ନୂଆଦିଲ୍ଲୀ,୧୩/୧୦: ମହିଳା ଦିନିକିଆ ବିଶ୍ୱକପରେ ଭାରତକୁ ଲଗାତାର ଝଟକା ଲାଗିଛି । ପ୍ରଥମ ଦୁଇ ମ୍ୟାଚ ଜିତିବା ପରେ ବ୍ୟାକ୍‌ ଟୁ ବ୍ୟାକ୍‌ ଦୁଇ ମ୍ୟାଚ ହାରିଛି ଟିମ୍‌ ହର୍ମନପ୍ରୀତ । ରବିବାର ବିଶ୍ୱକପରେ ଅଷ୍ଟ୍ରେଲିଆ ବିପକ୍ଷରେ ଖେଳିଥିଲା ଭାରତ । ମ୍ୟାଚରେ ଆନାବେଲ ସୁଦରଲାଣ୍ଡଙ୍କ ଘାତକ ବୋଲିଂ ସାଙ୍ଗକୁ ଅଧିନାୟିକା ଆଲିସା ହିଲିଙ୍କ ଦ୍ରୁତ ଶତକ ବଳରେ  କଙ୍ଗାରୁ ଦଳ ଭାରତକୁ ୩ ୱିକେଟରେ ହରାଇଛି । ସ୍ମୃତି ମାନ୍ଧାନାଙ୍କ ୮୦ ରନ୍ ବୃଥା ଯାଇଛି । ଅଷ୍ଟ୍ରେଲିଆଠୁ ହାରିବା ପରେ ଭାରତର କଣ ହେବ ? ସେମିଫାଇନାଲରେ କିପରି ପହଞ୍ଚିବ ? କଣ କହୁଛି ସମୀକରଣ ଜାଣିବାକୁ ପଢନ୍ତୁ ପୁରା ଖବର ।

ସେମିଫାଇନାଲ ସମୀକରଣ- ଭାରତ ଶ୍ରୀଲଙ୍କା ଓ ପାକିସ୍ତାନ ବିପକ୍ଷରେ ଦମଦାର ବିଜୟ ହାସଲ କରିଥିଲା । ଏହାପରେ ଲାଗାତାର ଦୁଇଟି ମ୍ୟାଚ ହାରିଛି ହର୍ମନପ୍ରୀତ ବ୍ରିଗେଡ । ଏହା ପୂର୍ବ ମ୍ୟାଚ ଦକ୍ଷିଣ ଆଫ୍ରିକାଠୁ ହାରିଥିଲା । ଏବେ ଦଳର ସେମିଫାଇନାଲରେ ପହଞ୍ଚିବା କଷ୍ଟକର ହେବା ଆକଳନ କରାଯାଉଛି । ଭାରତକୁ ଆହୁରି ୩ଟି ମ୍ୟାଚ ଖେଳିବାର ଅଛି ଯାହା ବେଶ୍ ଗୁରୁତ୍ୱପୂର୍ଣ୍ଣ । ୪ ପଏଣ୍ଟ ସହ ଭାରତ ଟେବୁଲର ଚତୁର୍ଥ ସ୍ଥାନରେ ରହିଛି । ୭ ପଏଣ୍ଟ ସହ ଅଷ୍ଟ୍ରେଲିଆ ଶୀର୍ଷ ସ୍ଥାନରେ ରହିଛି । ଇଂଲଣ୍ଡ ୬ ପଏଣ୍ଟ ସହ ଦ୍ୱିତୀୟ ସ୍ଥାନରେ ରହିଛି । ସାଉଥ ଆଫ୍ରିକା ୪ ଓ ନ୍ୟୁଜିଲାଣ୍ଡ ୨ ପଏଣ୍ଟ ସହ ପଞ୍ଚମ ସ୍ଥାନରେ ରହିଛନ୍ତି । ଭାରତ ଆଉ ୩ଟି ମ୍ୟାଚ ଖେଳିବ । ଅକ୍ଟୋବର ୧୯ରେ ଇଂଲଣ୍ଡ, ୨୩ରେ ନ୍ୟୁଜିଲାଣ୍ଡ ଓ ୨୬ରେ ବାଂଲାଦେଶ ବିପକ୍ଷରେ ମୈଦାନକୁ ଓହ୍ଲାଇବ । ୩ଟି ମ୍ୟାଚକୁ ବଡ ସ୍କୋର ବ୍ୟବଧାନରେ ଜିତିବାକୁ ହେବ । ଯଦି ବଳକା ୩ ମ୍ୟାଚ ଭାରତ ଜିତୁଛି ତେବେ ୧୦ ପଏଣ୍ଟ ହାସଲ କରିବ । ତେବେ ଯାଇ ସେମିଫାଇନାଲରେ ଏଣ୍ଟ୍ରୀ କରିବା ସହଜ ହେବ ।

ଦ୍ୱିତୀୟ ସମୀକରଣ: ଯଦି ଭାରତ ଇଂଲଣ୍ଡ ଏବଂ ନ୍ୟୁଜିଲାଣ୍ଡକୁ ପରାସ୍ତ କରେ, ତେବେ ସେମିଫାଇନାଲରେ ସ୍ଥାନ ପକ୍କା କରିବାର ସମସ୍ତ ସମ୍ଭାବନା ରହିଛି । ଯଦି ଭାରତ ଇଂଲଣ୍ଡଠାରୁ ହାରିଯାଏ, ତଥାପି ନକଆଉଟ୍‌ରେ ନ୍ୟୁଜିଲାଣ୍ଡ ଏବଂ ବାଂଲାଦେଶ ଉଭୟକୁ ପରାସ୍ତ କରିବାକୁ ପଡିବ । ଯେହେତୁ ପ୍ରତ୍ୟେକ ଦଳ ଗ୍ରୁପ ପର୍ଯ୍ୟାୟରେ ୭ଟି ମ୍ୟାଚ୍ ଖେଳିବେ, ତେଣୁ ସେମିଫାଇନାଲ ସ୍ଥାନ ପାଇଁ ୮ ପଏଣ୍ଟର କଟ-ଅଫ୍ ବିଚାର କରାଯିବ । ଯଦି ଭାରତ ନ୍ୟୁଜିଲାଣ୍ଡଠାରୁ ହାରିଯାଏ ଏବଂ ଇଂଲଣ୍ଡ ଏବଂ ବାଂଲାଦେଶ ବିପକ୍ଷରେ ବିଜୟୀ ହୁଏ, ତେବେ ନ୍ୟୁଜିଲାଣ୍ଡ ପାକିସ୍ତାନ, ଇଂଲଣ୍ଡ କିମ୍ବା ଶ୍ରୀଲଙ୍କା ମଧ୍ୟରୁ ଗୋଟିଏକୁ ହରାଇବା ଆଶା କରାଯିବ  । ଯଦି ଭାରତ ଏହାର ବାକି ଥିବା ମ୍ୟାଚ୍‌ରୁ ଗୋଟିଏ ହାରିଯାଏ, ତେବେ ସେମିଫାଇନାଲ ସମ୍ଭାବନା କଷ୍ଟକର ହୋଇଯିବ । ଅନ୍ୟ ଦଳର ଫଳାଫଳ ଉପରେ ମଧ୍ୟ ନିର୍ଭର କରିବାକୁ ପଡିବ ।

​​​​​​​ତୃତୀୟ ସମୀକରଣ: ଯଦି ଭାରତ ଏହାର ପରବର୍ତ୍ତୀ ତିନୋଟି ମ୍ୟାଚ୍ ମଧ୍ୟରୁ ଗୋଟିଏ ଜିତିଯାଏ, ତେବେ ଯୋଗ୍ୟତା ହାସଲ କରିବାର ସମ୍ଭାବନା ବିପଦରେ ପଡ଼ିପାରେ। ଏପରି ପରିସ୍ଥିତିରେ, ହରମନପ୍ରୀତ କୌରଙ୍କ ଟିମ୍ ବାଦ୍ ପଡ଼ିବାର ସମ୍ଭାବନା ଅଛି । ଯଦି ନ୍ୟୁଜିଲାଣ୍ଡ ଏବଂ ଦକ୍ଷିଣ ଆଫ୍ରିକା ବିଜୟଧାରା ବଜାୟ ରଖନ୍ତି, ତେବେ ଭାରତକୁ ପଛରେ ପକାଇଦେବେ ।