ଖୋଲ୍ଲିକୋଟ,୦୯/୦୧: ଅଳିଆ ପକାଇବାକୁ ନେଇ ତୁମୁଳକାଣ୍ଡ । ପଥରା ଗାଁର କଣ୍ଡରା ସାହି ଏବଂ ଓଡ଼ିଆ ଆଲପୁର ଗାଁ ଲୋକଙ୍କ ମଧ୍ୟରେ ଗୋଷ୍ଠୀ ସଂଘର୍ଷ । ଗୋଷ୍ଠୀ ସଂଘର୍ଷରେ ଓଡ଼ିଆ ଆଲପୁର ଗାଁର ୩ ଜଣ ଆହତ ହୋଇଛନ୍ତି । ବାଇକ ଭଙ୍ଗାରୁଜା ସହ କିଛି ଘରର ଆଜବେଷ୍ଟ ଭାଙ୍ଗିଥିବା ନେଇ ମଧ୍ୟ ଅଭିଯୋଗ ହୋଇଛି । ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ଅନ୍ତର୍ଗତ ପଥରା ଗାଁରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ବୁଧବାର ରାତିରେ ପଥରା କଣ୍ଡରା ସାହିର କିଛି ବ୍ୟକ୍ତି ଟ୍ରାକ୍ଟରରେ ଅଳିଆ ଆବର୍ଜନା ଆଣି ଓଡ଼ିଆ ଆଲପୁର ଗାଁର ଜନବସତି ସ୍ଥାନରେ ଅଳିଆ ପକାଇ ଥିଲେ । ଏହାକୁ ଓଡ଼ିଆ ଆଲପୁର ଗାଁର କିଛି ଲୋକେ ବିରୋଧ କରିଥିଲେ । ଏହାରି ମଧ୍ୟରେ ଉଭୟ ଗାଁର ଲୋକେ ଗାଳିଗୁଲଜ ସହ ହାତାହାତି ହେବା ପରେ ଠେଲା ମାଡ଼ ହୋଇଥିଲା । ଏହା ଦେଖି ଗାଁଲୋକେ ଖଲ୍ଲିକୋଟ ଥାନା ଭେଜିପୁଟ ଫାଣ୍ଡିରେ ଅଭିଯୋଗ କରିଥିଲେ । ଅଭିଯୋଗ ପରେ ଭେଜିପୁଟ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚିଥିଲା । ସେଠାରେ ପହଞ୍ଚି ବୁଝାସୁଝା ସହ ଘଟଣାର ତଦନ୍ତ ଜାରି ରଖିଛି ପୋଲିସ ।
