ମୁମ୍ବାଇ,୦୯/୦୮:ଅଭିନେତା ମନୋଜ କୁମାରଙ୍କ ଦେହାନ୍ତ ପରେ, ଫିଲ୍ମ ଇଣ୍ଡଷ୍ଟ୍ରିରୁ ଆଉ ଏକ ଦୁଃଖଦ ଖବର ସାମ୍ନାକୁ ଆସିଛି। ଆଉ ନାହାନ୍ତି ପ୍ରସିଦ୍ଧ ଚଳଚ୍ଚିତ୍ର ନିର୍ମାତା ସଲିମ ଅଖତର । ସେ ଗତକାଲି ଅର୍ଥାତ୍ ୮ ଏପ୍ରିଲ ମଙ୍ଗଳବାର ଦିନ ମୁମ୍ବାଇର କୋକିଲାବେନ ଧିରୁବାଇ ଅମ୍ବାନୀ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି। ତେବେ ଟାଇମ୍ସ ନାଓ ରିପୋର୍ଟ ଅନୁଯାୟୀ, ଫିଲ୍ମ ନିର୍ମାତା ସଲିମ ଅଖତର କିଛି ଦିନ ଧରି ଅସୁସ୍ଥ ଥିଲେ। ସେ ଗତ କିଛି ଦିନ ଧରି ମୁମ୍ବାଇର କୋକିଲାବେନ ଧୀରୁଭାଇ ଅମ୍ବାନୀ ହସ୍ପିଟାଲରେ ଭେଣ୍ଟିଲେଟରରେ ଥିଲେ। ଜୀବନ ଏବଂ ମୃତ୍ୟୁ ମଧ୍ୟରେ ଲଢ଼ୁଥିବା ସଲିମ ଅଖତର ଶେଷରେ ଜୀବନକୁ ହାର ମାନି ଏହି ଦୁନିଆରୁ ବିଦାୟ ନେଇଛନ୍ତି।
ଏହା ମଧ୍ୟ ପଢନ୍ତୁ- ସପାର ପୂର୍ବତନ ବିଧାୟକ ଅବଦୁଲ୍ଲା ଆଜମ ଖାନଙ୍କ ବଢିଲା ଅଡ଼ୁଆ, ଷ୍ଟାମ୍ପ ଚୋରି ମାମଲାରେ ୩ କୋଟି ୭୧ ଲକ୍ଷ ଟଙ୍କା ଜରିମାନା ଲଗାଇଲେ କୋର୍ଟ…
ସଲିମ ଅଖତାର ହିନ୍ଦୀ ଚଳଚ୍ଚିତ୍ର ଶିଳ୍ପର ଜଣେ ପ୍ରବୀଣ ଚଳଚ୍ଚିତ୍ର ନିର୍ମାତା ଥିଲେ। ତାଙ୍କ ପ୍ରଯୋଜନା ସଂସ୍ଥା ଅଫତାବ ପିକ୍ଚର୍ସ ବ୍ୟାନରରେ 'କୟାମତ', 'ଲୋହା', 'ଚୋରୋଁ କି ବାରାତ', 'ବଟୱାରା', 'ବାଦଲ', 'ବାଜି' ଏବଂ 'ଇଜ୍ଜତ' ଭଳି ଅନେକ ଚଳଚ୍ଚିତ୍ର ନିର୍ମାଣ କରିଥିଲେ। ସଲିମ ଅଖତର ୧୯୯୭ ମସିହାରେ 'ରାଜା କି ଆୟେଗି ବାରାତ' ଫିଲ୍ମ ମାଧ୍ୟମରେ ରାଣୀ ମୁଖାର୍ଜୀଙ୍କୁ ଇଣ୍ଡଷ୍ଟ୍ରିକୁ ଆଣିଥିଲେ। ରାଣୀଙ୍କ ବ୍ୟତୀତ ସେ ତମନ୍ନା ଭାଟିଆଙ୍କୁ ମଧ୍ୟ ଇଣ୍ଡଷ୍ଟ୍ରିରେ ଲଞ୍ଚ କରିଥିଲେ। ଏହି ଫିଲ୍ମର ନାମ ଥିଲା 'ଚନ୍ଦା ସା ରୋଶନ ଚେହେରା'। ପ୍ରକାଶ ଥାଉକି, ଫିଲ୍ମ ନିର୍ମାତା ସଲିମ ଅଖତର ଶମା ଅଖତରଙ୍କୁ ବିବାହ କରିଥିଲେ। ସେ ସ୍ୱଭାବରେ ବହୁତ ସରଳ ଥିଲେ। ସେ ମୁଖ୍ୟତଃ ହିନ୍ଦୀ ଚଳଚ୍ଚିତ୍ର ଶିଳ୍ପରେ କାମ କରିଛନ୍ତି। ତାଙ୍କର ଅନ୍ତିମ ସଂସ୍କାର ଆଜି ଅର୍ଥାତ ଏପ୍ରିଲ ୯ ତାରିଖ ଦିନ ଜୋହର ନମାଜ ପରେ ଅପରାହ୍ନ ୧.୩୦ ରେ କରାଯିବ। ତାଙ୍କୁ ଇର୍ଲା ମସଜିଦ ନିକଟସ୍ଥ କବରସ୍ଥାନରେ କବର ଦିଆଯିବ।
