ନୂଆଦିଲ୍ଲୀ,୧୧/୦୮: ପହଲଗାମ ଆତଙ୍କୀ ଆକ୍ରମଣ ଓ ଭାରତର ଅପରେସନ ସିନ୍ଦୂର ପରେ ପ୍ରଥମଥର ଲାଗି ଆରବ ସାଗରରେ ଭାରତ ଓ ପାକିସ୍ତାନର ନୌସେନା ସେମାନଙ୍କ ଶକ୍ତି ଦେଖାଇବେ । ଆଜିଠୁ ଦୁଇଦେଶର ନୌସେନା ପୃଥକ ଭାବେ ଦୁଇଦିନିଆ ସମରାଭ୍ୟାସ କରିବେ । ଏଥିପାଇଁ ଭାରତ ପକ୍ଷରୁ ନୋଟାମ (ନୋଟିସ୍ ଟୁ ଏୟାରମ୍ୟାନ୍) ଜାରି କରାଯାଇଛି । ଭାରତୀୟ ନୌସେନା ପକ୍ଷରୁ ଗୁଜରାଟର ଓଖା ଓ ପୋରବନ୍ଦର ଉପକୂଳରେ ଏହି ସମରାଭ୍ୟାସ କରାଯିବ ।
ସେହିଭଳି ପାକିସ୍ତାନ ନୌସେନା ନିଜର ଜଳରାଶିରେ ସେହିଦିନ ଡ୍ରିଲ୍ କରିବାକୁ ଘୋଷଣା କରିଛି । ଉଭୟ ଦେଶର ସମରାଭ୍ୟାସର ଦୂରତା ପ୍ରାୟ ୬୦ ନୌଟିକାଲ ମାଇଲ୍ ରହିବ । ତେବେ ଏକସମୟରେ ଦୁଇଦେଶର ନୌସେନା ସମାନ ଜଳରାଶିରେ ସମରାଭ୍ୟାସ କରିବା ଚର୍ଚ୍ଚାର ବିଷୟ ହୋଇଛି । ଜମ୍ମୁ-କାଶ୍ମୀରର ପହଲଗାମରେ ଏପ୍ରିଲ ୨୨ରେ ଆତଙ୍କବାଦୀମାନେ ୨୬ ଜଣ ପର୍ଯ୍ୟଟକଙ୍କୁ ହତ୍ୟା କରିଥିଲେ । ଏହାର ପ୍ରତିଶୋଧ ନେବାକୁ ଯାଇ ଭାରତ ମେ ୭ ତାରିଖରେ ଅପରେସନ ସିନ୍ଦୂର ଆରମ୍ଭ କରିଥିଲା ।
