ଭୁବନେଶ୍ୱର,୦୨/୦୪: ଆଜିଠାରୁ ଶିଶୁ ବାଟିକାରେ ଆରମ୍ଭ ହେବ ପାଠପଢ଼ା । ପିଲାମାନେ ଖଡ଼ି ଛୁଇଁ ଆରମ୍ଭ କରିବେ ପାଠପଢ଼ା । ପାରମ୍ପରିକ ରୀତିନୀତିରେ ପିଲାଙ୍କର ହେବ ବିଦ୍ୟାଳୟ ପ୍ରବେଶ ଉତ୍ସବ। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଭୁବନେଶ୍ୱରର ବଡ଼ଗଡ଼ ହାଇସ୍କୁଲରେ ଆୟୋଜିତ ରାଜ୍ୟସ୍ତରୀୟ କାର୍ଯ୍ୟକ୍ରମରେ ସାମିଲ ହେବେ । ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନବରଙ୍ଗପୁରରେ ଆୟୋଜିତ ଖଡ଼ିଛୁଆଁ କାର୍ଯ୍ୟକ୍ରମରେ ସାମିଲ ହେବାର କାର୍ଯ୍ୟକ୍ରମ ରହିଛି । ଆସନ୍ତାକାଲିଠୁ ରାଜ୍ୟରେ ବିଦ୍ୟାଳୟ ଓ ଗଣଶିକ୍ଷା ବିଭାଗରେ ଲାଗୁ ହେବ ଜାତୀୟ ଶିକ୍ଷା ନୀତି ୨୦୨୦ । ଏହି ଅନୁଯାୟୀ ଆସନ୍ତାକାଲିଠୁ ଶିଶୁ ବାଟିକାରେ ହେବ ନାମଲେଖା । ଏନେଇ ଖଡ଼ି ଛୁଆଁ ସହ ପ୍ରବେଶ ଉତ୍ସବ ଅନୁଷ୍ଠିତ ହେବ । ପ୍ରସ୍ତୁତି ଅନୁଯାୟୀ, ସ୍କୁଲରେ ପିଲାଙ୍କୁ ଫୁଲ ଚନ୍ଦନ ଦେଇ ସ୍ୱାଗତ କରାଯିବ ।
ଏହା ମଧ୍ୟ ପଢନ୍ତୁ- ୧୫ ଜିଲ୍ଲାରେ ଘଡ଼ଘଡ଼ି ସହ ବର୍ଷା, ୩ ଓ ୪ ତାରିଖ ପାଇଁ ଅରେଞ୍ଜ ୱାର୍ଣ୍ଣିଂ
ଖଡ଼ି ଛୁଆଁ ଦିବସ ପାଇଁ ୪ ଦିନିଆ ସ୍ୱତନ୍ତ୍ର କାର୍ଯ୍ୟକ୍ରମ କରାଯିବ । ଯେଉଁଥିରେ ପ୍ରଥମ ଦିନ ନାମଲେଖା ହେବ । ଉତ୍ସବ ପାଇଁ ସ୍କୁଲକୁ ସୁସଜ୍ଜିତ କରାଯିବ । ପିଲାଙ୍କୁ ତିଳକ ଲଗାଇ ଫୁଲ ପକାଇ ସ୍କୁଲକୁ ସ୍ୱାଗତ କରାଯିବ । ମୁଖ୍ୟମନ୍ତ୍ରୀଙ୍କ ଦ୍ୱାରା ଦିଆଯାଇଥିବା ବାର୍ତ୍ତାକୁ ପଢ଼ାଯିବ । ଏଥିସହ ପିଲାଙ୍କୁ କିଟ୍ ବଣ୍ଟନ ହେବ । ସ୍କୁଲରେ ଗାଁର ବୈଠକ ହେବ । ଅଭିଭାବକ ଛାତ୍ର ବନ୍ଧନକୁ ସୁଦୃଢ଼ କରାଯିବ । ଅଭିଭାବକମାନେ ନିଜର ପିଲା ଦିନର ଅଭୁଲା ସ୍ମୃତିକୁ ପିଲାଙ୍କ ଆଗରେ ବଖାଣିବେ । ପିଲାମାନେ ସ୍କୁଲର ଶ୍ରେଣୀ ଗୃହ ପରିଦର୍ଶନ କରିବା ସହ ସାକ୍ଷରତା ଷ୍ଟେସନ୍, ସଂଖ୍ୟାଜ୍ଞାନ ଷ୍ଟେସନ୍, କ୍ରିଏଟିଭ୍ ଷ୍ଟେସନ୍ ବୁଲିବେ । ଦ୍ୱିତୀୟ ଦିନ ନୂଆ ପିଲାଙ୍କୁ ନେଇ ପୁରୁଣା ପିଲାଙ୍କ ସହ ଏକ ଗ୍ରୁପ କରାଯିବ । ଯାହାକୁ କୁନି ସଂଗାତ କୁହାଯିବ । ଶେଷ ଦିନ ଶପଥ ପାଠ କରାଯିବ । ଅଭିଭାବକଙ୍କୁ ନେଇ ଏକ ହ୍ୱାଟସ୍ ଆପ୍ ଗ୍ରୁପ ହେବ ବୋଲି ସୂଚନା ରହିଛି ।
