ନୂଆଦିଲ୍ଲୀ,୨୫/୦୮: ଗ୍ଲୋବାଲ ଟେକ୍ନୋଲୋଜି କମ୍ପାନି ଗୁଡ଼ିକ ଲାଗି ଭାରତ ଏବେ ପ୍ରମୁଖ ବଜାର ଭାବେ ଉଭା ହୋଇଛି । ଏବେ କୃତ୍ରିମ ବୁଦ୍ଧିମତାକୁ ନେଇ ବିଶ୍ୱ ବଜାରରେ କଡ଼ା ପ୍ରତିଯୋଗିତା ଲାଗି ରହିଥିବା ବେଳେ ଭାରତ ଏବେ ଗ୍ରାଉଣ୍ଡ ଜିରୋ ପାଲଟିଛି । ବିଶ୍ୱର ପ୍ରମୁଖ କମ୍ପାନି ଓପନ ଏଆଇ ନୂଆଦିଲ୍ଲୀରେ ଏହାର କାର୍ଯ୍ୟାଳୟ ସ୍ଥାପନ କରିବାକୁ ଘୋଷଣା କରିବା ପରେ ଭାରତ ବଜାରକୁ ନେଇ ଏବେ ଉତ୍କଣ୍ଠା ବଢ଼ିଛି ।
ଓପନ ଏଆଇ ସହପ୍ରତିଷ୍ଠାତା ତଥା ସିଇଓ ସାମ୍ ଅଲ୍ଟମ୍ୟାନ କହିଛନ୍ତି, ଏଆଇ କ୍ଷେତ୍ରରେ ଭାରତରେ ବଡ଼ ସୁଯୋଗ ରହିଛି । ଗ୍ଲୋବାଲ ଏଆଇ ଲିଡର ହେବା ଦିଗରେ ଭାରତ କ୍ଷମତା ରଖେ । ଏଠାରେ ଟେକ୍ ଟାଲେଣ୍ଟ, ବିଶ୍ୱ ସ୍ତରୀୟ ଡେଭଲପର ଇକୋସିଷ୍ଟମ ଇଣ୍ଡିଆ ଏଆଇ ମିଶନ ଭଳି ସରକାରଙ୍କ ସହଯୋଗ ଏହି କ୍ଷେତ୍ରକୁ ଉତ୍ସାହିତ କରିବା ଦିଗରେ ପ୍ରମୁଖ ଭୂମିକା ଗ୍ରହଣ କରିବ ।
ଓପନ ଏଆଇ ପ୍ଲାଟଫର୍ମ ଲାଗି ଭାରତ ବିଶ୍ୱର ୫ମ ବୃହତ ଡେପଲପର ମାର୍କେଟ ଭାବେ ଉଭା ହୋଇଛି । ଭାରତରେ ଚାଟ୍ଜିପିଟିର ଅଭିବୃଦ୍ଧି ଉଲ୍ଲେଖନୀୟ ରହିଛି । ଘରୋଇ ବଜାର ହେଉଛି ଏଆଇ ଲାଗି ଦ୍ୱିତୀୟ ବଡ ବଜାର । କମ୍ପାନି ନିକଟରେ ଭାରତ ବଜାର ଲାଗି ମଧ୍ୟ ୩୯୯ ଟଙ୍କାର ଏକ ଅଫର ଆଣିଛି । କେନ୍ଦ୍ର ଇଲେକଟ୍ରୋନିକ୍ସ ଏବଂ ଆଇଟି ମନ୍ତ୍ରଣାଳୟ ସହ ମିଳିତ ହୋଇ କମ୍ପାନି ଓପନଏଆଇ ଏକାଡେମୀ ଲଞ୍ଚ କରିଛି । ଏହା ଦ୍ୱାରା ଘରୋଇ ବଜାରରେ ଏଆଇ ସଚେତନତା ସୃଷ୍ଟି ଉପରେ କମ୍ପାନି ଧ୍ୟାନ କେନ୍ଦ୍ରିତ କରିବ ।
ଓପନ ଏଆଇର ଏହି ନିଷ୍ପତ୍ତିକୁ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ ସ୍ୱାଗତ କରିଛନ୍ତି । ଡିଜିଟାଲ ନବସୃଜନ ଏବଂ ଏଆଇ ଗ୍ରହଣୀୟତା ଦିଗରେ ଏହା ଭାରତର କ୍ଷମତାକୁ ପ୍ରତିପାଦିତ କରୁଛି ବୋଲି କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି । ପ୍ରତି ଲୋକ ଯେଭଳି ଆର୍ଟିଫିସିଆଲ ଇଣ୍ଟେଲିଜେନ୍ସର ଲାଭ ପାଇବେ ସେଥିଲାଗି ଏକ ଇକୋସିଷ୍ଟମ ଗଠନ ଦିଗରେ କେନ୍ଦ୍ର ସରକାର ବିଭିନ୍ନ କାର୍ଯ୍ୟକ୍ରମ ଗ୍ରହଣ କରିବେ ।
ଡାଟା କ୍ଷେତ୍ରରେ ଜିଓ ଭଳି ଏଆଇକୁ ଘରୋଇ ବଜାରରେ ଲୋକପ୍ରିୟ କରିବା ଲାଗି ଓପନ ଏଆଇ ଏଭଳି ସୁଲଭ ପ୍ଲାନ ଉପରେ ଧ୍ୟାନ କେନ୍ଦ୍ରିତ କରିଥିବା କୁହାଯାଉଛି । କେବଳ ଓପନ ଏଆଇ ନୁହେଁ ଅନ୍ୟ ପ୍ରମୁଖ କମ୍ପାନି ଗୁଗଲ, ମାଇକ୍ରୋସଫ୍ଟ ଏବଂ ପରପ୍ଲେକ୍ସିଟି ଭଳି କମ୍ପାନି ମଧ୍ୟ ଭାରତ ବଜାରକୁ ନେଇ ବେଶ ଆଶାବାଦୀ ରହିଛନ୍ତି ।
ଗୁଗଲର ଜେମିନି ପ୍ରିମିୟମ ପ୍ଲାନ ୧୯୫୦ ଟଙ୍କାରେ ଉପଲବ୍ଧ ହେଉଛି । ଏଥିରେ ବିଭିନ୍ନ ସେବା ଲୋକଙ୍କ ଲାଗି ଉପଲବ୍ଧ କରାଉଛି କମ୍ପାନି । ସେହିଭଳି ଭାରତୀୟଙ୍କ ଦ୍ୱାରା ପ୍ରତିଷ୍ଠିତ ପରପ୍ଲେକ୍ସିଟି ଏଆଇ ବାର୍ଷିକ ୧୭ ହଜାର ଟଙ୍କିଆ ପ୍ଲାନ ଲାଗି ଏୟାରଟେଲ ସହ ଚୁକ୍ତି କରିଛି । ଏଲନ ମସ୍କଙ୍କ ଏକ୍ସଏଆଇ ଭାରତରେ ସୁପର ଗ୍ରୋକ୍ ସୁବିଧା ମାସିକ ୭୦୦ ଟଙ୍କାରେ ପ୍ରଦାନ କରିବାକୁ ଲକ୍ଷ୍ୟ ରଖିଛି ।
କମ୍ପାନିଙ୍କ ମଧ୍ୟରେ ଏହି ପ୍ଲାନ ଗୁଡ଼ିକୁ ନେଇ ମଧ୍ୟ ପ୍ରତିଯୋଗିତା ଲାଗିଲାଣି । ତେବେ ଭାରତୀୟ କମ୍ପାନି ମଧ୍ୟ ଏଆଇ ବିକାଶରେ ପଛରେ ନାହାନ୍ତି । ୟୁନିକର୍ଣ୍ଣ ଷ୍ଟାର୍ଟଅପ୍ କୃତ୍ରିମ ଏବଂ ଚ୍ୟାଲେଞ୍ଜର୍ସ ସର୍ଭମ ଏଆଇ ଏବଂ ଭାରତ ଜିପିଟି ବିକଶିତ କରିଛନ୍ତି । ଏହାକୁ ଦେଶର ପ୍ରଥମ ଲାର୍ଜ ଲାଙ୍ଗୁଏଜ ମଡେଲ ବୋଲି କୁହାଯାଉଛି । ସେହିଭଳି କ୍ୟୁରଏଆଇ, ନିରମଏଆଇ, ମ୍ୟାଡଷ୍ଟ୍ରିଟ ଡେନ, ୟେଲୋ ଏଆଇ ମଧ୍ୟ ଘରୋଇ ବଜାରରେ କାମ କରୁଛନ୍ତି । ୨୦୪୭ ସୁଦ୍ଧା ଭାରତକୁ ଗ୍ଲୋବାଲ ଏଆଇ ହବ୍ ଭାବେ ବିକଶିତ କରିବା ସରକାରଙ୍କ ଲକ୍ଷ୍ୟ ବୋଲି ରାଷ୍ଟ୍ରପତି ଦ୍ରୌପଦୀ ମୁର୍ମୁ ସ୍ୱାଧୀନତା ଦିବସରେ ଦେଶବାସୀଙ୍କୁ ବାର୍ତ୍ତାରେ କହିଥିଲେ ।
