ନୂଆଦିଲ୍ଲୀ, ୨୦/୦୫ : ଦେଶରେ ଏସି ଏବଂ ରେଫ୍ରିଜରେଟର ଶିଳ୍ପ ଏବେ ବଡ଼ ପରିବର୍ତ୍ତନ ପଥରେ ପ୍ରବେଶ କରିବାକୁ ଯାଉଛି। କେନ୍ଦ୍ର ସରକାର ଏସି ଏବଂ ରେଫ୍ରିଜରେଟରରେ ବ୍ୟବହାର ହେଉଥିବା କମ୍ପ୍ରେସର ଆମଦାନିକୁ ନେଇ କଠୋର ଆଭିମୁଖ୍ୟ ପ୍ରକାଶ କରିଛନ୍ତି । ଏହାପରେ କମ୍ପାନିଗୁଡ଼ିକ ମଧ୍ୟରେ ଦେଶରେ ଉତ୍ପାଦନ ବଢ଼ାଇବା ନେଇ ଦୌଡ଼ ଆରମ୍ଭ ହୋଇଗଲାଣି । ବର୍ତ୍ତମାନ ପର୍ଯ୍ୟନ୍ତ ବିଦେଶରୁ ବିଶେଷ କରି ଚୀନ ଏବଂ ଅନ୍ୟାନ୍ୟ ଏସୀୟ ରାଷ୍ଟ୍ରଗୁଡ଼ିକରୁ ଆମଦାନି କରାଯାଉଥିଲା । କିନ୍ତୁ ସରକାରଙ୍କ ଫୋକସ ଏବେ ଘରୋଇ ବିନିର୍ମାଣକୁ ମଜଭୁତ କରିବା ଏବଂ ବିଦେଶରୁ ଆମଦାନି କମାଇବା ଉପରେ ରହିଛି । ଅନୁମାନ କରାଯାଉଛି ଯେ, ସରକାରଙ୍କ କଡ଼ା ପଦକ୍ଷେପ ଦ୍ୱାରା ଦେଶରେ ନିବେଶ ବଢ଼ିବ, ରୋଜଗାର ଏବଂ ପ୍ରଯୁକ୍ତିଗତ ବିକାଶ ବି ତ୍ୱରାନ୍ୱିତ ହେବ ।
ବିଶେଷଜ୍ଞଙ୍କ କହିବାନୁସାରେ, ଏସି ଏବଂ ଫ୍ରିଜ୍ର ସବୁଠାରୁ ପ୍ରଧାନ ଅଂଶ ହେଉଛି କମ୍ପ୍ରେସର। ଏହା ବିନା କୁଲିଂ ସିଷ୍ଟମ କାର୍ଯ୍ୟ କରି ନ ଥାଏ । ଏଯାବତ ଭାରତୀୟ କମ୍ପାନିଗୁଡ଼ିକ ଅଧିକ ପରିମାଣରେ କମ୍ପ୍ରେସରକୁ ବିଦେଶରୁ ମଗାଇ ଏଠାରେ ଆସେମ୍ବ୍ଲିଂ କରୁଥିଲେ । କିନ୍ତୁ ସରକାରଙ୍କ ଦ୍ୱାରା ଆମଦାନି କଟକଣା ପରେ କମ୍ପାନିଗୁଡ଼ିକ ଭାରତରେ ଉତ୍ପାଦନ ୟୁନିଟ୍ ବସାଇବା ଦିଗରେ କାର୍ଯ୍ୟ କରୁଛନ୍ତି । ଏହାଦ୍ୱାରା ଘରୋଇ ଉଦ୍ୟୋଗଗୁଡ଼ିକୁ ବଳ ମିଳିବ ଏବଂ ମେକ୍ ଇନ୍ ଇଣ୍ଡିଆ ଅଭିଯାନ ବି ତ୍ୱରାନ୍ୱିତ ହେବ । କେତେକ କମ୍ପାନି ପୂର୍ବରୁ ହିଁ ସ୍ଥାନୀୟ ଉତ୍ପାଦନ ବଢ଼ାଇବାର ସମ୍ଭାବନା ଉପରେ କାର୍ଯ୍ୟ ଆରମ୍ଭ କରିସାରିଲେଣି ।
ସରକାରଙ୍କ ନିଷ୍ପତ୍ତି ପରେ ଇଲେକ୍ଟ୍ରୋନିକ୍ସ ଏବଂ ହୋମ୍ ଆପ୍ଲାଏନ୍ସେସ୍ କମ୍ପାନିଗୁଡ଼ିକରେ ନିବେଶକୁ ନେଇ ପ୍ରତିସ୍ଫର୍ଦ୍ଧା ବଢ଼ୁଥିବାର ଦେଖିବାକୁ ମିଳୁଛି । ଶିଳ୍ପ ସହ ଜଡ଼ିତ ଅଧିକାରୀମାନଙ୍କ କହିବାନୁସାରେ, ଆଗାମୀ ଦିନରେ ଅନେକ ବଡ଼ କମ୍ପାନିଗୁଡ଼ିକ ଭାରତରେ ନୂଆ କାରଖାନା ସ୍ଥାପନ କରିପାରନ୍ତି । କିଛି କମ୍ପାନି ସ୍ଥାନୀୟ ସହଯୋଗୀମାନଙ୍କ ସହ ମିଶି କମ୍ପ୍ରେସର ନିର୍ମାଣ ଲାଗି ପ୍ରସ୍ତୁତ ହେଉଛନ୍ତି । ଅନ୍ୟପକ୍ଷରେ, କିଛି ବିଦେଶୀ କମ୍ପାନି ବି ଭାରତୀୟ ବଜାରରେ ଉତ୍ପାଦନ ୟୁନିଟ୍ ନିର୍ମାଣ ପାଇଁ ଆଗ୍ରହ ଦେଖାଉଛନ୍ତି । ଏହାଦ୍ୱାରା ଯୋଗାଣ ଶୃଙ୍ଖଳ ମଜଭୁତ ହେବ ଏବଂ ଭାରତ ଧୀରେ ଧୀରେ ଏସି ଓ ଫ୍ରିଜ୍ ନିର୍ମାଣ ହବ୍ ପାଲଟିବ।
ଏହି ଖବରଟିକୁ ପଢନ୍ତୁ- ‘ପ୍ରତିବାଦ କର, କିନ୍ତୁ ରାସ୍ତାକୁ ଓହ୍ଲାଇ ଅନ୍ୟମାନଙ୍କୁ ଅସୁବିଧାରେ ପକାଇବା ଉଚିତ୍ ନୁହେଁ’ ଯୁବକଙ୍କୁ CJIଙ୍କ ଅପିଲ୍…
