ଭୁବନେଶ୍ଵର, ୦୭/୧୨ : ପ୍ରଶ୍ନକାଳ ଆରମ୍ଭରୁ ଗୃହରେ ହଟ୍ଟଗୋଳ। ମୁଖ୍ୟମନ୍ତ୍ରୀଙ୍କ ବିବୃତ୍ତିକୁ ବିରୋଧ କରି ଗୃହରେ ହଙ୍ଗାମା କଲେ ବିରୋଧୀ। ବିଜେଡି ସଦସ୍ୟ ବାଚସ୍ପତିଙ୍କ ପୋଡିୟମ୍ ତଳେ ହୋହାଲ୍ଲା ସହ ନାରାବାଜି କରିଛନ୍ତି। ଫଳରେ ବାଚସ୍ପତି ସାଢେ ୧୧ଟା ଯାଏଁ ଗୃହ ମୁଲତବୀ ଘୋଷଣା କରିଛନ୍ତି। ଗତକାଲି ଏଏସଓ ଚାକିରି ବିକ୍ରି ହୋଇଥିବା ନେଇ ଗୃହରେ ବିବୃତ୍ତି ରଖିଥିଲେ ମୁଖ୍ୟମନ୍ତ୍ରୀ।

ସୂଚନାନୁଯାୟୀ, ଶୁକ୍ରବାର ASO ଚାକିରି ୨୦ ରୁ ୩୦ ଲକ୍ଷରେ ବିକ୍ରି ହେଉଛି ବୋଲି ମୁଖ୍ୟମନ୍ତ୍ରୀ କହିଥିଲେ। ଏହାକୁ ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ବିରୋଧ କରିଛନ୍ତି। ସେ କହିଛନ୍ତି ଯେ, ଯଦି ଏଏସଓ ଚାକିରି ବଜାରରେ ମିଳୁଛି ବୋଲି ମୁଖ୍ୟମନ୍ତ୍ରୀ ଜାଣିଛନ୍ତି, ତେବେ ୬ ମାସ ହେଲା ଚୁପ୍ କାହିଁକି ବସିଛନ୍ତି। ଏହା କପୋଳକଳ୍ପିତ। ପୂର୍ବ ସରକାରକୁ ବଦନାମ କରିବାକୁ ଷଡଯନ୍ତ୍ର। ଯେଉଁମାନେ ଚାକିରି ପାଇଛନ୍ତି, ତାଙ୍କ ପାଇଁ ଏହା ଅପମାନ। ସେମାନେ ଚାକିରି ପାଇଁ ଟଙ୍କା ଦେଇ ନାହାନ୍ତି। ଭବିଷ୍ୟତରେ ଏହା ପିଲାଙ୍କ ମନୋବଳ ଭାଙ୍ଗିବ । କେଉଁ ବଜାରରେ ଚାକିରି ମିଳୁଛି, ମୁଖ୍ୟମନ୍ତ୍ରୀ ସ୍ପଷ୍ଟ କରନ୍ତୁ । ମୁଖ୍ୟମନ୍ତ୍ରୀ ଏନେଇ ବିବୃତ୍ତି ଦିଅନ୍ତୁ । ଯଦି ଏହା ପ୍ରସଙ୍ଗ ନୁହେଁ, ମୁଖ୍ୟମନ୍ତ୍ରୀ ଯାହା କହିଲେ ତାହା କଣ ପ୍ରସଙ୍ଗ? ଯେଉଁଠି ସରକାର ଉପରେ ଯାଉଛି, ସେହିଟି ପ୍ରସଙ୍ଗ ନୁହେଁ। ଯାହା ସରକାରକୁ ସୁହାଇବ, ତାହା ହିଁ ପ୍ରସଙ୍ଗ? ଶସ୍ତା ବକ୍ତବ୍ୟ ଦେଉଛନ୍ତି ମୁଖ୍ୟମନ୍ତ୍ରୀ।