ପାଣିକୋଇଲି ୦୪/୧୨: ଯାଜପୁର ପୁଲିସକୁ ବଡ ସଫଳତା। କଠୋର ପ୍ରୟାସ ପରେ ଗତ ୬ ମାସ ଧରି ଯାଜପୁର ଜିଲ୍ଲାରେ ଚୋରି ଘଟଣାରେ ସମ୍ପୃକ୍ତ ୧୪ ଜଣଙ୍କୁ ଗିରଫ କରାଯାଇଛି। ଅଭିଯୁକ୍ତମାନେ ଏକ ଗ୍ୟାଙ୍ଗ ଗଠନ କରି ମାର୍ଚ୍ଚ ମାସରୁ ଧର୍ମଶାଳା, କୁଆଖିଆ, ବ୍ରହ୍ମବରଦା, ଚଣ୍ଡିଖୋଲ ଏବଂ ବାଲିଚନ୍ଦ୍ରପୁର ଥାନା ଅଞ୍ଚଳରେ ଲୋକଙ୍କ ଘରେ ପଶି ସୁନା, ରୁପା ଅଳଙ୍କାର, ନଗଦ ଟଙ୍କା ଇତ୍ୟାଦି ଚୋରି କରୁଥିଲେ। ବିଶ୍ୱସ୍ତ ସୂତ୍ରରୁ ଏମାନଙ୍କ ବିଷୟରେ ସୂଚନା ପାଇ ଯାଜପୁର ଏସପିଙ୍କ ନିର୍ଦ୍ଦେଶ ଅନୁଯାୟୀ, ଅଭିଯୁକ୍ତମାନଙ୍କୁ ଗିରଫ କରିବା ଏବଂ ଚୋରି ସାମଗ୍ରୀ ଉଦ୍ଧାର କରିବା ପାଇଁ ଏକାଧିକ ଦଳ ଗଠନ କରାଯାଇଥିଲା। ଚଢାଉ କରୁଥିବା ଦଳଗୁଡ଼ିକର ପ୍ରୟାସ ଯୋଗୁ ଅଭିଯୁକ୍ତ ଏବଂ ଗ୍ରହଣକାରୀଙ୍କୁ ଗିରଫ କରାଯାଇଥିଲା ଏବଂ ସେମାନଙ୍କଠାରୁ ଚୋରି ହୋଇଥିବା ଜିନିଷପତ୍ର ଉଦ୍ଧାର କରାଯାଇଛି।
ଗିରଫ ଲୁଟେରା ହେଲେ ବାଲିଚନ୍ଦ୍ରପୁର ଥାନା ଚାରିନଙ୍ଗଳ ଗ୍ରାମର ସେକ ଅଲିମୁଦ୍ଦିନ (୨୪), ରହିମ ଖାଁ (୨୦), ସେକ ଏମା ଉଦ୍ଦିନ (୧୯), ସେକ ମୁସ୍ତାକିମ ଅଲ୍ଲୀ (୪୨), ଖଡକପୁର ଗ୍ରାମର ସୌମ୍ୟ ରଂଜନ ବେହେରା (୨୯), କେନ୍ଦ୍ରାପଡ଼ା ଜିଲ୍ଲା ପାଟକୁରାର ରାଜୁ ଖାଁ (୩୩), କେନ୍ଦ୍ରାପଡ଼ା ଥାନା ଜୟପୁରର ସେକ ମେହେତାବ (୨୮), ମାଣ୍ଡିଆର ସେକ ଚାନ୍ଦ (୨୬) ଓ ଡେରାବିଶ ଥାନା ଦରାବୁଲର ଗୌତମ ଜେନା (୨୮) ଓ କ୍ରେତା ବାଲିଚନ୍ଦ୍ରପୁର ଥାନା ନାନପୁରପାଟଣା ଗ୍ରାମର ଜନ୍ମଜେୟ ସାହୁ (୨୯), ପୁରୀଘାଟ ଥାନା ନୟସଡ଼କର ଅମଲ ସେଠ, ଲାଲବାଗ ଥାନା ଜଗନ୍ନାଥ ବଲ୍ଲଭର ବିକ୍ରମ ବେହେରା ଓ କଟକ ଟାଇଙ୍କର ଗ୍ରାମର ପବିତ୍ର ସେଠି ବୋଲି ସୂଚନା ମିଳିଛି। ସେମାନଙ୍କ ନିକଟରୁ ୨୨୫.୦୯ ଗ୍ରାମର ସୁନା, ୨.୩୦୯ କେଜି ରୁପା, ଗୋଟିଏ ବୋଲେରୋ, ଦୁଇଟା ବାଇକ, ୧୫ଟି ମୋବାଇଲ ଫୋନ, ୫ଲକ୍ଷ ୯୦ହଜାର ୫ ଶହ ଟଙ୍କା ସହ ମାରଣାସ୍ତ୍ର ଜବତ କରାଯାଇଥିବା କେନ୍ଦ୍ରାଞ୍ଚଳ ଡିଆଇଜି ସୂଚନା ଦେଇଛନ୍ତି l
