ନୂଆଦିଲ୍ଲୀ: ଭାରତୀୟ ସେନା ପାକିସ୍ତାନ ଓ ପାକିସ୍ତାନ ଅଧିକୃତ ଜମ୍ମୁ ଓ କାଶ୍ମୀର (PoJK) ରେ ଥିବା ୯ଟି ଆତଙ୍କୀ ଶିବିର ଉପରେ ସଠିକ ଓ ନିୟନ୍ତ୍ରିତ ଆକ୍ରମଣ କରିଛି। ଏହି ଆକ୍ରମଣକୁ 'ଅପରେସନ୍ ସିନ୍ଦୁର' ନାମ ଦିଆଯାଇଛି। ଏପ୍ରିଲ ୨୨ ତାରିଖରେ ଜମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ଜବାବ ସ୍ୱରୂପ ଭାରତୀୟ ସେନା ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। 

ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏହି ଆକ୍ରମଣକୁ ପ୍ରଶଂସା କରି କହିଛନ୍ତି ଯେ, "ଭାରତୀୟ ସେନାର ଏହି ସାହସୀ କାର୍ଯ୍ୟ ଆତଙ୍କବାଦ ବିରୋଧରେ ଆମର ଦୃଢ଼ ନୀତିକୁ ଦର୍ଶାଉଛି। ଯେଉଁମାନେ ଭାରତର ଶାନ୍ତି ଓ ସୁରକ୍ଷାକୁ ବିପଦରେ ପକାଇଛନ୍ତି, ସେମାନଙ୍କୁ କୌଣସି ମୂଲ୍ୟରେ ଛଡ଼ାଯିବ ନାହିଁ।" ସେ ଆହୁରି ମଧ୍ୟ କହିଛନ୍ତି ଯେ ଏହି ଆକ୍ରମଣ କେବଳ ଆତଙ୍କବାଦୀ ଶିବିରକୁ ଲକ୍ଷ୍ୟ କରି କରା ଯାଇଛି। ପାକିସ୍ତାନର ସାମରିକ ସ୍ଥାନଗୁଡ଼ିକୁ ଟାର୍ଗେଟ କରାଯାଇ ନାହିଁ। ଯାହା ଏହାକୁ ଏକ ନିୟନ୍ତ୍ରିତ ଓ ଅଣ-ହିଂସାତ୍ମକ କାର୍ଯ୍ୟ ବୋଲି ପ୍ରମାଣ କରୁଛି।

ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ସେନାର ଏହି କାର୍ଯ୍ୟକୁ ସମର୍ଥନ କରିଛନ୍ତି। ସେ କହିଛନ୍ତି, "ନୂଆ ଭାରତ ଆତଙ୍କବାଦର ସମ୍ମୁଖୀନ ହେବା ପାଇଁ ସବୁବେଳେ ପ୍ରସ୍ତୁତ। ପହଲଗାମ ଆକ୍ରମଣରେ ନିରୀହ ଲୋକଙ୍କ ଜୀବନ ହରାଇଥିବା ଘଟଣାର ଏହା ଏକ ଯଥାର୍ଥ ଜବାବ। ଆମେ ଆମର ସେନାର ସାହସ ଓ ଦକ୍ଷତାକୁ ସଲାମ କରୁଛୁ।"

କେନ୍ଦ୍ରମନ୍ତ୍ରୀ ପୀୟୁଷ ଗୋୟଲ "ଅପରେସନ୍ ସିନ୍ଦୂର" ଲେଖା ସହିତ ସାମାଜିକ ଗଣମାଧ୍ୟମ ଏକ୍ସରେ ଏକ ଫଟୋ ସେୟାର କରି କ୍ୟାପସନ ଦେଇଛନ୍ତି, "ଭାରତ ମାତା କି ଜୟ"। ତେଜସ୍ୱୀ ଯାଦବ ହିନ୍ଦୀରେ ଲେଖିଛନ୍ତି, "ଆତଙ୍କବାଦ କିମ୍ବା ବିଚ୍ଛିନ୍ନତାବାଦ ରହିବା ଉଚିତ୍ ନୁହେଁ! ଆମେ ଆମର ସାହସୀ ସୈନିକ ଏବଂ ଭାରତୀୟ ସେନା ଉପରେ ଗର୍ବିତ।" ଅନ୍ୟ ବିରୋଧୀ ଦଳ ନେତାମାନେ ଭାରତୀୟ ସେନାର ସମର୍ଥନରେ ବାହାରିବା ସହ ଭାରତୀୟ ସେନାର ଅଦମ୍ୟ ସାହାସ ଓ ଆକ୍ରମଣକୁ ମଧ୍ୟ ପ୍ରଶଂସା କଲେ।

ମିଳିଥିବା ଖବର ଅନୁସାରେ, ଏହି ଆକ୍ରମଣ ଲାସ୍କର-ଏ-ତୋଇବାର ଏକ ଶାଖା ସଂଗଠନ ଦ ରେସିଷ୍ଟାନ୍ସ ଫ୍ରଣ୍ଟ (TRF) ସହ ଜଡ଼ିତ ଆତଙ୍କବାଦୀ ସଂଗଠନଗୁଡ଼ିକୁ ଟାର୍ଗେଟ କରାଯାଇଛି। ଯିଏ ପହଲଗାମ ଆକ୍ରମଣ ପାଇଁ ନିଜକୁ ଦାୟୀ କରିଥିଲା। ଭାରତୀୟ ସେନା ଏହି କାର୍ଯ୍ୟକୁ ୯୬ କିଲୋମିଟର ଅଞ୍ଚଳ ମଧ୍ୟରେ ସୀମିତ ରଖିଥିବା ବେଳେ ଏହି ଆକ୍ରମଣ ପାଇଁ ଏୟାର ଡିଫେନ୍ସ ମିସାଇଲ ବ୍ୟବହାର କରିଥିଲା।

ଏହି ଘଟଣା ସମ୍ପର୍କରେ ଆଜି ଅପରାହ୍ନରେ ଏକ ବିସ୍ତୃତ ବ୍ରିଫିଂ ଆୟୋଜନ କରାଯିବ ବୋଲି ସୂଚନା ମିଳିଛି। ଏହା ମଧ୍ୟରେ, ଜାତୀୟ ଓ ଅନ୍ତର୍ଜାତୀୟ ସ୍ତରରେ ଏହି ଆକ୍ରମଣ ଏବଂ ଏହାର ପରିଣାମ ଉପରେ ତୀକ୍ଷ୍ଣ ନଜର ରଖାଯାଇଛି।