍ଟା କରୁଛି। ଭାରତ ସହ ଯୁଦ୍ଧ ଲଢିବାକୁ ତା ପାଖରେ ସମ୍ବଳ ନାହିଁ। ଖାଦ୍ୟ ତଥା ଅର୍ଥନୀତିକୁ ଚଳାଇବା ପାଇଁ ଆଇଏମ୍ଏଫ୍ଠାରୁ ଭିକ୍ଷା ମାଗି ଚାଲିଛି। ବର୍ତ୍ତମାନ ଆଇଏମ୍ଏଫ୍ ଋଣ ଅର୍ଥାତ୍ ବେଲ୍ଆଉଟ୍ ପ୍ୟାକେଜ୍ ନେବା ଜିଇଁବା ମରିବା ସହ ସମାନ। ମୁଦ୍ରାସ୍ଫୀତି ଏବଂ ଖାଦ୍ୟ ସଂକଟ ମଧ୍ୟରେ ଫସିଥିବା ପାକିସ୍ତାନକୁ ନିଜର ମୋଟା ଋଣର ସୁଧ ମଧ୍ୟ ପରିଶୋଧ କରିବାକୁ ପଡ଼ିବ। ଏଥିପାଇଁ ଟଙ୍କା ଦରକାର । ଯଦି ଏହାକୁ ଆଇଏମ୍ଏଫ୍ରୁ ସହାୟତା ନ ମିଳେ ତେବେ ଏହା ଋଣ ଖିଲାପ କରିବାକୁ ବାଧ୍ୟ ହେବ । ଖାଲି ସେତିକି ନୁହେଁ, ପାକିସ୍ତାନକୁ ଭାରତ ସହ ସୈନ୍ୟ ସଂଘର୍ଷ ପାଇଁ ବି ଟଙ୍କା ଲୋଡ଼ା। ପାକିସ୍ତାନର ଖାଲି ଭଣ୍ଡାର ପାଇଁ ବର୍ତ୍ତମାନ ଆଇଏମ୍ଏଫ୍ ଋଣ ହିଁ କେବଳ ସାହା ଭରସା ।
ପହଲଗାମ୍ ଆକ୍ରମଣର ପ୍ରତିଶୋଧ ନେଇଥିଲା ଭାରତୀୟ ସେନା । ପାକିସ୍ତାନରେ ଥିବା ଆତଙ୍କୀ ଆଡ୍ଡା ଉପରେ ଏୟାରଷ୍ଟ୍ରାଇକ୍ କରିଥିଲା ଭାରତ । ଯେଉଁଥିରେ ଶତାଧିକ ଆତଙ୍କୀ ନିପାତ ହୋଇଥିଲେ । ଯାହାର ଜବାବରେ ପାକିସ୍ତାନ ମଧ୍ୟ ଆକ୍ରମଣ ପାଇଁ ଉଦ୍ୟମ କରିଥିଲା । ଯାହାକୁ ପଣ୍ଡ କରିଦେଇଛି ଭାରତୀୟ ସେନା। ଗୁରୁବାର ଦିନ ସକାଳ ସମୟରେ ଭାରତୀୟ ସୀମାରେ ପାକିସ୍ତାନୀ ଡ୍ରୋନ୍ ପ୍ରବେଶ ଉଦ୍ୟମ କରୁଥିବା ବେଳେ ଡିଫେନ୍ସ ସିଷ୍ଟମ ଏହାକୁ ନଷ୍ଟ କରିଥିଲା । ତାପରେ ବି ସୁଧୁରିନଥିଲା ପାକିସ୍ତାନ । ବିଳମ୍ବିତ ରାତିରେ ଭାରତୀୟ ସୀମାରେ ପ୍ରବେଶ ପାଇଁ ଉଦ୍ୟମ କରିଥିଲା ପାକିସ୍ତାନ ଫାଇଟର ଜେଟ୍ । ହେଲେ ତାହା ବି ଫେଲ୍ ମାରିଥିଲା। ପାକିସ୍ତାନର ତିନୋଟି ଫାଇଟର ଜେଟ୍କୁ ମାରି ଖସାଇଥିଲା ଭାରତୀୟ ସେନା । ତେବେ ଭାରତର ଏହି ଆକ୍ରମଣ ପାକିସ୍ତାନରେ ବଡ଼ଧରଣର କ୍ଷତି ହୋଇଛି । ଯାହାକୁ ପୂରଣ ପାଇଁ ବିଶ୍ୱ ସମୁଦାୟ ଆଗରେ ଋଣର ଭିକ ମାଗିଲାଣି ପାକିସ୍ତାନ । ଅର୍ଥନୈତିକ ମନ୍ତ୍ରାଳୟ ପକ୍ଷରୁ ହୋଇଥିବା ପୋଷ୍ଟ ଅନୁସାରେ ଭାରତର ଏହି ଆକ୍ରମଣରେ ଆମର ବହୁତ ପରିମାଣର କ୍ଷତି ହୋଇଛି । ଆମକୁ ଏଥିରୁ ବାହାରିବାକୁ ସହଯୋଗ ଦରକାର । ତେଣୁ ବିଶ୍ୱ ସମୁଦାୟ ଆଗରେ ଋଣ ମାଗୁଛି ।
