ମୁମ୍ବାଇ ୨୭/୧୦: ବଲିଉଡରେ ୫୦୦ ରୁ ଅଧିକ ଫିଲ୍ମରେ ତାଙ୍କ ସ୍ୱରର ଯାଦୁ ବିସ୍ତାର କରିଥିବା ଗାୟିକା ଅନୁରାଧା ପୌଡୱାଲ। ଆଜି ତାଙ୍କର ୭୦ ତମ ଜନ୍ମଦିନ ପାଳନ କରୁଛନ୍ତି। ଅନୁରାଧା ୪ ବର୍ଷ ବୟସରେ ନିମୋନିଆରେ ପୀଡିତ ହୋଇଥିଲେ। ଯେଉଁ କାରଣରୁ ସେ ନିଜର ସ୍ୱର ହରାଇଥିଲେ। କିନ୍ତୁ ଅନୁରାଧା ନିଜ ଦମ୍ରେ ବଲିଉଡରେ ଏଣ୍ଟ୍ରି କରି ଧୁମ୍ ମଚାଇଥିଲେ। ପାଖାପାଖି ୧୫୦ ରୁ ଅଧିକ ସୁପରହିଟ୍ ଗୀତ ଗାଇବା ପରେ ଯେବେ ଅନୁରାଧା ସଙ୍ଗୀତ ଜଗତରେ ରକଷ୍ଟାର ପାଲଟିଗଲେ, ହଠାତ୍ ଫିଲ୍ମ ଇଣ୍ଡଷ୍ଟ୍ରିରୁ ବିଦାୟ ନେଇଥିଲେ। ତାଙ୍କର ଏହି ନିଷ୍ପତ୍ତି ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା। ଏହା ପରେ ସେ ଭଗବାନଙ୍କ ଆଶ୍ରୟ ନେଲେ ଏବଂ ବର୍ତ୍ତମାନ କେବଳ ଭଜନ ଗାଉଛନ୍ତି ।
୧୯୯୦ ରେ ରିଲିଜ୍ କରିଥିବା ଫିଲ୍ମ ଆଶିକିର ସମସ୍ତ ୯ ଟି ଗୀତ ସୁପରହିଟ୍ ଥିଲା । ୯୦ ଦଶକରେ କ୍ରମାଗତ ୩ ଫିଲ୍ମଫେୟାର ପୁରସ୍କାର ଜିତି ଅନୁରାଧା ସମସ୍ତଙ୍କୁ ନିଜର ପ୍ରତିଭା ପ୍ରଦର୍ଶନ କରିଥିଲେ। ୧୯୭୩ ମସିହାରେ ଅନୁରାଧା ଫିଲ୍ମ 'ଅଭିମାନ' ରୁ କ୍ୟାରିୟର ଆରମ୍ଭ କରିଥିଲେ। ତେବେ ଏହାପୂର୍ବରୁ ସେ ୧୯୬୮ ଫିଲ୍ମ 'କୃଷ୍ଣ ଭକ୍ତ ସୁଦାମା'ରେ ଏକ ଗୀତ ଗାଇଥିଲେ। ଏହା ପରେ ସେ ଜାନେମନ, ଉଧାର କା ସିନ୍ଦୂର, ଲୈଲା ମଜନୁ, ସରଗମ ଏବଂ ଏକ ହି ରିସ୍ତା ଭଳି ଅନେକ ସୁପରହିଟ୍ ଫିଲ୍ମରେ ନିଜର ସ୍ୱର ଦେଇଛନ୍ତି। କିନ୍ତୁ ଜଣେ ପୁରୋହିତଙ୍କ ପରାମର୍ଶରେ ଅନୁରାଧା ତାଙ୍କ କ୍ୟାରିୟରର ଶିଖରରେ ଫିଲ୍ମ ଜଗତକୁ ବିଦାୟ ଦେଇଥିଲେ। ଏହା ନିଜେ ଗାୟିକା ଖୁଲାସା କରିଥିଲେ।
କିଛି ବର୍ଷ ପୂର୍ବେ ଡିଜିୟାନାଙ୍କୁ ଦେଇଥିବା ଏକ ସାକ୍ଷାତକାରରେ ଅନୁରାଧା କହିଥିଲେ, 'ମୁଁ ପିଲାଦିନରୁ ଭଗବାନଙ୍କର ଜଣେ ଭକ୍ତ ଥିଲି ଏବଂ ପୂଜା ପାଠ କରୁଥିଲି। ଯେତେବେଳେ ମୁଁ ଚତୁର୍ଥ ଶ୍ରେଣୀରେ ପଢୁଥିଲି, ସେତେବେଳେ ମୋତେ ନିମୋନିଆ ହୋଇଥିଲା। ମୁଁ ଏଥିରେ ସ୍ୱର ହରାଇଥିଲି । ହେଲେ, ଭଗବାନଙ୍କ କୃପାରୁ ତାହା ଫେରି ଆସିଲା। ମୁଁ ଦିନେ ମନ୍ଦିରକୁ ଗଲି। ଏଠାରେ ପୁରୋହିତ ମୋତେ ପଚାରିଲେ ତୁମେ ଭଜନ ଗୀତ କାହିଁକି କରୁନାହଁ? ଏହି ଜିନିଷ ମୋ ଉପରେ ଗଭୀର ପ୍ରଭାବ ପକାଇଲା । ଏହା ପରେ ମୁଁ ଫିଲମ ଜଗତକୁ ବିଦାୟ ଦେବାକୁ ସ୍ଥିର କଲି ।ସେବେଠାରୁ ମୁଁ କେବଳ ଭଜନ ଗାଇଥିଲି। ଅନୁରାଧା ଇଣ୍ଡଷ୍ଟ୍ରିରେ ସେ ସମୟରେ ଛାଇଯାଇଥିଲେ ଯେତେବେଳେ ଲତା ମଙ୍ଗେଶକରଙ୍କ ପରି ଭେଟେରାନ ଗାୟିକାମାନେ ଉପସ୍ଥିତ ଥିଲେ । କିନ୍ତୁ ତାଙ୍କ ସୁମଧୁର ସ୍ୱରରେ ସେ ବଲିଉଡରେ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିଲେ।
