ନୂଆଦିଲ୍ଲୀ,୩୦।୬: ଭାରତ ଏହାର K-6 ହାଇପରସୋନିକ୍ କ୍ଷେପଣାସ୍ତ୍ରର ସମୁଦ୍ର ପରୀକ୍ଷଣ କରିବାକୁ ପ୍ରସ୍ତୁତ। ଏହି କ୍ଷେପଣାସ୍ତ୍ର ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ (DRDO) ଦ୍ୱାରା ବିକଶିତ ହେଉଛି, ଯାହାକୁ ଭାରତର ଆଗାମୀ S-5 ଶ୍ରେଣୀର ପରମାଣୁ ବୁଡ଼ାଜାହାଜରେ ନିୟୋଜିତ କରାଯାଇପାରିବ। ଆନ୍ତଃମହାଦେଶୀୟ ବାଲିଷ୍ଟିକ୍ କ୍ଷେପଣାସ୍ତ୍ର K-6 ର ଗତି ଏବଂ ପରିସର ବ୍ରହ୍ମୋସ୍ କ୍ଷେପଣାସ୍ତ୍ର ଅପେକ୍ଷା ଭଲ ହେବ। ଏହି କ୍ଷେପଣାସ୍ତ୍ର ଭାରତକୁ ପାକିସ୍ତାନ ଏବଂ ଚୀନ୍ ଭଳି ଶତ୍ରୁ ଦେଶଗୁଡ଼ିକୁ ଅଧିକ ପ୍ରଭାବଶାଳୀ ଭାବରେ ମୁକାବିଲା କରିବାରେ ସାହାଯ୍ୟ କରିବ।

ହାଇଦ୍ରାବାଦର DRDOର ଆଡଭାନ୍ସଡ୍ ନାଭାଲ୍ ସିଷ୍ଟମ୍ସ ଲାବୋରେଟୋରୀରେ ବିକଶିତ ହେଉଥିବା K-6 ଭାରତର ସବୁଠାରୁ ଉନ୍ନତ ଏବଂ ଘାତକ କ୍ଷେପଣାସ୍ତ୍ର ମଧ୍ୟରୁ ଗୋଟିଏ। K-6 ଯେଉଁ S-5 ଶ୍ରେଣୀର ପରମାଣୁ ବୁଡ଼ାଜାହାଜରୁ ନିକ୍ଷେପ କରାଯିବ ତାହା ବର୍ତ୍ତମାନର ଅରିହନ୍ତ କ୍ଲାସର ବୁଡ଼ାଜାହାଜ ତୁଳନାରେ ବଡ଼ ଏବଂ ଅଧିକ ଶକ୍ତିଶାଳୀ ହେବ। ଏଗୁଡ଼ିକୁ ଭାରୀ ଯୁଦ୍ଧାସ୍ତ୍ର ଏବଂ କ୍ଷେପଣାସ୍ତ୍ର ବହନ କରିବା ପାଇଁ ବିକଶିତ କରାଯାଉଛି।

ଆଗାମୀ ସମୁଦ୍ର ପରୀକ୍ଷଣ ସହିତ, K-6 କ୍ଷେପଣାସ୍ତ୍ର ହାଇପରସୋନିକ୍ ବେଗରେ ପହଞ୍ଚିପାରିବ। ହାଇପରସୋନିକ୍ ଅର୍ଥ ହେଉଛି ମାକ୍ 7.5 (ଶବ୍ଦର ଗତିଠାରୁ ସାଢ଼େ ସାତ ଗୁଣ) କିମ୍ବା ଘଣ୍ଟା ପ୍ରତି ୯,୨୦୦ କିଲୋମିଟର। ଏହି କ୍ଷେପଣାସ୍ତ୍ରର କାର୍ଯ୍ୟକ୍ଷମ ପରିସର ୮୦୦୦ କିଲୋମିଟର, ଯାହାର ଅର୍ଥ ହେଉଛି ଏହା କିଛି ମିନିଟ୍ ମଧ୍ୟରେ ଶତ୍ରୁ ଅଞ୍ଚଳ ଭିତରକୁ ଆକ୍ରମଣ କରିପାରିବ। ହାଇପରସୋନିକ୍ ଗତି ଯୋଗୁଁ, କ୍ଷେପଣାସ୍ତ୍ର ଅଧିକାଂଶ ଆଣ୍ଟି ମିସାଇଲ ଡିଫେନ୍ସ ସିଷ୍ଟମକୁ ଏଡ଼ାଇ ଯାଇପାରେ, ଯାହାକି ଶତ୍ରୁ ପକ୍ଷକୁ ପାଲଟା ଆକ୍ରମଣ କରିବାର ସମୟ ଦିଏ ନାହିଁ।  

K-6 କ୍ଷେପଣାସ୍ତ୍ରରେ ମଲ୍ଟିପଲ ଇଣ୍ଡିପେଣ୍ଡେଣ୍ଟଲି ଟାର୍ଗେଟେବଲ୍ ରି-ଏଣ୍ଟ୍ରି ଭେଇକିଲ୍ (MIRV) ପ୍ରଯୁକ୍ତିବିଦ୍ୟା ରହିଛି। ଏହା ଗୋଟିଏ କ୍ଷେପଣାସ୍ତ୍ରକୁ ସଠିକତାର ସହିତ ଅନେକ ଲକ୍ଷ୍ୟସ୍ଥଳକୁ ଆକ୍ରମଣ କରିବାକୁ ସହାୟତା କରିବ, ଯାହାଫଳରେ ଆକ୍ରମଣ ଓ ପ୍ରତିରକ୍ଷା ଉଭୟ ଅଭିଯାନରେ ଏହାର ପ୍ରଭାବଶାଳୀତା ବଢିବ। ଏହି କ୍ଷେପଣାସ୍ତ୍ର ଉଭୟ ପରମାଣୁ ଏବଂ ପାରମ୍ପରିକ ଯୁଦ୍ଧାସ୍ତ୍ର ବହନ କରିପାରିବ ଯାହାକୁ ବିଭିନ୍ନ ଯୁଦ୍ଧସ୍ଥିତିରେ ବ୍ୟବହାର କରାଯାଇପାରିବ। K-6 ହେଉଛି ଭାରତ ପାଖରେ ଉପଲବ୍ଧ ବୁଡ଼ାଜାହାଜ-ଲଞ୍ଚ ହୋଇଥିବା ବାଲିଷ୍ଟିକ୍ କ୍ଷେପଣାସ୍ତ୍ର କିମ୍ବା SLBM ଯେପରିକି K-4 (୩,୫୦୦ କିଲୋମିଟର ପରିସର) ଏବଂ K-5 (୬୦୦୦ କିଲୋମିଟର ପର୍ଯ୍ୟନ୍ତ) ର ଏକ ଅପଗ୍ରେଡେଡ୍ ସଂସ୍କରଣ। ଏହାର ଗତି ଓ ବିନାଶକାରୀ କ୍ଷମତା ଉଭୟ ବ୍ରହ୍ମୋସ ମିସାଇଲଠାରୁ ଅଧିକ ହେବ। K-6 କ୍ଷେପଣାସ୍ତ୍ରଟି ୧୨ ମିଟରରୁ ଅଧିକ ଲମ୍ବ ଏବଂ ଏହାର ବ୍ୟାସ ୨ ମିଟରରୁ ଅଧିକ ହେବ। କେବଳ କିଛି ବଛା ବଛା ଦେଶ ପାଖରେ ଉନ୍ନତ ହାଇପରସୋନିକ୍ ଏବଂ MIRV-ସଜ୍ଜିତ କ୍ଷେପଣାସ୍ତ୍ର ପ୍ରଣାଳୀ ଅଛି କିମ୍ବା ବିକଶିତ କରୁଛନ୍ତି। ଏହି ଦେଶଗୁଡ଼ିକ ହେଉଛି ଆମେରିକା, ରୁଷ, ଚୀନ୍, ଫ୍ରାନ୍ସ ଏବଂ  ୟୁକେ । K-6 କ୍ଷେପଣାସ୍ତ୍ରର ସଫଳ ସମୁଦ୍ର ପରୀକ୍ଷଣ ସହିତ ଭାରତ ସେହି ସବୁ ଦେଶଙ୍କ କ୍ଲବରେ ସାମିଲ ହୋଇଛି।