ନୀଳଗିରି,୧୬/୧ : ଇକୋ ସେନସେଟିଭ ଜୋନରେ ଚାଲିପାରିବନି ଇଟାଭାଟି। ଇଟା ତିଆରି କାର୍ଯ୍ୟକଳାପକୁ କୌଣସି ପ୍ରକାର ଅନୁମତି ନାହିଁ । ଯେଉଁମାନେ ଇଟାଭାଟି ଚଳାଉଛନ୍ତି ଦୁଇ ସପ୍ତାହ ଭିତରେ ସାଇଟ ସଫା କରିଦିଅ। ଜିଲ୍ଲାପାଳଙ୍କୁ ମଧ୍ୟ ଇଟାଭାଟି ବିରୁଦ୍ଧରେ ପଦକ୍ଷେପ ନେଇପାରିବେ। ଏଭଳି ଗୁରୁତ୍ୱପୂର୍ଣ୍ଣ ରାୟ ଆଜି ଶୁଣାଇଛନ୍ତି ହାଇକୋର୍ଟ ।
ସୂଚନାଯୋଗ୍ୟ ଯେ, ବାଲେଶ୍ଵର ଜିଲ୍ଲା ନୀଳଗିରି ଅଞ୍ଚଳରେ ଥିବା କୁଳଡିହା ଅଭୟାରଣ୍ୟ ଇକୋ ସେନସେଟିଭ ଯୋନରେ ବେଆଇନ ଚିମିନି ଓ ଚଦର ଇଟାଭାଟି ଚାଲି ଆସୁଥିଲା। ପ୍ରଶାସନ ତଟଫରୁ ସେଭଳି କାର୍ଯ୍ୟାନୁଷ୍ଠାନ ହେଉନଥିବାବେଳେ ବହୁ ପୂର୍ବରୁ ମାମଲା ହାଇକୋର୍ଟରେ ବିଚାରଧୀନ ଥିଲା। ଗତବର୍ଷ ସନ୍ତରାଗଡ଼ିଆ ଅଞ୍ଚଳର ଇଟାଭାଟିକୁ ତହସିଲଦାର ବେଆଇନ ଦର୍ଶାଇ ଭାଙ୍ଗିଦେଇଥିଲେ । ଇଟାଭାଟିରେ ମାଲିକ ହରିଶ୍ଚନ୍ଦ୍ର ଜେନା ନ୍ୟାୟ ପାଇଁ ମାନ୍ୟବର ହାଇକୋର୍ଟଙ୍କ ଦ୍ୱାରସ୍ଥ ହେବା ସହ ଇକୋ ସେନସେଟିଭ ଜୋନରେ ଅନେକ ଇଟାଭାଟି ଅଛି କାହିଁକି ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ହେଉନି ଏ ନେଇ ଯୁକ୍ତି ବାଢିଥିଲେ।
ପୁଣି ଅନ୍ୟ ଇଟାଭାଟି ମାଲିକ ମାନେ ହାଇକୋର୍ଟର ଦ୍ୱାରସ୍ଥ ହେବା ପରେ ଆଜି ଏଭଳି ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି ହାଇକୋର୍ଟ। ବେଆଇନ ଇଟାଭାଟି ମାଲିକ ହାଇକୋର୍ଟରେ କରିଥିବା ମାମଲା ଡିସପୋଜ କରିଥିବାବେଳେ ଜିଲ୍ଲାପାଳଙ୍କୁ ଇଟାଭାଟି ବନ୍ଦ ପାଇଁ ପ୍ରଭାବଶାଳୀ ପଦକ୍ଷେପ ଗ୍ରହଣ କରିବାକୁ ନିର୍ଦେଶ ଦେଇଛନ୍ତି। ଏହି ମାମଲାକୁ ଶ୍ରୀ ଜେନାଙ୍କ ତରଫରୁ ଆଇନଜୀବୀ ସମୀର କୁମାର ମିଶ୍ର ଲଢୁଥିଲେ।
