ନୂଆଦିଲ୍ଲୀ: ଜମ୍ମୁକାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ ପାକିସ୍ତାନ ବିରୋଧରେ ପୁଣି ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ପାକିସ୍ତାନ ପାଇଁ ନିଜର ଆକାଶ ମାର୍ଗ ବନ୍ଦ କରିଦେଇଛି ଭାରତ । ବାୟୁସେନାକୁ ନୋଟିସ ଅର୍ଥାତ୍ NOTAM ଜାରି କରାଯାଇଛି । ୩୦ ଏପ୍ରିଲରୁ ୨୩ ମେ’ ପର୍ଯ୍ୟନ୍ତ NOTAM(ନୋଟିସ ଟୁ ଏୟାରମ୍ୟାନ୍) ଜାରି କରାଯାଇଛି । ଏହି ସମୟ ମଧ୍ୟରେ କୌଣସି ପାକିସ୍ତାନ ପଞ୍ଜିକୃତ ବିମାନ କିମ୍ବା ସାମରିକ ବିମାନ ଭାରତୀୟ ଆକାଶ ମାର୍ଗରେ ପ୍ରବେଶ କରିପାରିବ ନାହିଁ । ଏହା ପୂର୍ବରୁ ଭାରତୀୟ ବିମାନ ଲାଗି ନିଜର ଆକାଶ ମାର୍ଗ ବନ୍ଦ କରିଦେଇଥିଲା ପାକିସ୍ତାନ ।
ଏହାରି ମଧ୍ୟରେ ପାକିସ୍ତାନରୁ ଏକ ବଡ଼ ଖବର ମଧ୍ୟ ସାମ୍ନାକୁ ଆସିଛି। ପାକିସ୍ତାନର ଉପପ୍ରଧାନମନ୍ତ୍ରୀ ପୁଣି କହିଛନ୍ତି ଯେ, ୩୬ ଘଣ୍ଟା ମଧ୍ୟରେ ଯୁଦ୍ଧ ନିଶ୍ଚିତ । ପାକିସ୍ତାନର ଉପପ୍ରଧାନମନ୍ତ୍ରୀ ଇସାକ ଦାର କହିଛନ୍ତି ଯେ, ସେ ଏକ ଅତ୍ୟନ୍ତ ନିର୍ଭରଯୋଗ୍ୟ ସୂତ୍ରରୁ ଏହି ଖବର ପାଇଛନ୍ତି ଏବଂ ଏହି ସୂତ୍ର ଭୁଲ ହେବ ନାହିଁ । ଭାରତ ୩୬ ଘଣ୍ଟା ମଧ୍ୟରେ ଆମ ଉପରେ ଆକ୍ରମଣ କରିପାରେ । ପାକିସ୍ତାନର ଉପପ୍ରଧାନମନ୍ତ୍ରୀ ଏହା ମଧ୍ୟ କହିଛନ୍ତି ଯେ, ଆମେ ଭାରତ ସହିତ ଯୁଦ୍ଧ ଚାହୁଁନାହୁଁ । କିନ୍ତୁ ଭାରତ ଯୁଦ୍ଧ କଲେ ଦୁଇ ଗୁଣ ଶକ୍ତି ସହ ଲଢ଼େଇ କରିବୁ ।
ଏପ୍ରିଲ ୨୨ରେ ଜମ୍ମୁକାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ କ’ଣ କରିବାକୁ ଯାଉଛି ତାହା କଳ୍ପନା କରି କରି ପାକିସ୍ତାନ ହାଲ ବେହାଲ ହୋଇପଡ଼ିଛି । ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ ବୁଧବାର କହିଛନ୍ତି ଯେ, ଦୁଇ ପଡ଼ୋଶୀ ଦେଶ ମଧ୍ୟରେ ଉତ୍ତେଜନା ହ୍ରାସ କରିବା ପାଇଁ ବିଭିନ୍ନ ଦେଶ ଦ୍ୱାରା ପ୍ରୟାସ କରାଯିବା ସତ୍ତ୍ୱେ ସଂଘର୍ଷର ସମ୍ଭାବନା ବୃଦ୍ଧି ପାଉଛି । ପାକିସ୍ତାନର ପ୍ରତିରକ୍ଷା ମନ୍ତ୍ରୀଙ୍କ ଅନୁଯାୟୀ, ଭାରତ ଆକ୍ରମଣ କରିବାକୁ ଯାଉଛି । ସଂସଦ ବାହାରେ ଗଣମାଧ୍ୟମ ସହିତ କଥାବାର୍ତ୍ତା ସମୟରେ ଆସିଫ ଏହି ମନ୍ତବ୍ୟ ଦେଇଛନ୍ତି ।
