ମୁମ୍ବାଇ,୦୨/୧୧: ମୁମ୍ବାଇ ଟେଷ୍ଟର ଦ୍ବିତୀୟ ଦିନର ଖେଳ ଶେଷ ହୋଇଛି। ନ୍ୟୁଜିଲାଣ୍ଡର ସ୍କୋର ଦ୍ବିତୀୟ ଦିନର ଷ୍ଟମ୍ପ ଅପସାରଣ ସୁଦ୍ଧା ୯ ଓ୍ବିକେଟ ବିନିମୟରେ ୧୭୧ ରନ୍ ରହିଛି। ଏହି ପରିପ୍ରେକ୍ଷିରେ କିଓ୍ବି ଦଳ ୧୪୩ ରନ୍ରେ ଅଗ୍ରଣୀ ରହିଛି। ନ୍ୟୁଜିଲାଣ୍ଡ ପକ୍ଷରୁ ଅଜାଜ ପଟେଲ ଏବଂ ଓ୍ବିଲିୟମ ଓରୁକ ଅପରାଜିତ ରହିଛନ୍ତି। ସେପଟେ ବର୍ତ୍ତମାନ ସୁଦ୍ଧା ଭାରତ ପକ୍ଷରୁ ରବିନ୍ଦ୍ର ଜାଡ଼ାଜା ସବୁଠାରୁ ସଫଳ ବୋଲର ସାବ୍ୟସ୍ତ ହୋଇଛନ୍ତି। ଆଜିର ମ୍ୟାଚ୍ରେ ଜାଡେଜାଙ୍କୁ ୪ଟି ଓ୍ବିକେଟ ମିଳିଛି। ସେହିପରି ରବିଚନ୍ଦ୍ରନ୍ ଅଶ୍ବିନୀ କିଓ୍ବି ଦଳର ତିନିଜଣ ବ୍ୟାଟରଙ୍କୁ ଶିକାର କରିଥିଲେ। ଆକାଶଦୀପ ଏବଂ ଓ୍ବାଶିଂଟନ ସୁନ୍ଦର ୧-୧ ଓ୍ବିକେଟ ନିଜ ନାଁରେ କରିଥିଲେ। ଆଜି ଦ୍ବିତୀୟ ଦିନରେ ଉଭୟ ଦଳରୁ ୧୫ଜଣ ବ୍ୟାଟର ପାଭିଲିୟନ ଫେରିଥିଲେ।
ଏହାପୂର୍ବରୁ ଭାରତ ଦ୍ୱିତୀୟ ଦିନରେ ୪ ୱିକେଟ୍ରେ ୮୪ ରନ୍ରୁ ଖେଳ ଆରମ୍ଭ କରିଥିଲା। ଶୁଭମାନ ଗିଲ ଏବଂ ଋଷଭ ପନ୍ତ ଭାରତ ପାଇଁ ୯୬ ରନର ଭାଗିଦାରୀ କରିଥିଲେ, କିନ୍ତୁ ଏହା ପରେ ଟିମ୍ ଇଣ୍ଡିଆର ବ୍ୟାଟରମାନେ ନିୟମିତ ବ୍ୟବଧାନରେ ପାଭିଲିୟନକୁ ଫେରିଥିଲେ। ଫଳସ୍ୱରୂପ ଭାରତୀୟ ଦଳ ୨୬୩ ରନକୁ ହ୍ରାସ ପାଇଥିଲା। ୫୯ ବଲରେ ୬୦ ରନ୍ ସ୍କୋର କରିବା ପରେ ଋଷଭ ପନ୍ତ ଆଉଟ୍ ହୋଇଥିଲେ। ସେ ତାଙ୍କ ଇନିଂସରେ ୮ଟଇ ଚୌକା ଓ ୨ଟି ଛକା ମାରିଥିଲେ। ଶୁଭମାନ ଗିଲ ୧୪୬ ବଲରେ ୯୦ ରନ୍ ସଂଗ୍ରହ କରିଥିଲେ। ସେ ନିଜ ଇନିଂସରେ ୭ ଚୌକା ଓ ୧ ଛକା ମାରିଥିଲେ। ଏହା ପରେ କ୍ରମାଗତ ଭାବରେ ଭାରତୀୟ ବ୍ୟାଟରମାନେ ପାଭିଲିୟନ ଫେରିଥିଲେ। ସରଫରାଜ ଖାନ କୌଣସି ରନ୍ କରିନଥିବା ବେଳେ ରବିନ୍ଦ୍ର ଜାଡେଜା ୧୪ ରନ୍ ସଂଗ୍ରହ କରିଥିଲେ। ଏହି ପରିପ୍ରେକ୍ଷିରେ ରବି ଅଶ୍ୱିନ୍ ୬ ରନ୍ କରିଥିଲେ। ଆକାଶଦୀପ ଶୂନ୍ୟରେ ଆଉଟ୍ ହୋଇଥିଲେ। ତେବେ ୱାଶିଂଟନ୍ ସୁନ୍ଦର ୩୮ ରନର ଏକ ଗୁରୁତ୍ୱପୂର୍ଣ୍ଣ ଯୋଗଦାନ ରଖିଥିଲେ।
ନ୍ୟୁଜିଲ୍ୟାଣ୍ଡ ପକ୍ଷରୁ ଅଜାଜ ପଟେଲ ସବୁଠାରୁ ସଫଳ ବୋଲର ସାବ୍ୟସ୍ତ ହୋଇଥିଲେ। ଅଜାଜ ପଟେଲ ୫ ଜଣ ବ୍ୟାଟରଙ୍କୁ ପାଭିଲିୟନର ରାସ୍ତା ଦେଖାଇଥିଲେ। ଏହା ବ୍ୟତୀତ ମ୍ୟାଟ ହେନେରୀ, ଗ୍ଲେନ ଫିଲିପ୍ସ ଏବଂ ଇଶ ସୋଡି ଗୋଟିଏ ଲେଖାଏଁ ୱିକେଟ୍ ନେଇଥିଲେ।
