ମାଲକାନଗିରି, ୧୬/୧୧ : ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ ରାଜ୍ୟ କାଂକେର ଜିଲ୍ଲାରେ ପୋଲିସ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ଘଟି ୫ମାଓବାଦୀଙ୍କ ମୃତ୍ୟୁ ଘଟିଥିବା ଜଣାପଡ଼ିଛି । ସୂଚନା ଅନୁଯାୟୀ ଆଜି ସକାଳେ ଛତିଶଗଡ କାଂକେର ଜିଲ୍ଲା ସୀମାନ୍ତବର୍ତ୍ତୀ ଓ ନାରାୟଣପୁର ଅଂଚଳ ନିକଟ ଜଙ୍ଗଲ ଅଭୁଜମାଡ ଜଙ୍ଗଲରେ ସି.ଆର୍.ପି.ଏଫ୍., ଡିଆରଜି ଓ ନାରାୟଣପୁର ପୋଲିସ ମିଳିତ ଭାବେ କୁମ୍ବିଂ ଅପରେସନ କରୁଥିବା ସମୟରେ ମାଓବାଦୀମାନେ ପୋଲିସ ଆସୁଥିବା ଜାଣିବାକୁ ପାଇ ପୋଲିସ ଉପରେ ଗୁଳି ଚାଳନା କରିଥିଲେ । ପାଲଟା ଜବାବରେ ଯବାନ ଓ ପୋଲିସମାନେ ମଧ୍ୟ ଗୁଳି ଚାଳନା କରିଥିଲେ । ଦୀର୍ଘ ସମୟ ଧରି ଉଭୟ ପଟରୁ ଗୁଳି ବିନିମୟ ହୋଇଥିଲା ।
ମାଓବାଦୀମାନେ ଘଟଣାସ୍ଥଳରୁ ଛତ୍ରଭଙ୍ଗ ଦେଇଥିବାବେଳେ ଯବାନ ଓ ପୋଲିସମାନେ ତଲାସି କରୁଥିବା ସମୟରେ ଘଟଣାସ୍ଥଳରୁ ୫ଜଣ ମାଓବାଦୀଙ୍କ ମୃତ ଶରୀରକୁ ଠାବ କରିବା ସହ ବିପୁଳ ପରିମାଣର ଅସ୍ତ୍ରଶସ୍ତ୍ର ମଧ୍ୟ ଜବତ କରିଥିବା ଜଣାପଡିଛି । ଏଥିସହ ଦୁଇ ଯବାନ ସାମାନ୍ୟ ଆହତ ହୋଇଥିଲେ । ଆହତ ଯବାନଙ୍କୁ ରାୟପୁର ଚିକିତ୍ସାଳୟକୁ ଚିକିତ୍ସା ନିମନ୍ତେ ସ୍ଥାନାନ୍ତର କରାଯାଇଥିବା ଜଣାପଡିଛି । ତେବେ ବର୍ତ୍ତମାନ ସୁଦ୍ଧା ଉକ୍ତ ଅଂଚଳରେ କୁମ୍ବିଂ ଅପରେସନ ଜାରି ରହିଥିବାବେଳେ କୁମ୍ବିଂ ଅପରେସନ ସାରି ଫେରିବା ପରେ ସମ୍ପୂର୍ଣ୍ଣ ବିବରଣୀ ଓ ମୃତ ମାଓବାଦୀଙ୍କୁ ପରିଚୟ ପ୍ରଦାନ କରାଯିବ ବୋଲି ଛତିଶଗଡ ବସ୍ତର ଆଇଜି ପି. ସୁନ୍ଦରାଜ ସୂଚନା ଦେଇଛନ୍ତି ।
