ନୂଆଦିଲ୍ଲୀ,୧୫/୦୮: ୭୯ତମ ସ୍ବାଧୀନତା ଦିବସ ଅବସରରେ ଜାତୀୟ ରାଜମାର୍ଗ ପ୍ରାଧିକରଣ ଦେଶରେ ଫାସ୍ଟ୍ୟାଗ୍ ବର୍ଷିକିଆ ପାସ୍ ଆରମ୍ଭ କରିଛନ୍ତି । ଯାହାଦ୍ବାରା ଜାତୀୟ ରାଜପଥରେ ଯାତ୍ରା କରିବା ସହଜ ହୋଇପାରିବ। ସେହିପରି ଏହା ଘରୋଇ ଯାନର ମାଲିକଙ୍କୁ ଥରେ ଟଙ୍କା ପୈଠ କରି ପୂରା ବର୍ଷ ପର୍ଯ୍ୟନ୍ତ ଯାତ୍ରା କରିବାକୁ ଅନୁମତି ଦେବ । ଏହି ପାସ୍ ଦ୍ବାରା ଗୋଟିଏ ଯାନ ଟୋଲଗେଟ୍ରେ ଅତିକମରେ ୨୦୦ କ୍ରସ୍ କରିପାରିବ ।
ଫାସ୍ଟ୍ୟାଗ୍ ବାର୍ଷିକ ପାସ୍ ଡ୍ରାଇଭରମାନଙ୍କୁ ବାରମ୍ବାର ରିଚାର୍ଜ କରିବା, ଟୋଲ୍ ପେମେଣ୍ଟକୁ ତ୍ବରାନ୍ବିତ କରିବା ଏବଂ ଟୋଲ୍ ପ୍ଲାଜାରେ ଟ୍ରାଫିକ୍ ହ୍ରାସ କରିବାରେ ସକ୍ଷମ କରିବ । ଫାସ୍ଟ୍ୟାଗ୍ ବାର୍ଷିକ ପାସ୍ ଏକ ପ୍ରି-ପେଡ୍ ଟୋଲ୍ ପେମେଣ୍ଟ ଯୋଜନା, ଯାହା ଭାରତ ସରକାରଙ୍କ ଦ୍ବାରା ପ୍ରଚଳନ କରାଯାଇଛି । ବିଶେଷକରି କାର, ଜିପ୍ ଏବଂ ଭ୍ୟାନ୍ ସମେତ ଅଣ-ବାଣିଜ୍ୟିକ ଘରୋଇ ଯାନ ପାଇଁ ଏହି ବ୍ୟବସ୍ଥା କରାଯାଇଛି । କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡକରୀଙ୍କ ଦ୍ବାରା ଘୋଷଣା କରାଯାଇଥିବା ଏହି ପାସ୍ ଯାତ୍ରୀମାନଙ୍କୁ ୨୦୦ ଟୋଲ୍ ପେମେଣ୍ଟ କିମ୍ବା ଏକ ବର୍ଷ ପାଇଁ ୩ ହଜାର ଟଙ୍କା ଏକକାଳୀନ ଫି' ଦେବାର ସୁବିଧା ପ୍ରଦାନ କରେ । ଏହି ବର୍ଷିକିଆ ପାସ୍ କିଣିବା ଦ୍ବାରା ୟୁଜରଙ୍କୁ ଫାସ୍ଟ୍ୟାଗ୍ ଆକାଉଣ୍ଟରେ ବାରମ୍ବାର ରିଚାର୍ଜ କରିବାକୁ ପଡ଼ିନଥାଏ । ନୂଆ ବାର୍ଷିକ ପାସ୍ ଖୁବ ସହଜରେ ୟୁଜରଙ୍କ ବିଦ୍ୟମାନ ଫାସ୍ଟ୍ୟାଗ୍ ଆକାଉଣ୍ଟ ସହିତ ଏକୀକୃତ ହୋଇଥାଏ ।
ଫାସ୍ଟ୍ୟାଗ୍ ବାର୍ଷିକ ପାସ୍ କିଣିବା ପାଇଁ ପଦକ୍ଷେପ:
ଷ୍ଟେପ୍-୧: ରାଜମାର୍ଗ ଯାତ୍ରା ଆପ୍ କିମ୍ବା ସରକାରୀ ଏନଏଚଏଆଇ କିମ୍ବା MoRTH ପୋର୍ଟାଲ୍କୁ ଯାଆନ୍ତୁ ।
ଷ୍ଟେପ୍-୨: ଏବେ ଆପଣଙ୍କର ପଞ୍ଜୀକୃତ ମୋବାଇଲ୍ ନମ୍ବରରେ ଲଗ୍ଇନ୍ କରନ୍ତୁ କିମ୍ବା ସିଧାସଳଖ ଯାନବାହନ ପଞ୍ଜୀକରଣ ନମ୍ବର । ଏଥିସହ ଫାସ୍ଟ୍ୟାଗ୍ ଆଇଡି ପ୍ରବେଶ କରନ୍ତୁ ।
ଷ୍ଟେପ୍-୩: ସିଷ୍ଟମ୍ ଯାଞ୍ଚ କରେ ଯେ ପ୍ରବେଶ କରାଯାଇଥିବା ବିବରଣୀ ସଠିକ୍ ଅଛି କି ନାହିଁ; ବିବରଣୀ ଯାଞ୍ଚ ହେବା ପରେ, ଯୋଗ୍ୟ ଉପଭୋକ୍ତାମାନେ ଡେବିଟ୍ କାର୍ଡ, କ୍ରେଡିଟ୍ କାର୍ଡ, ୟୁପିଆଇ କିମ୍ବା ନେଟ୍ ବ୍ୟାଙ୍କିଂ ବ୍ୟବହାର କରି ଅନଲାଇନରେ ୩ହଜାର ଟଙ୍କା ପୈଠ କରନ୍ତୁ ।
ପେମେଣ୍ଟ ସଫଳ ହେବା ପରେ, ବାର୍ଷିକ ପାସ୍ ପୂର୍ବରୁ ଥିବା ଫାସ୍ଟ୍ୟାଗ୍ ଆକାଉଣ୍ଟ ସହିତ ଲିଙ୍କ୍ ହୋଇଯିବ । ଅଗଷ୍ଟ ୧୫, ୨୦୨୫ରେ ପାସ୍ ସକ୍ରିୟ ହେବା ନିଶ୍ଚିତକରଣ ସମ୍ପର୍କରେ ୟୁଜରମାନେ ଏକ ଏସଏମଏସ ପାଇବେ ।
