ସମ୍ବଲପୁର/ବୁର୍ଲା,୨୧/୧୨: ସମ୍ବଲପୁର ଗସ୍ତରେ ଆସୁଛନ୍ତି ସ୍ୱରାଷ୍ଟ୍ର ମନ୍ତ୍ରୀ ଅମିତ୍ ଶାହ । ଆପାତତଃ ଗସ୍ତ ତାରିଖ ସ୍ପଷ୍ଟ ହୋଇ ନ ଥିଲେ ମଧ୍ୟ ଆସନ୍ତା ୨୮ କିମ୍ବା ୩୦ରେ ସେ ଆସିପାରନ୍ତି । ଏହି ଅବସରରେ ସେ ବୁର୍ଲା ଭିମ୍ସାର୍ ସୁପର ସ୍ପେସାଲିଟି ହସ୍ପିଟାଲ୍ ଉଦ୍ଘାଟନ କରିବେ । ଏନେଇ ଭିମ୍ସାର୍ ନିର୍ଦ୍ଦେଶକ ଅନ୍ୟ ବିଭାଗ ଓ ଅଧିକାରୀଙ୍କୁ ଚିଠି ଲେଖି ପ୍ରସ୍ତୁତ ରହିବାକୁ କହିଛନ୍ତି । ଗତ ନଭେମ୍ବର ୧୮ରେ ଏହି ସୁପର ସ୍ପେସିଆଲିଟି ହସ୍ପିଟାଲ ଉଦ୍ଘାଟନ ହେବାର ଥିଲା । କିନ୍ତୁ କୌଣସି କାରଣରୁ ଏହାକୁ ଘୁଞ୍ଚାଇ ଦିଆଯାଇଥିଲା ।
ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଶାହା ସମ୍ବଲପୁର ଆସି ପ୍ରଥମେ ମା’ ସମଲେଶ୍ୱରୀଙ୍କ ଦର୍ଶନ କରିବେ । ପରେ ଭିନ୍ନ ଭିନ୍ନ ୪ଟି କାର୍ଯ୍ୟକ୍ରମରେ ଯୋଗଦେବା କାର୍ଯ୍ୟକ୍ରମ ରହିଛି । ୧୮୫୭ ଡିସେମ୍ବର ୩୦ରେ ବ୍ରିଟିଶ ପୁଲିସ୍ ଦ୍ୱାରା କୁଦୋପାଲିରେ ସଂଘଠିତ ନରସଂହାରକୁ ନେଇ ପ୍ରକାଶିତ ଏକ ପୁସ୍ତକ ଉନ୍ମୋଚନ କରିବେ । ଏଥିରେ ସମ୍ବଲପୁରର ଗୌରବମୟ ଇତିହାସ, ଦେଶ ସ୍ୱାଧୀନତା ପାଇଁ ସଂଘର୍ଷ ଓ ବଳିଦାନ ସମ୍ପର୍କରେ ଉଲ୍ଲେଖ ରହିଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିର୍ଦ୍ଦେଶ କ୍ରମେ ଜାତୀୟ ବୁକ୍ ଟ୍ରଷ୍ଟ ପକ୍ଷରୁ ଐତିହାସିକ ଗବେଷଣା କରି ଏହାକୁ ପ୍ରକାଶନ କରାଯାଇଛି । ଇଂରେଜଙ୍କ ଦ୍ୱାରା ହୋଇଥିବା ଏହି ବର୍ବରକାଣ୍ଡରେ ୫୮ ଜଣ ସହିଦ ହୋଇଥିଲେ ।
ଜଣେ ବରିଷ୍ଠ ବିଜେପି ନେତାଙ୍କ ସୂଚନା ଅନୁସାରେ, ଶ୍ରୀ ଶାହ ଆସନ୍ତା ୨୮ ତାରିଖରେ ସମ୍ବଲପୁର ଆସିପାରନ୍ତି । ପୂର୍ବରୁ ୩୦ ତାରିଖ ଧାର୍ଯ୍ୟ ହୋଇଥିଲା । ହେଲେ ବର୍ତ୍ତମାନ ପର୍ଯ୍ୟନ୍ତ ସ୍ପଷ୍ଟ ସୂଚନା ଆସିନାହିଁ । ଯଦି ୩୦ ତାରିଖ କାର୍ଯ୍ୟକ୍ରମ ବାତିଲ ହୁଏ, ଏହାର ଦିନକ ପୂର୍ବରୁ ଅର୍ଥାତ୍ ୨୮ ତାରିଖରେ ସମ୍ବଲପୁର ଆସିବେ । ଗଙ୍ଗାଧର ମେହେର ବିଶ୍ୱବିଦ୍ୟାଳୟରେ ଅନୁଷ୍ଠିତ ସ୍ୱତନ୍ତ୍ର କାର୍ଯ୍ୟକ୍ରମରେ କୁଦୋପାଲି ଉପରେ ଲିଖିତ ଐତିହାସିକ ପୁସ୍ତକକୁ ଉନ୍ମୋଚନ କରିବେ । ଏହାସହ ଆଉ ୩ଟି କାର୍ଯ୍ୟକ୍ରମରେ ସାମିଲ ହେବେ । ଏଥିରେ ବୁର୍ଲା ଭିମସାର୍ ସୁପର ସ୍ପେସାଲିଟି ହସ୍ପିଟାଲ୍ ଉଦ୍ଘାଟନ କାର୍ଯ୍ୟକ୍ରମ ମଧ୍ୟ ରହିଛି।
